प्रकाशितवाक्य 13 - सोरियाली नय्या नियम

द्वी जानवर

¹ तब मैंले एक जानवर स समुद्र में भटे निकलून देखछय, जैका दस सींग और सात ख्वारा छ्या। उक सींगून में दस राजमुकुट और उक हरेक ख्वारान में परमेश्वरे की बुराई का नाम लिखीना को छ्यो।

² जो जानवर मैंले देखछ्य उ चिताको जसो छ्यो; और उक खुटा भालू का जसा और मुँख बाघो जसो छ्यो। और उ अजगर ले ऊस अपूनी ताकत दीछ और धरती में राज्य करना को अधिकार दीई ग्योछ।

³ उक ख्वारान में भटे एक ख्वारा में एक भौत ठूलो घ देखछ्य जो उक मौत को कारण बन सकछ्यो, लेकिन उको उ घ ठीक होग्यो, येक कारण संसारा का सब लोग ताजुब हो जाछो और उन उ जानवर पछिल-पछिल हिटून लागनान।

⁴ सब लोगून ले उ अजगर की पूजा करछ्य, क्याखिनकि उले उ जानवर स अधिकार दीईना को छ्यो, उनूनले उ जानवरै की ले पूजा करछ्य, और उनूनले क्योछ “कोई ले उ जानवरो को जसो ताकतवर नाहातिन। कोई ले उखिन नै लड़ सकूनो।”

⁵ उ जानवरै स डींग मारून और परमेश्वरै की निन्दा करूना को अधिकार छ्यो और ऊस बयालीस मैंनान तक राज करना को अधिकार दी ग्योछ।

⁶ जानवर ले परमेश्वरै की निन्दा करून शुरू कर दीछ, उक नामाका बिरोध में और स्वर्ग का बिरोध में बोलछो जाँ परमेश्वर रूछो, और उन सबून का बिरोध में जो स्वर्ग में रूनान।

⁷ ऊस यो ले अधिकार दीई ग्योछ कि उ परमेश्वरा का लोगून का दगाड़ लड़ौ, और उनून हारा सको, और ऊस हरेक कुल और लोग, भाषान और जातिन में अधिकार दी ग्योछ।

⁸ संसारा का सब लोग उकी पूजा करून लाग्यान। सिर्फ उनी लोगून ले उकी पूजा नै करि जिनारा नाम संसारा बनून है पैलि जीवन की किताब में लिखीना का छ्या। यो जीवन की किताब उ मेम्ना की किताब छै जैस बलिदान का रूप मारिना को छ्यो।

⁹ जो कोई यो बात स सुणछो जो मैं कुंन मरैयू, उ समझना की कोशिश करो।

¹⁰ जिन लोगून को कैद में जानो तय छै, उन जरूर कैद में डाली जाला, और जिन लोगून तलवार ले मारी जान छै, उनून तलवारे ले मारी जालो। येक कारण परमेश्वरा का लोगून को दुख सहन में धैर्य राखून चैछो और उमें विश्वास करून जारी राखून चैछो।

¹¹ फिर मैंले एक और जानवर स धरती में भटे निकलून देखछ्य, येका द्वी सींग छ्या जसा भेड़ा का हुनान। लेकिन जब उ बोलछ्य त उकी आवाज अजगर जसी छ्यी।

¹² यो दुसोरो जानवर उ पैला जानवरो को सब अधिकार इस्तमाल करछो, दुसोरो जानवर संसार और येमें रूनवालान थैं उ पैला जानवरै की पूजा करूछो, जैको मरन वालो घ ठीक होग्यो छ्यो।

¹³ यो दुसोरो जानवर चमत्कारा का काम देखूछ्यो, याँ तक कि लोगून का सामुनि आकाश भटे धरती में आगो बरसा दीछ्यो।

¹⁴ भौत लोग उ दुसारा जानवरक चमत्कारा का कामून देखभेरन ध्वाका खा ग्या जो पैला जानवरै की शक्ति ले देखूछ्यो। दुसारा जानवरक द्वारा लोगून थैं कयी ग्यो उन उ पैला जानवरै की पूजा करून खिन एक मूर्ति बना, जो तलवारै घायल करि गेछ्यो, लेकिन उ फिर चंगो हो गेछ्यो।

¹⁵ दुसारा जानवरै स पैला जानवरै की मूर्ति बनाभेरन ऊस ज्यूनो करना को हुकुम दीछ, ताकि पैला जानवरै की मूर्ति बोल सको और उन लोगून मरवा डालोलो जो उ जानवरै की मूर्ति पूजा नै करना।

¹⁶ और दुसारा जानवरै स नाना-ठूला, अमीर गरीब, जो मालिक छन और जो दास छन, सब लोगून मजबूर करछ्य कि उन पैला जानवरै नाम की छाप अपून दैन हात में या अपून कपाल में लगून।

¹⁷ सिर्फ उई लोग जिनूनमें यो छाप छी उन चीजून खरीद और बैच सकछ्या। उ छाप पैलि जानवरै की नामकी छी या उकी नामस बतून वाली संख्या छी।

¹⁸ येस समझून खिन ज्ञाने की जरूरत छै। लेकिन जैस ज्ञान छै, उ यो पतो लगा सकछो जानवरै की संख्या को मतलब की छै। क्याखिनकि यो एक आदिमी को नाम छै। यो संख्या छ: सौ छियासठ छै।