प्रकाशितवाक्य 17 - सोरियाली नय्या नियम

ठूली वेश्या और लाल रंगो को जंगली जानवर

¹ जिन सात स्वर्गदूत का पास सात कटरा छ्या, उनूनमें भटे एक ले आभेरन मैंथैं यो क्योछ, “याँ अ, मैं तैंस देखूलो कि परमेश्वर कसकैं उ ठूली वेश्या स दण्ड द्योलो, जो एक इसा जाग में बैठिना की छै जो भौत पानि का मलिमें बैठिना की छै।

² जैका दगाड़ संसारा का राजान ले ब्यभिचार करछ्य, और संसारा का लोग उक ब्यभिचार की मदहोश करून वाली शराब ले धुत हो गैछ्या।”

³ तब पवित्र आत्मा की मद्दत ले, स्वर्गदूत मैंस बिरान जागा खिन ली ग्योछ, मैंले वाँ एक स्यैनि स देखछै जो लाल रंगा का जानवर में बैठिनाको छी। उक सात ख्वारा और दस सींग छ्या। उको आंग उन नामेंले ढ़किनाक छ्या जो परमेश्वरो को अपमान करनान।

⁴ यो स्यैनि बैंगनी और लाल रंगा का कपाड़ा पैनिना की छी, उले अपूनो आंग सुना का गहना ले, कीमती ढ़ुगा ले और मैंहगा मोतिन ले सजीना कि छी, अपून दैंन हात में उले शराब ले भरिना को एक सुनाको कटरो पकड़ीनाको छ्यो, जो उक बुरा कामून और ब्यभिचार की गन्दगी ले भरिना को छ्यो।

⁵ उक कपाल में एक नाम लिखीनाको छ्यो जो गुप्त छ्यो। उमें यो लिखीना को छ्यो, “महान देश बेबीलोन वेश्यान की और संसारे की सब बुरी चीजून की ईजा छूँ।”

⁶ और मैंले देखछै कि उ स्यैनि परमेश्वरा का पवित्र लोगून को खून और जो लोग यीशु का गवा छ्या उनोरो खून पीनाले नशा में छी जिनून लोगून ले मार डालछ्य किलैकी उन यीशुका प्रति विश्वासयोग्य छ्या। मैं ऊस देखभेरन हैरान हो गयुं।

⁷ उ स्वर्गदूतले मैथैं क्योछ, “तैं हैरान जन हो। मैं यो स्यैनि, और उ जानवरै स, जैमें उ बैठिनाको छै, और जैका सात ख्वारा और दस सींग छन, तैंस उ गुप्त बातों को भेद बतुलो।”

⁸ जो जानवर स तैले एल देखछ्य, एक बखत ज्यून छ्यो, लेकिन अब ज्यून नाहातिन; उ गैरा गड्डा भटे भ्यार उनवालो छै और परमेश्वर ऊस पुर तरीका ले नाश कर द्योलो; और संसारा का लोग जिनारा नाम संसार बनून है पैलि जीवनै की किताब में नै लिख रै, उन सब हैरान हो जाला जब उन यो जानवरै स देखाला। जो एक बखत ज्यून छ्यो; अब उ ज्यून नाहातिन; लेकिन उ फिर वापस आ जालो।

⁹ येस समझून खिन ज्ञान की जरूरत छै, जानवर का सात ख्वारा उ शैहरा का सात पहाड़ून देखूछो जाँ यो स्यैनि राज करछी। उन सात राजान ले देखूछो।

¹⁰ उनूनमें पाँच त पैलि मर चुक ग्यान, और उनूनमें भटे एक ऐल ले छै, आखरी वालो एल तक नै आर्यो। लेकिन जब आलो, त उ सिर्फ थ्वाड़ा बखत खिन राज्य करोलो।

¹¹ उ जानवर जो भौत बखत पैलि रूछ्यो, और अब यो बखत नाहातिन, उ आठवाँ राजा छै। लेकिन उ आठवाँ राजा पैलि सात राजान में भटे एक छै, और अन्त में राजा स जरूर हमेशा की दण्ड दीई जालो।

¹² उ दस सींग जो तैंले देखीना का छ्या, उन दस राजा देखूनान जिनूनले ऐल तक राज्य शुरू नै कर रैछ। उन दस राजान उ जानवर का दगाड़ राज्य करना अधिकार पाला, लेकिन उको राज्य थ्वाड़ा बखत खिन होलो।

¹³ इन सबै दस राजान को एक्कै मक्शद छै, और उन अपूनी-अपूनी शक्ति और अधिकार उ जानवर स दी द्याला।

¹⁴ जानवर और दस राजान ले मेम्ना का बिरोध में लड़ाई लड़ाला, लेकिन मेम्ना उनून हरा द्योलो, किलैकी उ प्रभुन को प्रभु और राजान को राजा छै, उक लोग उन छन जिनून परमेश्वर ले बुला रैछ और चुन रैछ, और जो उक प्रति वफादार छन।

¹⁵ फिर स्वर्गदूत ले मैंथैं यो ले क्योछ, “जो पानि तैले पैलि देख्यान, जैमें उ ठूली वेश्या बैठिना की छी, उन पुर जाति का लोगून, और देशून और भाषान देखूनान।”

¹⁶ उ बखत आलो जब जंगली जानवर उन दस राजान का दगाड़ जो उक दगाड़ छन, उ वेश्या भटे नफरत कराला जो उमें बैठिना की छै। उन उमें हमला कराला, ऊस नंगो कराला, और उको माँसो को हिस्सा खा जाला, और बाकि स आग में जला द्याला।

^17-18 उ स्यैनि स जैस तैले देखछ्य, उ यो ठूलो शैहर छै जो संसारा में सबै राजान में राज्य करछो। यो चीज उक दगाड़ भ्यान, किलैकी परमेश्वर ले अपून मक्शद स पुरो करून खिन उनार मन में यो बात डालछ्य। योई कारण छै कि उनूनले अपूनो अधिकार जानवर स दी दीछ कि उ राज्य करो, जब तक कि उ सब पुरो नै हो ज्यो जो परमेश्वरेले कयीना को छ्यो।