प्रकाशितवाक्य 7 - सोरियाली नय्या नियम

इस्राएल देशा का एक लाख चौवालीस हजार लोग

^1-2 येका बाद, मैंले चार स्वर्गदूतून संसाराक चारू कुंनान में ठाड़ देखछ्य। उन स्वर्गदूतून संसारे स बिपत्तिन ले नुकशान पुजूनाको परमेश्वरा का तरफ भटे अधिकार मिलीना को छ्यो, चाहे समुन्द्र में हो या धरती में। उनून संसारा का चारू कुंनान में हवा स रोक दीछ, ताकि समुन्द्र में, और धरती में और जंगला का रूखून में हवा नै चलो। मैंले एक और स्वर्गदूत स पूरब दिशा में भटे प्रकट हुन देखछ्य। उक पास जीवित परमेश्वरै की मुहर छी। उ स्वर्गदूत ले उन चार स्वर्गदूतून जोरले धध्याभेरन क्योछ,

³ “जब तक हम अपून परमेश्वरा का दासून का कपाल में मुहर नै लगा द्या, तब तक धरती और समुद्र और रूखून नुकशान जन पुजाया, ताकि उन उ बिपत्तिन है नुकशान नै पुजो।”

⁴ जब स्वर्गदूतून ले मुहर लगूनो पुर कर लीछ, त केले मैंस बताछ कि उन लोग जिनारा कपाल में स्वर्गदूतून ले परमेश्वरै की मुहर ले निशान लगाछ, उनेरि संख्या एक लाख चौवालीस हजार छी। यो लोग इस्राएल का सब बारा कुलून में भटे छ्या।

⁵ स्वर्गदूतून ले यहूदा का कुल में भटे बारा हजार लोगून में मुहर लगाछ, रूबेन क कुल में भटे बारा हजार लोगून में मुहर लगाछ, गाद के कुल में भटे बारा हजार लोगून में मुहर लगाछ,

⁶ आशेर कुल में भटे बारा हजार लोगून में मुहर लगाछ, नप्तालीक कुल में भटे बारा हजार लोगून में मुहर लगाछ, मनश्शे कुल में भटे बारा हजार लोगून में मुहर लगाछ,

⁷ शमौन कुल में भटे बारा हजार लोगून में मुहर लगाछ, लेवी कुल में भटे बारा हजार लोगून में मुहर लगाछ, इस्साकार कुल में भटे बारा हजार लोगून में मुहर लगाछ,

⁸ जबूलून कुल में भटे बारा हजार लोगून में मुहर लगाछ, यूसुफ कुल में भटे बारा हजार लोगून में मुहर लगाछ, और बिन्यामीन कुल में भटे बारा हजार लोगून में मुहर लगा दी गै।

एक भौत ठूली भीड़

⁹ येका बाद मैंले देखछ्य कि लोगून की एक इतुक ठूली भीड़ छी कि कोई ले उनून नी गिन सकछ्यो। उन संसारै की हर जाति भटे, हर कुल में भटे, हर राज्य में भटे और भाषा का लोग छ्या। उन सिंहासन और मेम्‍ना का सामुनि ठाड़ छ्या। उनूनले सफेद कपाड़ा पैनिना का छ्या और हरेक आदिमी ले अपून-अपून हात में खजूरा हांगा पकड़िनाक छ्या जो कि एक उनार सम्मान को चिन छ्यो।

¹⁰ और यो भीड़ जोर-जोरले बोलभेरन कुंन मरैछी, “आ हम अपून परमेश्वरै की स्तुति करा, जो सिंहासन में विराजमान छै और आ हम उकी ले स्तुति करा, जैस मेम्ना कयी जाछो किलैकी उनी छन जिनूनले हमून हमार पापून का न्याय भटे बचाईना को छै।”

¹¹ और सब स्वर्गदूत, उ सिंहासन का, प्राचीनों का, और चार जीवित प्राणिन का चारू तरफ ठाड़ छ्या। फिर उनूनले सिंहासना का तरफ झुकभेरन परमेश्वर की अराधना करछ्य, और उनूनले क्योछ,

¹² “आमीन। हमार परमेश्वर, हम हमेशा तेरि महिमा करनू, तैंस धन्यबाद और आदर दीनू! हम माननू कि तै पुरी रीति ले ज्ञानवान छै, और शक्तिशाली छै, जो हमेशा खिन सब कामून करून में योग्य छै। आमीन।”

¹³ तब प्राचीनून में भटे एक ले मैंथैं क्योछ, “यो सफेद कपाड़ा पैनिना का को छन? और काँ भटे आयीना का छन?”

¹⁴ मैंले उथैं क्योछ, “हे मालिक, मैं नै जाणनू लेकिन तै जाण छै।” उले मैंथैं क्योछ, यो सफेद कपाड़ा पैनिना लोग उन छन जिनरी मौत भौत दुख सहन करना का कारण होईना की छी। यो उन लोग छन जिनूनले मेम्ना का बलिदाना का द्वारा परमेश्वर की नजर में अपूनास शुद्ध कर ली हैछ।

¹⁵ येक कारण उन परमेश्वरा का सिंहासना का सामुनि ठाड़ छन और उन हर बखत दिन और रात परमेश्वरा का घर में उकी सेवा करनान। उ जो सिंहासन में बैठिना को छै, उनार बीच रोलो और उनेरि देखभाल करोलो।

¹⁶ “उन फिर भुखा और प्यासा नी होलो; सूर्य उनून फिर कभै नी जलालो, नै कोई गर्मी उनून झुलसाली।

¹⁷ किलैकी मेम्‍ना जो सिंहासन का बीच में छै, उ उनेरि देखभाल करोलो, उसीकैं जसीकैं एक ग्वाला अपूनी भेड़ून की देखभाल करछो। उ उनून उ ताज पानि का झरना का पास ली जालो जो लोगून जीवन दीछो। और परमेश्वर उनार आँखून का आँसून पोछ भेरन उनार सब दुखून दूर कर द्योलो।”