प्रकाशितवाक्य 21 - सोरियाली नय्या नियम

नय्या स्वर्ग और नय्या धरती

¹ फिर मैंले एक नय्या स्वर्ग और एक नय्या धरती देखछ्य, क्याखिनकि पुरानो स्वर्ग और धरती अब नी छ्या। और अब समुन्द्र ले नी छ्यो।

² येक बाद फिर मैंले पवित्र शैहर स ले देखछ्य, जो कि नय्या यरूशलम शैहर छै, जो स्वर्ग भटे परमेश्वरा का तरफ भटे तलि ऊनमर्योछ। उ शैहर स एक ब्योलक नियाती तैय्यार करि ग्योछ, जैक कपाड़ा पैनाई ग्यान और सजाई-धजाई ग्योछ और जो ब्योलो थैं ब्या करून खिन तैय्यार छै।

³ फिर मैंले एक आवाज सुणछ्य जो परमेश्वरा का सिंहासन भटे जोरले बोलछ्य, “देख, अब परमेश्वरा का लोगून का बीच में अपूनो घर बनूलो। उन उनार दगाड़ रौल, और उन उनार लोग होला, परमेश्वर खुद, उनून अपून लोगूनका रूप में स्वीकार करोलो और उ उनार दगाड़ रोलो, और उन ले ऊस अपून परमेश्वरा का रूप में स्वीकार कराला।

⁴ परमेश्वर उनार आँखान भटे सब आँसून पोछि द्याला; और कोई ले कभै दुख महसूस नी कराला। रौला नै, पिड़ो को अनुभव नी कराला, और नै मौत रोलि, किलैकी पुरान संसारे की सारी चीज गायब हुनै रोलि।”

⁵ तब सिंहासन में बैठिना का आदिमी ले क्योछ, “देखा, मैं सब कुछ नय्या करून मर्यू।” फिर उले मैंथैं क्योछ, “इन बातुन लिख लै, क्याखिनकि जो मैं कुछूँ तैं उमें विश्वास कर सकछै, यो बात जरूर पुरी होलि।”

⁶ फिर उले मैंथैं क्योछ, सब बात पुरी हो ग्यान। “मैं अल्फा और ओमेगा, पैलो और अन्त छूँ। जो कोई ले पानि तिस्सो छै, मैं ऊस उ पानि का स्त्रोत भटे फिरीमें पानि पिन खिन द्यूलो जो अनन्त जीवन दीछो।”

⁷ उन लोग जो दुष्ट ताकतून हरूनान, उई मैंथैं इन सब आशीषून प्राप्त करोलो और मैं उको परमेश्वर हुंलो और उ मेरो च्योलो होलो।

⁸ लेकिन उन जो सताव का डरले मैंस त्याग कर दीनान और जो मैंमें भरोस करून छोड़ दीनान, उनून गन्धक का आग में खित दी जाला। इसीकैं उनूनले जो बुरो करनान, और खून करनान, और ब्यभिचार करनान, और अपून दगड़ियान का प्रति जादू-टोना करनान, और मूर्तिन की पुज करनान, और सब झूठ बोलूनवालान, उनूनले गन्धक का आग में डाल दी जाला। यो दुसरी मौत छै।

नय्या यरूशलम शैहर

⁹ फिर जिन सात स्वर्गदूतून में भटे एक ले जिनूनले मनुष्य जाति में सात आखरी मुसिबतुनले भरिनाका सात कटोरा खड़ाईनाक छ्या, मैंथैं बात करछ्य, उले क्योछ, याँ अ, मैं तैंस ब्योलि देखूलो जैको जल्दी ही मेम्ना का दगाड़ ब्या हो ज्यालो।

¹⁰ तब पवित्र आत्मा की मद्दत ले, स्वर्गदूत मैंस एक ठूलो पाहाण में ली ग्योछ, और पवित्र शैहर नय्या यरूशलम स स्वर्ग भटे परमेश्वरा का पास भटे उतरून देखछ्य।

¹¹ परमेश्वरा का तरफ भटे मिलून वालो तेज उज्याला ले नय्या शैहर चमकून मर्यो छ्यो, और को उज्यालो भौत कीमती ढ़ुगो, मतलब यशब नामक कीमती ढ़ुगा की नियाती चमकून मरेछी और काँचाक नियाती साफ छ्यो।

¹² शैहरा चारों तरफ एक भौत ऊँच्ची दिवाल छी, उ दिवाल में बार फाटक छ्या और उनूनमें भटे हरेक फाटकून में एक स्वर्गदूत को पहरा छ्यो; और उन फाटकून में इस्राएला का बार कुलुको नाम लिखीना का छ्या।

¹³ शैहरा का हरेक दिशा में तीन-तीन फाटक छ्या, पूरब में, पश्चिम में, उत्तर में और दक्षिण में।

¹⁴ उनूनले शैहरा की दिवाल बार ठूला-ठूला ढ़ुगान का मलि में बनाईनाकि छी। और हरेक ढ़ुगा में मेम्ना क बार प्रेरितून का नाम लिखीनाका छ्या।

¹⁵ उ स्वर्गदूत जो मैंथैं बात करूनमर्योछ छ्यो, उक पास नगर और उक फाटकून और उकी दिवालस नापुन खिन एक सुना की छड़ी छी।

¹⁶ उ शैहरा का चार कुना छ्या और चारों कुना एक समान छ्या। स्वर्गदूतले अपून नापुन वाली छड़ी ले शैहर स नापछ्य; उकी लम्बाई द्वी हजार चार सौ किलोमीटर छी। उकी चौड़ाई और ऊँचाई उकी लम्बाई की जतुक छी।

¹⁷ उले शैहरा का दिवाल ले नापछ्य; उकी ऊँचाई और चौड़ाई लगभग छियासठ मीटर छी। जै नापो को स्वर्गदूत ले इस्तमाल करछ्य, उ आदिमीन का द्वारा इस्तमाल करि जानवाला नापा का समान छै।

¹⁸ शैहर चोखा सुना ले बनाई को छ्यो जो काँचा का नियाती चमक छ्यो, उकी दिवाल, यशब नामक कीमती ढ़ुगा ले बनिनाकी छी।

¹⁹ दिवालकि नींव हरेक तरीका ले कीमती ढ़ुगा ले सजाईना की छी, पैलि नीवं यशब की, दुसरी नीलमणी की, तिसरी लालड़ी की, चौथ मरकत की,

²⁰ पाँचवी गोमेदक की, छंटु चमकदार लाल माणिक्य की, सतूँ पीतमणि की, अठूँ पेरोज की, नवूं पुखराजा की, दसूँ लहसनिए की, ग्यारू धुम्रकान्त की, बारू याकूत की छी।

²¹ शैहरा का बार फाटक बार मोतिक बनिनाकी छ्या, हरेक फाटक एक्कै मोतिले बनिनाकी छ्या। और शैहर की सड़क, उन चोखा सुना ले बनाईनाकि छी जो काँचा की नियाती चमकछी।

²² मैंले उमें कोई मन्दिर नै देखियो, क्याखिनकि सर्वशक्तिमान परमेश्वर और मेम्ना उ शैहर में छै। येक कारण वाँ मन्दिरे की कोई जरूरत नाहातिन।

²³ उ शैहर स उज्याला खिन सूरज या चाँद की जरूरत नाहातिन। क्याखिनकि उ शैहर में परमेश्वर और मेम्ना का चमके ले उज्यालो छै।

²⁴ शैहर में चमक, संसार में रूनवाला सब लोगून उज्यालो दीछो और संसार में सब राजा अपून-अपून धन-दौलत स उ शैहर में ल्याला।

²⁵ उ शैहरा का फाटक दिन भर खुलिनाक रूनान। उन कभै बन्द नै हुना क्याखिनकि वाँ कभै रात नी होलि।

²⁶ संसारा का लोग संसार सारी खुबशुरत चीजून और संसारा का लोगून की धन-दौलत स उ शैहर में ल्याला।

²⁷ और कोई ले अशुद्ध चीज उ शैहर में प्रवेश नी करली। कोई ले जो गन्दा काम करनान या झूठ बोलनान वाँ प्रवेश नी कराला। वाँ केवल उनी लोग प्रवेश कर सकनान जिनारा नाम जीवनै की किताब में लिखी ग्यान, यो उ किताब छै जैमें उन लोगून का नाम लिखीनाका छन जिनारा पास अनन्त जीवन छै।