प्रकाशितवाक्य 16 - सोरियाली नय्या नियम

परमेश्वरा का प्रकोप का सात कटोर

¹ उक बाद फिर मैंले मन्दिर में भटे एक तेज आवाज में उन सात स्वर्गदूतून थैं यो कुन सुणछ्य, “जा, संसारा का लोगून में परमेश्वरा का तरफ भटे दण्ड स खड़िया दी जो उन सात कटोरान में छै।”

² येक कारण पैल स्वर्गदूत ले, जो कुछ ले उ कटोर में छ्यो ऊस धरती में खड़िया दीछ। येको नतीजा यो भ्योछ कि उन लोगून में भयानक और पिड़ान वाला फोड़ा निकल्यान, जिनूनमें पैलि जानवर की छाप लगाईना छी और जिनूनले उकी मूर्ति की पूजा करिना की छी।

दुसोरो कटरो

³ दुसारा स्वर्गदूत ले, जो ले उ कटोर में छ्यो ऊस समुद्र में खड़िया दीछ। और तुरन्त समुद्र एक मरिना का आदिमी को खून को जसो हो ग्यो, और येक कारण समुद्र में सबै प्राणी मर ग्या।

तीसोरो कटरो

⁴ तीसारा स्वर्गदूत ले जो ले उ कटोर में छ्यो ऊस नदीन में खड़िया दीछ। और उन खून बन ग्या।

⁵ और मैंले उ स्वर्गदूत स जैस पुर पानि का मलिमें अधिकार छै, ऊस परमेश्वर थैं यो कुन सुणछ्य, “हे पवित्र परमेश्वर, उ उई परमेश्वर छै जो हमेशा छ्यो, तैंस इसकैं न्याय करना को अधिकार छै।

⁶ किलैकी उनूनले त्यारा लोगून और तेरो संदेश दिनवाला लोगून मार डालछ्य और उनोरो खून बगाछ, येक कारण अब तै उनून खून पिन खिन दीछै। योई उनून खिन ठीक फल छै।”

⁷ मैंले फिर कैसे वेदी भटे यो कुंन सुणछ्य, होई हे सर्वशक्तिमान प्रभु परमेश्वर, यो सच्ची छै कि जसकैं तै लोगून सजा दीछै उ सही और सच्ची छै।

चौथो कटरो

⁸ चौथ स्वर्गदूत ले जो ले उ कटोर में छ्यो ऊस सूरज में खड़िया दीछ, और सूरज की गर्मी ज्यादा बढ़ गै और येक कारण लोग उ भौत गर्मी ले जल ग्या।

⁹ लोग तेज गर्मी ले जल ग्या, उनूनले परमेश्वरै की निन्दा करछ्य किलैकी उई छ्यो जैका पास बिपत्तिन में अधिकार छ्यो। उनूनले आजि ले अपून पापून है मन नै फिरायो, उनूनले आजि ले परमेश्वरै की महिमास स्वीकार नै कर्यो।

पचूँ कटरो

¹⁰ पचूँ स्वर्गदूत ले, जो ले उ कटोर में छ्यो ऊस पैल जानवरक सिंहासन में खड़िया दीछ, और येको नतीजा यो भ्योछ कि पुर राज्य में अन्यारो छा ग्यो। लोगून ले उ भौत पीड़ाका कारणले जो उनूनले मसशूस करछ्य अपूनो जिबोड़ो काटून लाग्यान,

¹¹ और अपून तखलीफून और फोड़ान का कारण स्वर्गक परमेश्वरै की बुराई करून लाग्यान; लेकिन उनूनले अपून बुरा कामून है मन नै फिरायो जो उन करून मरैछ्या।

छयूँ कटरो

¹² छयूँ स्वर्गदूत ले, जो ले उ कटोर में छ्यो ऊस भौत ठूली नदी फरात में खड़िया दीछ, येको नतीजा यो भ्योछ कि उ नदी को पानि सुखग्यो और यो कारण पूरब दिशान का राजा अपूनी सेना लीभेरन उ नदी स पार कर सकून।

¹³ येक बाद मैंले फिर तीन भूतून देखछ्य जो भेकुनो जसो देखीछ्या। एक भूत अजगरा का मुँख भटे भ्यार आछ, दुसोरो भूत पैला जानवरक मुँख भटे, और तीसोरो भूत दुसारा जानवरक मुँख भटे भ्यार आछ, मतलब उ जैले झूठ्ठो संदेश दीईना को छ्यो।

¹⁴ इन भूतून का पास चमत्कार करना की शक्ति छी और उनूनले जाभेरन उन लोगून जामा करछ्य जो यो संसारा का सारा देशून में राज्य कर छ्या ताकि उन सर्वशक्तिमान प्रभु परमेश्वरा का महान दिन में उक खिलाफ लड़ाई लड़ून खिन जून।

^15-16 भूतून ले राजान और उनेरि सेनान उ जाग में जामा करछ्य जैस इब्रानी भाषा में हर-मगिदोन कहलाईछो। येक कारण प्रभु यीशु ले क्योछ, “यो बात सुणा। मेरो वापस उनाको दिन चोरो उनाक जसो अचानक होलो। धन्य छन उ आदिमी जो म्यारा उनाक बखत जागिना को हो, और अपून कपाड़ान तैय्यार राखछो तब उन नंगा नी हुन और कोई ले उनून शर्मिदा नी करोलो चाहे उन भ्यार भौत लोगून का बीच में जून।”

सतूँ कटरो

¹⁷ सतूँ स्वर्गदूत ले, जो ले उ कटोर में छ्यो ऊस हवा में खड़िया दीछ। और मैंले, स्वर्ग का मन्दिर का भितर भटे परमेश्वरा का सिंहासन में भटे कैसे जोरले यो कुंन सुणछ्य, “पुरो हो ग्यो!”

¹⁸ फिर उई बखत चाल चमकछ्य, और गड़गड़ाट और बादल गर्जन लाग्यान और एक इसो भयानक भूचाल आछ, जब भटे आदिमी संसार में रून मर्योछ, तब भटे इसो बिनाशकारी तरीका ले भूचाल कभै नै आयो।

¹⁹ येका बाद बेबीलोन को ठूला देश तीन टुकूड़ा में बाँणि ग्यो, और पुर संसारा का सब शैहर नाश हो ग्या। किलैकी परमेश्वर ले उ पुरो करछ्य जैको उले बाबुल का लोगून दण्ड का बारिमें वादा करिना को छ्यो। येस परमेश्वरा का तरफ भटे कठोर दण्ड दीई जालो। यो इसो होलो जसीकैं उनूनले बिन पानि मिलीना की शराब पीईना की हो, जैस परमेश्वरेले खुद उ प्याला में खड़िया रैछ जो उक गुस्सा देखूछो।

²⁰ उ बखत समुद्रा का सब टापू अपून जाग है गायब हो ग्या, और पहाड़ून को पत्तो नै चल्यो।

²¹ ठूला-ठूला ओंला आकाश भटे लोगून में पड़ीयान, जैको हरेक ओंला को वजन लगभग पचास किलो छ्यो। येक कारण कि यो बिपत्ति भौत भारी छी, लोगून ले ओंलान की बिपत्ति का कारण परमेश्वरै की बुराई करछ्य।