प्रकाशितवाक्य 4 - सोरियाली नय्या नियम

स्वर्ग में अराधना

¹ म्यारा इन सब बातुन का देखना का बाद, मैंले स्वर्ग में एक द्वार खुलीना को देखछ्य, और फिर मैंले उई पैलि वाली आवाज सुणछ्य जो कि एक तुरी की आवाज जसी छी। उले मैंथैं क्योछ, “म्यारा पास याँ मलि अ, और मैं उन बातुन तैंस देखूलो, जिनोरो इन बातुन का बाद पुर हुनो जरूरी छै।”

² त उई बखत पवित्र आत्मा मैंमें आग्यो, और मैंले स्वर्ग में एक सिंहासन में कैसे बैठिना को देखछ्य।

³ जो आदिमी वाँ बैठिना को छ्यो उ एक चमकदार यशब माणी का जैवरको को जसो और चमकदार लाल माणिक्य की नियाती चमकून मरैछ्यो। सिंहासन का चारू तरफ एक मेंघधनुष छ्यो जो चमकीला हरिया पन्ना की नियाती चमकून मरैछ्यो

⁴ उ सिंहासन का चारू तरफ चौबीस और सिंहासन छन। और इन सिंहासनून में चौबीस प्राचीन सफैद कपाड़ा पैन भेरन बैठिना का छन, और उनार ख्वारान में सुनाक मुकुट छन।

⁵ उ सिंहासन में भटे बिजली और गर्जन निकलून मरैछ्या, और सिंहासन का सामुनि सात दीया जलून मरैछ्या जो परमेश्वरा का सात आत्मा छन।

⁶ उ सिंहासना का सामुनि एक फर्श छ्यो जो समुन्द्रो को जसो चौड़ो और काँच जसो साफ छयो। और उ ठूलो सिंहासन उन सबून का बिल्कुल बीच में छ्यो, और उक चारू तरफ मैंले चार प्राणी देख्यान, जिनारा आंग पुर तरीका ले आँखान ले ढकीना का छ्या।

⁷ इन ज्यूना प्राणिन में भटे पैलो प्राणी बाघ को जसो दिखाई दीन मरैछ्यो और दुसोरो प्राणी गोरूक बच्छा को जसो छै, तीसोरो प्राणी को मुँख आदिमी को जसो छै, और चौथो प्राणी उड़ून वालो गरुड़ को जसो छ्यो।

⁸ और चारू प्राणिन का छः-छः पंख छन, और उनार आंग में चारू तरफ आँखा छ्या, याँ तक कि उनार पंखून का भितर ले आँखा छ्या और उन रात-दिन बिना आराम करिना का यो कुनै रूनान, “पवित्र, पवित्र, पवित्र प्रभु सर्वशक्तिमान परमेश्वर! और उ उई परमेश्वर छै जो हमेशा भटे छयो और ऐल तक जो ऊँनवाला छै।”

^9-10 जो सिंहासन में बैठिना को छै, उई छै जो हमेशा-हमेशा खिन ज्यूना छै। उ ज्यूनो प्राणी ऊस महिमा और आदर और धन्यवाद दीनान। त चौबीस प्राचीन उनार सामुनि खिती जानान और उकी अराधना करनान। उन यो कैभेरन अपूनो-अपूनी मुकुट खोलभेरन सिंहासन का सामुनि डाल दीनान,

¹¹ “हे हमार प्रभु परमेश्वर, तैले सब चीजून बनाईना को छै। तेरि इच्छा का अनुसार, उन बनाई ग्यान और उन अस्तित्व में छन। योई कारण तैं महिमा और आदर और सामर्थ का योग्य छै।”