प्रकाशितवाक्य 11 - सोरियाली नय्या नियम

द्वी गवाह

¹ फिर मैंस नापूनखिन एक डंडा दीई ग्यो, और परमेश्वरेले क्योछ, “उठ और जा, म्यारा मन्दिरा का वेदी स नाप, और उन लोगून की गिनती कर जो मन्दिर में अराधना करून मर्यान।”

² लेकिन भ्यार वाला खाला स छोड़ी दीये, ऊस जन नाप किलैकी उ जो मैंमें विश्वास नै करना, उन बयालीस मैंनान तक म्यारा शैहर यरूशलम में राज्य कराला।

³ “और उ बखत मैं अपून द्वी गवान यो अधिकार द्यूलो कि उन एक हजार द्वी सौ साठ दिनून तक टाट ओढ़ी भेरन भविष्यवाणी करनै रून।”

⁴ इन द्वीवै जैतून का द्वी रूख और द्वी दीपदान छन, जो संसारा का प्रभु का सामुनि ठाड़ छन।

⁵ और अगर कोई उनून नुकशान पुजून चाछो, त उनार मुँख भटे आगो निकल भेरन उनार बैरिन भस्म करछी; और अगर कोई उनून नुकशान पुजून चालो त पक्का इसीकैं मार डाली जालो।

⁶ परमेश्वरेले उनून भविष्यवाणी दीना का दौरान बरखा स रोकना को अधिकार दीईना को छै, उनून सब पानि में अधिकार छै, कि ऊस खून बनून, और धरती में हर प्रकारै की भयानक बिपत्तिन करना को अधिकार ले मिलीना को छ्यो। उन जतुक बार चाँछ्या उतुक बार इसो कर सकनान।

⁷ जब उन द्वीवै गवा परमेश्वरो को संदेशो को प्रचार कर चूकाला, त उ जानवर, जो गैरा गड्डा में भटे निकलोल, उ उन द्वीवैन का दगाड़ लड़ोलो, उनून हरालो और मार डालोलो।

⁸ और उनार लाश उ ठूला शैहर यरूशलम का सड़कून में पड़ीना का रौला, जाँ उनोरो प्रभु सूली में चढ़ाई ग्योछ। यो शैहरा स चिना का रूप में सदोम और मिस्र नाम दीई ग्योछ, किलैकी यो शैहरा का लोग भौत बुरा छन, जसकैं सदोम और मिस्र देशाक रूनवाला लोग छ्या।

⁹ और सब कुल, और भाषा, और जातिन का सब लोग उन द्वी गवान की लाशून साढ़े तीन दिनून तक देखनै रौला, और उ कैसे ले उनेरि लाशून दफनूना को हुकुम नी दीन।

¹⁰ उनेरि मौत है पैलि, उन द्वी गवान ले बिपत्तिन का द्वारा लोगून परेशान करिना को छ्यो कि जब लोगून ले सुणछ्य कि उन मर ग्यान, त उन भौत खुश होग्या। इतुक की उन खुशी ले जशन मनून लाग्यान, और एक-दुसरा स ईनाम दीन लाग्यान।

¹¹ लेकिन साढ़े तीन दिना का बाद परमेश्वरेले उनूनमें अपूनी साँस डालछ्य और उन ज्यूना हो ग्या; और अपून खुटान में ठाड़ हो ग्या, और देखूनवाला लोग भौत ज्यादा डर ग्यो।

¹² येक बाद उन द्वीवै लोगून ले स्वर्ग भटे एक बोलून सुणछ्य, जैले उनून जोरले धध्याभेरन क्योछ, “याँ मलि आ!” जब उनार दुशमन देखून मरैछ्या, तब उन बादलून में चढ़भेरन स्वर्ग में न्हैग्या।

¹³ उई बखत यरूशलम शैहर में एक भौत ठूलो भूचाल आछ, और शैहर में घरून को दसवाँ हिस्सा खिती ग्यो; और उ भूचाल ले सात हजार लोग मरि ग्या, और जो लोग बच गैछ्या उन डरले रून लाग्यान और उ परमेश्वरै की महिमा करून लाग्यान जो स्वर्ग में छै।

¹⁴ यो दुसरी बिपत्ति को अन्त छ्यो; लेकिन आजि एक और छै जो जल्दी ऊँन वाली छै।

सातवीं तुरी

¹⁵ जब सतू स्वर्गदूत ले सतू तुरी बजाछ, त मैंले स्वर्ग में जोरले धध्यून सुणछ्य, संसारो में अब और कोई नाहातिन जो राज करो। केवल हमोरो प्रभु परमेश्वर और उको चुनिना को मसीह राज्य करोलो और उ हमेशा-हमेशा खिन राज्य करोलो।

¹⁶ और तब उन चौबीस प्राचीनून ले जो परमेश्वरा का सामुनि अपून-अपून सिंहासन में बैठिना छ्या, उन झुकभेरन यो कैभेरन परमेश्वरै की अराधना करभेरन,

¹⁷ यो कुंन लाग्यान, “हे सर्वशक्तिमान प्रभु परमेश्वर, उ परमेश्वर छै जो हमेशा छ्यो और जो उनवालो छै, हम तेरो धन्यबाद करनू किलैकी तैले अपूनी महान सामर्थ दिखाईना की छै और तैले संसारा में अपूनो राज्य कर दी हैछ।”

¹⁸ उन लोग जो तैमें विश्वास नै करना भौत गुस्सा में छन। किलैकी अब उ बखत आग्योछ कि तेरो गुस्सा गैर-यहूदीन में अ, और उ बखत ले आग्योछ कि तै मरिना का लोगून को न्याय करो, अब उ बखत ले छै जब उन परमेश्वरो को संदेश दिनवाला लोगून ईनाम द्योलो, जो तेरि सेवा करनान और उन सब लोगून जो तेरो सम्मान करनान। जब कि उई बखत तै उनून नाश कर देले जिनूनले धरती में बिनाश करछ्य।

¹⁹ और परमेश्वरो को जो मन्दिर स्वर्ग में छै, उ खोलि ग्योछ, और उक मन्दिर में वाचा को सन्दूक दिखाई दीछ; और उई बखत चाल चमकछ्य और गर्जन और भूचाल हुन मरैछ्या, और आकाश भटे ठूल-ठूलो मारो पड़छ्य।