मरकुस 16 - सोरियाली नय्या नियम

यीशु को ज्यूनो हुनो

¹ जब सबत को दिन खतम हो ग्योछ, तब मरियम जो मगदला गौं छी और याकूब की ईजा मरियम और सलोमी ले यीशु की लाश में लगून खिन खुशबुदार चीजून खरीदयान।

² और हफ्ता का पैल दिन रात्तै सूरज निकलून है पैलि उन कब्र में आयान।

³ और आपस में यो बात करून मरेछ्या, “हमून खिन कब्र का मुँख में है ठूलो ढूंगास को खिसकालो?”

⁴ लेकिन जब उन कब्र में पुजनान, तब उनूनले देखछ्य, कि कब्र मुँख में भटे ढूंगो हटीना को छै। और उ ढूंगो भौत ठूलो छ्यो।

⁵ और उन स्यैनिन ले कब्र का भितर जाभेरन एक नौ जवान स जेले भौत सफेद कपाड़ा पैनिना का छ्या, दैन तरफ बैठिना को देखछ्य। और उन भौत हैरान हो ग्या।

⁶ उ नौ जवान ले उन स्यैनिनथैं क्योछ, “डरा जन। तुम यीशु नासरी स जैस सूली में चढ़ाईना को छ्यो, ऊस खोजून मरेछा। उ ज्यून है ग्योछ और याँ नाहातिन, देखा यो उई जाग छै जाँ उकी लाश राख रैछी।

⁷ पर तुम जा, पतरस और उक शिष्यून थैं कया, ‘कि यीशु तुमून है पैलि गलील प्रदेश खिन जालो। और जस उले तुमूनथैं कै राँखछ्यो, तुम ले यीशु वाँई देखला।’ ”

⁸ और उन कब्र भटे निकल भेरन दौड़भेरन ग्यान, और उनूनले बाट में कैथैं के नै क्यो क्याखिन उन भौत डरीना का छ्या।

मरियम जो मगदला गौं छी स यीशु को दिखाई दीनो

⁹ और हफ्ता का पैला दिना रातैनि, यीशु मरिनान में भटे ज्यूनो हो भेरन, सबून है पैलि मरियम जो मगदला गौं छी जेमें भटे उले सात भूतून निकालीना को छ्या, ऊस दिखाई दीछ।

¹⁰ तब मरियम जो मगदला गौं छी उले यीशु का शिष्यून जो दुखी छ्या, और रून मरेछ्या उनार पास जाभेरन यो समाचार दीछ।

¹¹ लेकिन जब उनूनले उथैं सुणछ्य, कि यीशु ज्यून हो ग्योछ, और उले ऊस दिखछ्य, त उनूनले उक बात में विश्वास नै कर्यो।

द्वी शिष्यून यीशु को दिखाई दिन

¹² फिर येक बाद यीशु द्वी जनून दिखाई दीछ, जो यरूशलम शैहर भटे गौं खिन जानमरेछ्या, लेकिन उनूनले ऊस पैलि बार में नै पछाड़ियो, क्याखिनकि उको भेष-भूसा बदलीना की छी।

¹³ जब उनूनले ऊस पछयाण लीछ, तो उन द्वीवै यरूशलम शैहर खिन वापस ग्यान, उनूनले और शिष्यून ले यो बारिमें बताछ, पर शिष्यून ले उनेरि बातनू में विश्वास नै कर्यो।

इग्यार शिष्यून यीशु को दिखाई दीनो

¹⁴ येका बाद फिर यीशु उन इग्यार शिष्यून ले, जब उन खानो खान मरेछ्या दिखाई दीछ, उले उनून डाटछ्य, क्याखिनकि उनार मन भौत कठोर हो गैछ्या, कि उनूनले उन लोगून का बातुन में विश्वास नै कर्यो, जिनूनले यीशु ज्यून हुना का बाद देखछ्य।

¹⁵ तब यीशु ले उनूनथैं क्योछ, “तुम सारा संसार में जाभेरन सारा लोगून सुसमाचार प्रचार करा।

¹⁶ जो परमेश्वर में विश्वास करोलो और बपतिस्मा ल्योलो उको उद्धार होलो, लेकिन जो परमेश्वर विश्वास नी करोलो उ अपून पापून की सजा मिलेलि।

¹⁷ और विश्वास करून वालान में यो चिन होला, कि उन म्यारा नामेले भूतून निकालाल; और नय्या-नय्या भाषा बोलला।

¹⁸ और स्याँपून उठाला, और अगर उन जहर वाला चीज ले पी ल्याला, तब ले उनेरि कै हानि नी हो और उन बिमारून में हात राखाला, और उन चंगा हो जाला।”

यीशु को स्वर्ग खिन जानो

¹⁹ तब प्रभु यीशु उनार दगाड़ बात करनाका बाद स्वर्ग में उठा ली ग्यान, और परमेश्वरा का दैन तरफ बैठ ग्यान।

²⁰ और उन शिष्यून ले जाभेरन हर जाग प्रचार करछ्य, और प्रभु यीशु ले उनून सामर्थ दीछ, और उनार द्वारा करिना का चमत्कारून यो बात साबित करछ्या कि उको संदेश सच्चो छ्यो। आमीन।