प्रकाशितवाक्य 14 - सोरियाली नय्या नियम

मेम्ना और एक लाख चौवालीस हजार लोग

¹ येक बाद, मैंले कुछ और देखछ्य, मैंले सिय्योन पहाड़ में मेम्ना स ठाड़ होईना को देखछ्य, और उक दगाड़ एक लाख चौवालीस हजार लोग छ्या, उनार कपाल में मेम्ना को नाम और उक बबा को नाम लिखीना को छ्यो।

² और मैंले स्वर्ग में भटे केकी आवाज सुणछ्य जो पानि की झरना नियाती तेज बादल गर्जना आवाज नियाती तेज छी। जो आवाज मैंले सुणछ्य उ आवाज इसी छी, जसकैं लोग वीणा स बजून मर्या होलो।

³ एक लाख चौवालीस हजार (144,0000) लोग सिंहासना और चारू प्राणी और प्रचीनून का सामुनि ठाड़ छ्या; उन एक नय्या गीत गान मरेछ्या, जैस सिर्फ उनी सिख सकछ्या। सिर्फ उनी छन जिनून परमेश्वर ले संसार में रूनवाला लोगून का बीच में भटे छुड़ाईना को छ्यो।

⁴ यो उन छन जो पवित्र जीवन जीनान। यो उन लोगून का जसा छन जिनूनले एक बार ले नाजायज रिश्ता नै बनायो और नै इनूनले कभै कोई चीज की पूजा करछ्य, यो सिर्फ मेम्ना की पूजा करनान जाँ काँई मेम्ना जाछो, इन लोग उक पछिल जानान। यो उन छन जो धरती में सब लोगून है अलग करि ग्यान। जसकैं लोग अपून गाड़ान फसल को निको हिस्सा परमेश्वर स दीनान उसीकैं यो लोग ले अपून जीवन स पुरी पवित्रता का दगाड़ परमेश्वर और मेम्ना स दीनान।

⁵ उनूनले कभै झूठ नै बोल्यो। उनूनमें के गलत नाहातिन।

तीन स्वर्गदूत की घोषणा

⁶ फिर मैंले एक स्वर्गदूत स आकाश का बीच में उड़ून देखछ्य, उ स्वर्गदूता का पास उ सुसमाचार छ्यो जो कभै नै बदलनो, उ संसार में रूनवालान लोगून खिन, हरेक जाति, और हरेक कुल, और सब भाषान में येकी घोषणा करछ्य।

⁷ उ जोर-जोरले कुंन मरैछ्यो, “परमेश्वर है डरा, और उकी महिमा करा, क्याखिनकि उको लोगून को न्याय करना को बखत आग्योछ। उकी अराधना करा, किलैकी उई छै जेलै स्वर्ग, और धरती और समुद्र और पानि का सोत बनायान।”

⁸ वाँ एक दुसोरो स्वर्गदूत छ्यो जो पैल वाला स्वर्गदूता का पछिल भटे यो कुंनै आछ, “नाश हो ग्योछ, यो बेबीलोन देश बुरी तरीका नाश हो ग्योछ। उले अपून ब्यविचार ले मदहोश करून वाली मदिरा ले धुत कर दीयान। जैको मतलब यो छै कि उले भौत भद्दो ब्यवहार करछ्य की उले सब जातिन मूर्तिन की पूजा करून सिखाछ। किलैकी उले उनून मूर्तिन की पूजा करून सिखाछ।”

⁹ फिर उक बाद एक और तीसोरो स्वर्गदूत जोर-जोरले यो कुंनै आछ, “जो कोई उ जानवर और उकी मूर्ति की पूजा करा, और अपून कपाल या हातून में उकी छाप लगा ली।”

¹⁰ तो उ परमेश्वरो को प्रकोप को मदिरा पिलालो, जो बिना मिलावट का उक गुस्सा का कटोरा में डाली ग्योछ, और पवित्र स्वर्गदूतून का सामुनि और मेम्ना का सामुनि आग और गन्धक का पीड़ में पड़ोलो।

¹¹ आगो को धुआँ जो उनून कष्ट द्योलो हमेशा तक आकाश में उठनै रौलो, और यो लोग जो पैलि जानवर और उकी मूर्ति की पूजा करछ्या, और उ जो उकी नाम की छाप लगूनान, उनून उ तखलीफ ले नै दिन में और नै रात चैन मिलोलो।

¹² किलैकी यो बात हुन वाली छन, परमेश्वरा का लोगून धैर्य राखून चैछो। पवित्र लोगून को धीरज येमें छै, यो उ लोग छन जो परमेश्वरा का हुकमून माननान और यीशु में विश्वास बना राखनान।

¹³ फिर मैंले स्वर्ग में कैसे बुलून सुणछ्य, और उले मैंथैं क्योछ, “इन बातुन याँ लिख। आज भटे, उन अब धन्य छन जो परमेश्वर में विश्वास करभेरन मर जानान।” तब पवित्र आत्मा येले सहमत भ्योछ और उले क्योछ। “यो सच्ची छै। उन धन्य छन किलैकी उन अपून सब मेहनत भटे आराम पाला, और जो काम उनूनले करिना का छन उखिन उनून ईनाम दीई जालो।”

धरती की फसल की कटनी

¹⁴ फिर मैंले एक सफेद बादल देखछ्य, और मैंले कैसे देखछ्य जो एक आदिमी को जसो छ्यो, जो उ बादल में बैठिना को छ्यो। उक ख्वारा में सुना को मुकुट छ्यो और हात में धारदार हत्यार छ्यो।

¹⁵ तभै मैंले एक आजि चौथ स्वर्गदूत स देखछ्य, जो परमेश्वरो को संदेश लीभेरन मन्दिर में भटे भ्यार आछ। उले बादल में बैठिनाका आदिमी जोर-जोरले धध्याभेरन क्योछ, “संसार में फसल तैय्यार छै, और फसल काटना को बखत आग्योछ। येक कारण अब अपूनी आँसी चलो, और फसल स काट।”

¹⁶ यो कारण उ आदिमी जो बादलून में बैठिनाको छ्यो, उले संसार में अपूनी आँसी ले काटून लागछ्य; और उले पुरी संसारै की फसल काटछ्य।

¹⁷ फिर एक आजि पचूँ स्वर्गदूत उ मन्दिर भटे भ्यार निकलछ्य, जो स्वर्ग में छै। और उक पास ले एक धारदार आँसी छी।

¹⁸ तभै मैंले एक आजि छयूं स्वर्गदूत स देखछ्य जो, जो वेदी में आगा ले धूप जलूना को जिमेदारी निभूछो। उले जोर-जोरले चिल्ला भेरन उ स्वर्गदूत थैं जैका पास धारदार आँसी छी उ क्योछ, “धरती में अंगूरा का गुच्छा पाक ग्यान! उनून अपून आँसी ले काट ले।”

^19-20 तब स्वर्गदूत ले उन अंगूरो धारदार आँसी ले काट दीयान जो धरती में छ्या और अंगूरून एक जाग में जाम करभेरन उले अंगूरून एक ठूला रसकुण्ड में डाल दीछ। येको मतलब यो छै कि परमेश्वर भयंकर सजा द्योलो। अंगूरून शैहर भटे भ्यार रसकुण्ड में निचोड़छ्य, और रसकुण्ड भटे जो खून निकलछ्य, उ इतुक गैहरो छ्यो, जतुनो कि घोड़ा को ख्वोरो हुछो जब ऊस लगाम ले पकड़ी जाछो। और तीन सौ किलोमीटर तक न्हैग्यो।