प्रकाशितवाक्य 20 - सोरियाली नय्या नियम

हजार सालो को राज

¹ फिर मैंले एक स्वर्गदूत स स्वर्ग भटे उतरून देखछ्य, जैका हात में चाँबी दी गैछ जो उ गैरा गड्डा स खोल सकछो और एक ठूली जंजीर छी।

^2-3 और उले उ अजगरस, मतलब पुरान स्यापस जैस शैतान ले कयी जाछो, झपटभेरन पकड़ लीछ। उले ऊस बाँदि भेरन गैरा गड्डा में खिती दीछ, और द्वार बन्द कर दीछ और उमें मुहर लगा दीछ ताकि ऊस एक हजार साल खोलि नै जौ। येक कारण, उ दौरान, शैतान एक हजार साल तक लोगून ध्वाका नै दी सको। उक बाद, ऊस फिर थ्वाड़ा देर खिन आजाद करि जालो।

⁴ उक बाद मैंले सिंहासन देख्यान, और जो लोग उन सिंहासनून में बैठिना का छ्या उनून राज्य करना को अधिकार दीई ग्योछ। मैंले उन लोगून की आत्मान ले देखछ्य, जिनारा ख्वारा काट दी ग्यान किलैकी उनूनले यो क्योछ कि यीशु उनोरो प्रभु छै, और उन परमेश्वरा का वचन में विश्वास करछ्या। उन लोगून ले जानवर या उकी मूर्ति पूजा नै करि, उनूनले अपून कपाल या हातून में उ जानवरै की छाप ले नै लागायी। इन लोग फिर ज्यून हो ग्या और एक हजार साल तक मसीह का दगाड़ मिलभेरन राज्य करछ्य।

^5-6 इन लोग ज्यून करि जान में सबून है पैला छन, और इन खास तरीका ले धन्य और पवित्र छन। दुसरी मौत की उनूनमें कोई अधिकार नाहातिन। उन परमेश्वर और मसीह का याजक होलो, और उनार दगाड़ एक हजार साल तक राजा कराला। यो एक हजार साल है पैलि कोई दुसारा मरिनाका लोगून ज्यून नी करि जाला।

शैतानो को बिनाश

^7-8 जब हजार साल पुर हो जाला त शैतान स कैद भटे छोड़ दी जालो, और उ उन देशून ध्वाका दीन खिन भ्यार आ जालो जो पुर संसारा फैलीना का छन। इन देशून गोग और मगोग कयी जाछो। शैतान उन सबून एक जाग में जामा करोलो जाँ उन लड़ाई कराला। उन भौत ज्यादा होला इतुक कि कोई उनून समुद्रा का बालू कणून की नियाती नी गिन सकाला।

⁹ शैतान की सेना पुर संसार में फैल गै। और उनूनले उ शैहर स घेर लीछ, जैस परमेश्वर प्रेम करछो, जाँ उक लोग रूछ्या। लेकिन परमेश्वर की तरफ भटे, स्वर्ग भटे आगो भ्यार आछ और पुरी सेना नाश कर दीछ।

¹⁰ येक बाद शैतान पकड़ी जालो, जैले देश-देशा का लोगून भरमाछ और ऊस गन्धक की आग में खित दी जालो, मतलब उ आग में जो झील की नियाती ठूली छै। जानवर और परमेश्वरा का तरफ भटे झूठ्ठा बात बतून वाला स पैलिकैं खित दी ग्योछ। और वाँ उ आग में उनून हमेशा खिन दिन और रात सताई जालो।

ठूलो सफेद सिंहासन और आखिरी न्याय

¹¹ फिर मैंले एक सफेद सिंहासन देखछै जैमें परमेश्वर बैठिना को छ्यो। लेकिन वाँ जाँ परमेश्वर बैठिनाको छ्यो, वाँ धरती और स्वर्ग सब गायब हो ग्या, और केले लै उनून फिर नै देख्यो।

^12-13 और मैंले मरिना का लोगून उ सिंहासन का सामुनि ठाड़ देखछै, मतलब उनून जो खास और आम लोग छन। और समुन्द्र ले अपूना मुर्दान दी द्याला जो उमें छ्या, और सब मरिना का लोग, और अधोलोक और धरती ले अपूना-अपूना मुर्दान दी द्याला। और किताब खोलि ग्यान, जैमें जीवनै की किताब ले शामिल छै। और किताबून में लिखीना का बातुन का अनुसार उनोरो न्याय करि ग्यो, उक अनुसार जो उनूनले करिना को छ्यो। उन सबून को उनार कामून का अनुसार न्याय करि ग्यो।

^14-15 उन सब लोग जिनारा नाम जीवनै की किताब में नी लिखीना का छ्या, उनून आगा की झील में खित दी ग्यो। येक बाद, अब मौत नाहातिन, अब मरिना वालान खिन कोई जाग नाहातिन, किलैकी उन सब लोग जिनारा नाम जीवनै की किताब में नी लिखीना का छ्या उनून आगा की झील में खित दी ग्योछ। यैस दुसरी मौत कई जाछो, जो कि आगा की झील में सजा छै।