प्रकाशितवाक्य 9 - सोरियाली नय्या नियम

पाँचवी तुरही

¹ जब पाँचवा स्वर्गदूत ले पचूँ तुरी बजाछ, त मैंले स्वर्ग भटे धरती में एक तारो खितीन देखछ्य, त यो तारा स उ चाँबी दीई गैछ जो उ गैरा गड्डा खोल सकछी जैको गैराईक के अन्त नाहातिन।

² उले गैरा गड्डा खोलछ्य, और उ गड्डा में भटे एक ठूली भट्ठी को जसो धुआँ उठछै, और सूरज और हवा उ गड्डा का धुआँ ले अन्यारा होग्या।

³ उ धुआँ में भटे धरती में टिड्डी निकल्यान, और उनून बिच्छून की नियाती लोगून डंक मारना की ताकत दी गैछ।

^4-5 जसीकैं कैसै बिच्छू का डंक मारना ले दर्द हुछो, उसीकैं इन टिड्डिन पाँच मैना तक उन लोगून तड़पूना को हुकुम दीई ग्योछ, जिनारा कपाल में परमेश्वरै की मुहरो को निशान नी छ्यो। लेकिन उनूनथैं कयी ग्योछ कि नै त उनून धरती की घास स, नै कोई रूखून-डालान नुकशान पुजाया।

⁶ उन पाँच मैना में लोग मरना को तरीका खोजाला, लेकिन उन मर नी सकाला। उन मरना की इच्छा कराला, लेकिन उनूनमें मौत नी आलि।

⁷ यो टिड्डी लड़ाई खिन तैय्यार करिना का घोड़ान का जसा दिखाई दीछ्या। उनूनले अपून ख्वारान में के पैनिना को जसो छ्यो जो सुना का मुकुट जसा लाग छ्या। और उनोरो मुँख आदिमी को मुँखो जसो छ्यो।

⁸ उनार बाल स्यैनिन का बालून जसा लम्बा छ्या, और उनार दाँत बाघका दाँतून की जसा मजबूत छ्या।

⁹ उनूनले छाती में लूवा का बनिना का कवच पैनिना का छ्या; जब उन उड़ून मरैछया, त उन इसी आवाज करछ्या जसीकैं कई घोड़ा लड़ाई का द्वारान रथ खींचभेरन करनान।

¹⁰ उनोरो बिच्छून को जसो पुछौड़ और उनूनमें डंक छ्या, और उनून अपून पुछौड़ा ले लोगून पाँच मैना तक दुख पुजूना की ताकत मिलीनाकि छी, उ उनार पुछौड़ में छी।

¹¹ अथाह गड्डा का स्वर्गदूत उनून खिन राजा का रूप में छ्यो, उ उई दुष्ट दूत छै जैले गैरा गड्डा स खोलीना को छ्यो। इब्रानी भाषा में उको नाम अबद्दोन छै, और यूनानी भाषा में, अपुल्लयोन छै, जैको मतलब, उ जो नाश करछो।

¹² पाँच मैना का बाद यो बिपत्ति खत्म हो जालि। लेकिन येक बाद द्वी बिपत्ति और उनवाला छन।

छठवीं तुरी

¹³ जब छयूँ स्वर्गदूत ले तुरी बजाछ, त मैंले परमेश्वरा का सामुनि धूप जलूना की सुना की वेदी का चारू कुंनान भटे एक आवाज सुणछ्य,

¹⁴ और आवाज ले छयूँ स्वर्गदूतथैं क्योछ, जैले तुरी पकड़िना की छी, अब उन चारू दुष्ट दूतून खोल दे जो फरात नामकी ठूली नदी का किनार में बाँधीनाक छन।

¹⁵ येक कारण तब उन चारू दुष्ट दूतून खोल दी ग्यान। उन पैलिक भटे तैय्यार छ्या और उनूनथैं कयीना को छ्यो कि यो बखत, यो दिन, यो मैना और यो साल खिन इन्तजार करा और अब यो बखत आग्योछ। उनून संसारा का एक तिहाई हिस्सा लोगून मारून छ्यो।

¹⁶ उनूनले वाँ घुड़ान में सवार सिपाईन की एक भौत ठूली सेना जमा भैछ, जिनेरी गिनती मैंले बीस करोड़ सुणछ्य।

¹⁷ उन घोड़ान और उनूनमें बैठिना का जिनून मैंले दर्शन में देखछ्य, उन इसा देखीछ्या, उनार छाती की रक्षा करून वालो कवच आगा को जसो लाल, चटको नीला और गन्धक को जसो पिला छ्यो। घोड़ान का ख्वारा बागक ख्वारान का जसा लागून मरैछ्या, उनार मुँख भटे आगो, धुआँ और गंधक निकलून मरैछ्यो।

¹⁸ इन तीनू बिपत्तिन ले जो घोड़ान का मुँख भटे निकलछ्य आगो, और धुआँ और गन्धक छ्यो, त संसारा का एक तिहाई लोग मार डाली ग्या।

¹⁹ लेकिन उन घोड़ान का पास लोगून मारूना खिन द्वी अलग चीज छ्या, पैलि त उ जो उनार मुँख भटे निकलछी, और दुसरी उनार पुछौड़ में छी। किलैकी उनार पुछौड़ स्याँपून का जसा छ्या, और उन पुछौड़ान में लोगून काटून खिन मुँख ले छ्या।

^20-21 लेकिन बाकि लोग जो उन बिपत्तिन है पैलि नी मारी गैछ्या, उनूनले अब ले अपून बुरा कामून है मन नै फिरायो। उनूनले खून करूनो, जादू-टोना, ब्यभिचार और चोरी करून है मन नै फिरायो। उनूनले भूतून और अपून हातुन ले से बनाईना का चीजून की पूजा करूनो ले नै छोड़यो, जसकैं कि सुन या चाँदी या पीतल या लाकड़ा का बनाईना का मूर्तिन। उन मूर्तिन, नै देख सकना, नै सुण सकना, और नै हिट सकना।