फिलेमोन 1 - सोरियाली नय्या नियम

स्वागत

¹ मैं पौलुस यो चिठ्ठी लिखूनमरयूँ। मैं यीशु मसीह की सेवा का कारण जेल में बन्द छूँ। और हमोरो दगड़िया विश्वासी तीमुथियुस तुमून नमस्कार करछो। हे प्रिय भाई फिलेमोन मैं तैंस चिठ्ठी लिखूनमरयूँ।

² और मैं हमरि विश्वासी बैनि अफफिया, और हमार दगड़िया अरखिप्पुस, जो एक योद्धा की नियाती परमेश्वर की सेवा करछो, और उन विश्वासीन खिन ले लिखूनमरयूँ जो तुमारा घर में जाम हुनान।

³ और मैं प्रार्थना करछूँ कि हमार पिता परमेश्वर और प्रभु यीशु मसीहक तरफ भटे तुमून अनुग्रह और शान्ति मिलनै रौ।

फिलेमोन को प्रेम और विश्वास

⁴ मैं तुमून अपूनी प्रार्थना में याद करभेरन परमेश्वर स हमेशा धन्यवाद करछूँ।

⁵ लोग मैंस बतुनान कि तैं प्रभु यीशु में विश्वास करून में मजबूत छै और यो कि तैं परमेश्वरा का सब लोगून प्रेम करछै।

⁶ मैं परमेश्वर थैं प्रार्थना करछूँ कि विश्वासीन का दगाड़ जो तेरो दगड़िया छै, उ बढ़नै जौ, ताकि तैं उन सब चीजून पुरी तरीका ले समझ सको जो परमेश्वर ले हमून दी रैछ, यो सब मसीह की महिमा खिन हो।

⁷ क्याखिनकि हे विश्वासी भाई, दुसारान खिन तेरो यो प्रेम देखभेरन मैंस भौत खुशी और हिम्मत मिलछ्य, येक कारण कि त्यारा द्वारा परमेश्वरा का लोगून को दिल खुशी ले भरग्या।

उनेसिमुस खिन निवेदन

^8-9 येक कारण ले मैं तैंस मसीह में एक विश्वासी का नाता में ठीक काम करून खिन कुंछूँ, और मैंस मसीह में भौत हिम्मत छै और तैंस येस करना को हुकुम दी सकछूँ। लेकिन मैं बुजुर्ग पौलुस जो यीशु मसीह की सेवा करछूँ, अब जो एक कैद में छूँ सिर्फ तैथैं बिनती करछूँ, क्याखिनकि तैं मैंस और अपून दगाड़ का विश्वासीन का प्रेम करछै।

¹⁰ मैं उनेसिमुस खिन बिनती करछूँ, जो म्यारा च्याला की नियाती छै। जब मैं जेल में छ्यो त उ मसीह में म्योरो च्योलो बनग्यो।

¹¹ उ त पैलि त्यारा के कामो को नी छ्यो, लेकिन अब उ हम द्वीवीन को भौत कामो छै।

¹² चाहे मैं उनेसिमुस स भौत प्रेम करछूँ, फिरले मैं ऊस त्यारा पास भेजूनमरयूँ।

¹³ मैं ऊस अपूनी मद्दत खिन याँई राखून चांछूँ, जब की मैं यीशु मसीहा का बारिमें सुसमाचार प्रचार करना का कारण जेल में छूँ, और याँ मेरि अपूनी मद्दत करून खिन तेरि जाग ली शक छया किलैकी मैं जाणछूँ की तुम मेरि मद्दत करून चांछा।

¹⁴ लेकिन तेरि सहमति का बिना के नै करूँ चायो जेले तुम यो उपकार दबाब नै, लेकिन अपूनी खुशी ले करा।

¹⁵ शायद यो कारण छ्यो कि परमेश्वर ले उनेसिमुस स थ्वाड़ा बखत खिन त्यारा पास है भाग जान दीछ ताकि उ मसीह में विश्वास कर सको, और तैं हमेशा खिन ऊस अपून दगाड़ राँख सके।

¹⁶ तैं ऊस केवल अपूनो दास जन समझे, बल्कि उ एक दास है बढ़भेरन छै, और मैंले ऊस भौत प्रेम करछूँ, लेकिन तैंस ऊस और ले ज्यादा प्रेम करून चैछो आदिमी हुना का नाते और मसीह में विश्वासी भाई का नाता ले ऊस प्रेम करून चैछो।

¹⁷ जब उनेसिमुस त्यारा पास वापिस आलो त तैं उक दगाड़ निको ब्यवहार करे जसो तैं म्यारा दगाड़ करिना को छै।

¹⁸ और अगर उले तेरो केले नुकशान करिना को छै, और उमें तेरो केले उधार छै त मैं ऊस चुका द्यूलो।

¹⁹ मैं पौलुस अपून हात ले लिखछूँ, कि मैं ऊस चुका द्यूलो; हालांकि मैं तैंस यो याद दिलून जरूरी नै समझनू कि तुमोरो पुरो जीवन म्योरो कर्जदार छै।

²⁰ हे प्रिय भाई, यो खुशी मैंस प्रभु में त्यारा तरफ भटे मिलौ, मसीह में म्यारा दिल स हौंसला ले भर दे।

²¹ मैंले तैंस यो चिठ्ठी येक कारण लिखछै, क्याखिनकि मैंस भरोसा छै कि तैं उई करले जो मैंले के रैछ। मैं जाणछूँ कि जो मैंले के रैछ तैं उ है ले ज्यादा करले।

²² एक बात और। तैं म्यारा रूना को इन्तजाम करा, क्याखिनकि मैंस उमीद छै कि परमेश्वर तुमेरि प्रार्थना को जबाब द्योलो और मैंस आभेरन तुमून फिर देखून द्योलो।

आखिरी स्वागतन

²³ इपफ्रास, जो मसीह यीशु में म्यारा दगाड़ जेल में छै,

²⁴ और मरकुस, अरिस्तर्खुस, देमास और लूका जो म्योरो दगड़िया प्रभु में काम करनान; यो सब तैंस नमस्कार कुंनान।

²⁵ मैं प्रार्थना करछूँ कि प्रभु यीशु मसीह को अनुग्रह तुमून में हुनै रौ। आमीन।