प्रकाशितवाक्य 6 - सोरियाली नय्या नियम

सात मुहरून को खोलि जानो

¹ फिर मैंले देखछ्य कि मेम्‍ना ले उन सात मुहरून में भटे एक स खोलछ्य; और मैंले चार ज्यून प्राणिन में भटे एक स ध्यदूनै सुणछै। उकी आवाज गर्जन की नियाती तेज छी। उले क्योछ,“अब जा, अघिल बढ़।”

² तभै वाँ मैंस एक सफेद रंग को घोड़ो दिखाई दीछ, और उको सवार धनुष लीईना को छै: और ऊस एक मुकुट दीई ग्यो, और उ स्वर्ग भटे भ्यार धरती में न्हैग्यो, और उ एक विजेताक नियाती जीत खिन निकलछ्य और दुबार उई जीतोलो।

³ जब मेम्‍ना ले दुसरी मुहर खोलछ्य, तो मैंले दुसारा प्राणी स यो कुन सुणछ्य, “ अब जा, अघिल बढ़।”

⁴ और फिर एक और चमकदार लाल घोड़ो उ जाग भटे भ्यार आछ जाँ सिंहासन छ्यो। परमेश्वरे ले उक सवार स धरती में शान्ति उठूना को हुकुम दीछ, ताकि उन युद्ध में एक दुसरा स मार डालून। यो उद्देश्य खिन परमेश्वरे ले यो सवार स एक ठूली तलवार ले दीछ।

⁵ जब मेम्‍ना ले तिसरी मुहर खोलछ्य, तो मैंले तीसारा प्राणी स यो कुन सुणछ्य, “आ।” और तब मैंले देखछ्य कि एक कालो घोड़ो भ्यार आ र्योछ और उक सवारा का हात में एक तराजू छै।

⁶ मैंले सुणछ्य कि उन चार ज्यून प्राणिन का बीच भटे कोई बोलून मर्यो छ्यो जो एक आदिमी का नियाती छ्यो, “ऊँन वाला बखत में धरती में अकाल होलो और येक कारण एक दिन की मजूरी केवल एक किलो ग्यूँ और तीन किलो जौ मोल खिन काफी होलि। लेकिन तेल और अंगूर को रस की कमी नै होलि।”

⁷ और जब मेम्‍ना ले चौथी मुहर खोलछ्य, तो मैंले चौथ ज्यून प्राणी स यो कुन सुणछ्य, “आ।”

⁸ तब मैंले वाँ एक फीको पड़ीनाको हरिया रंगो को घोड़ो दिखाई दीछ; जो उमें बैठिनाको छ्यो, उको नाम मौत छ्यो, अधलोक उक पछिल-पछिल ऊँन मर्यो छ्यो, ऊस धरती में रूनवाला हरेक चौथाई लोगून मारना को अधिकार दीछ और उले उनून जैस तलवार ले, अकाल, महामारी और धरतीका जानवरून है ले मार डालून।

⁹ जब मेम्‍ना ले पाँचू मुहर खोलछ्य, तो मैंले वेदी का तलि उन लोगून आत्मान देखछ्य जिनून मार डाली ग्योछ किलैकी उनूनले परमेश्वरा का वचन को प्रचार करिना को छ्यो और उन अपून अंगीकार वापस नै मुड़िना का छ्या कि यीशु उनोरो प्रभु छै।

¹⁰ और उनूनले जोरले धधया भेरन परमेश्वर थैं क्योछ, “हे पवित्र और सच्चा प्रभु; तै धरती में रूनवालान उन बुरा लोगून दण्ड दीन में इतुक ज्यादा देर किलै करून मरैछ? हम बिनती करनू कि तै उन लोगून का ब्यवहार को बदला ले जिनूनले हमून मार डालछ्य।”

¹¹ उनूनमें भटे हरेक स एक सफेद कपाड़ा दीई ग्यो। और परमेश्वरेले उनूनथैं क्योछ, “एल आराम करा, किलैकी आजि ले तुमार कुछ दगड़िया और तुमार विश्वासी भाई छन जिनून तुमार नियाती मार डाली जालो। जब मारी जानवालान की संख्या पुरी हो जालि, तभै मैं बदला ल्यूलो।”

¹² जब मेम्‍ना ले छठवीं मुहर खोलछ्य, त मैंले देखछ्य कि एक भौत ठूलो भूचाल भ्योछ; सूर्य को रंग कालो कामोलो जसो कालो रंग में बदल ग्यो और पुर चंद्रमा को रंग खून को जसो लाल हो ग्यो।

¹³ तारा आकाश भटे धरती में इसीकैं खितीनान जसीकैं रूख में भटे कच्चा फल खितीनान, जब तेज हवा उ रूख स हिलूछी।

¹⁴ आकाश इसो गायब हो ग्यो जसकै कागज स मोड़ दी ग्यो हो; और सब पहाड़ और समुन्द्र में सब टापून ले अपून जाग बदल दीयान।

¹⁵ येको नतीजा यो भ्योछ कि धरतीका सब लोग, जिनूनमें राजा, प्रधान, अधिकारी, धनवान, ताकतवर लोग और हर एक आजाद मनुष्य शामिल छन, जो पहाड़ून की गुफान और काठान में जाभेरन लुकियान;

¹⁶ और पहाड़ून, और काठान थैं कुंन लाग्यान, “हमून में खिती जा और हमून उ है लुका ली; ताकि उ जो सिंहासन में बैठिना को छै, हमून देख नै सको और मेम्ना का दण्ड भटे बच सका।”

¹⁷ किलैकी उ भयानक दिन आग्योछ जब परमेश्वर और मेम्ना सबून दण्ड द्योलो, और कोई ले यो दण्ड भटे नी बच पालो।