प्रकाशितवाक्य 8 - सोरियाली नय्या नियम

सतुँ मुहर और सूना को धूपदान

¹ जब मेम्ना ले सतूँ मुहर खोलछ्य, त उन सब जो स्वर्ग में छ्या आधा घण्टा तक शान्त हो ग्या।

² और मैंले उन सात स्वर्गदूतून जो परमेश्वरा का सामुनि ठाड़ रूनान, देखछ्य, और उनून सात तुरी दीई ग्यान।

³ फिर वाँ भटे एक और स्वर्गदूत सुना को धूपदान लीभेरन आछ, और वेदी का पास ठाड़ो हो ग्यो; और उ स्वर्गदूत स सब पवित्र लोगून की प्रार्थनान का दगाड़ जलून खिन भौत धूप दीई ग्योछ। उले धूप स और प्रार्थनान उ धूप की वेदी का मलिमें जला दीछ, जो परमेश्वरा का सिंहासना का सामुनि छी।

⁴ और उ धूपो को धूँगो पवित्र लोगून की प्रार्थनान का दगाड़ मिलभेरन उ वेदी में भटे जाँ स्वर्गदूत ले उनून डालीना को छ्यो, परमेश्वरा का सामुनि पुजिग्योछ।

⁵ तब स्वर्गदूत ले धूपदान लीछ, और ऊस वेदी का मलिमें जलीना का आगाले भर दीछ और धरती में डाल दीछ्य; और बिजली की गर्जना की आवाज और चाल चंमकूल और भूचाल हुन लाग्यान।

सात तुरी

⁶ और उन सात स्वर्गदूत जिनारा पास सात तुरी छ्या, उनून बजून खिन तैय्यार भ्यान।

⁷ पैल स्वर्गदूत ले पैलि तुरी बजाछ, त तुरन्त खून में मिलीना का भौत मारो पड़छ्य और आगो धरती में पड़छ्य। येक कारण धरती को एक तिहाई हिस्सा जल ग्यो, और रूखून को एक तिहाई जल ग्या, और सब हरिया घास ले जल गै।

⁸ दुसारा स्वर्गदूत ले दुसरी तुरी बजाछ, त इसो भ्योछ एक ठूलो पहाड़ जसो जलीना की चीज समुद्र में डाली ग्योछ, येक कारण एक तिहाई समुद्रो को पानि खून को जसो बन ग्यो,

⁹ समुद्र में रूनवाला का एक तिहाई प्राणी मर ग्या और एक तिहाई जहाजून ले नाश कर दीछ।

¹⁰ तीसारा स्वर्गदूत ले तिसरी तुरी बजाछ, त मशालो को जसो जलीना को एक ठूलो तारो आकाश भटे खितीछ, येक कारण ले नदीन का एक तिहाई हिस्सा में और पानि का स्रोतुन में आ पड़छ्य।

¹¹ जैका कारण पानि को उ हिस्सा कड़वा और जहरीलो हो ग्यो। और यो पानि स पीभेरन भौत लोग मर ग्या। और उ तारा को नाम कड़वा राखि ग्योछ।

¹² चौथ स्वर्गदूत ले चौथी तुरी बजाछ, और सूरज को एक तिहाई, और चाँद को एक तिहाई और तारान को एक तिहाई में टकराछ, याँ तक कि उनोरो एक तिहाई हिस्सा अन्यारो हो ग्यो और दिन को एक तिहाई में उज्यालो नै र्यो, और उसीकैं रात में ले।

¹³ जब मैंले फिर देखछ्य, त मैंले एक बाज स आकाश में ऊँचा में उड़ून और जोरले यो कुंन सुणछ्य, उन दुष्ट लोगून में बिपत्ति आलि जो धरती में रूनान, किलैकी जब आखरी तीन स्वर्गदूतून ले तुरी बजाला, तब तीन बिपत्ति बाकि छन जो उनून मारली, धरती में रूनवालान में हाय, हाय, हाय।