मरकुस 11 - सोरियाली नय्या नियम

यरूशलम शैहर में विजय प्रवेश

¹ जब यीशु और उनार शिष्य यरूशलम शैहर आयान, त उन बैतफगे और बैतनियाह गौं में पुजनान, यो गौं जैतून पहाड़ा का पास छ्या। तो यीशु ले अपून शिष्यून में भटे द्वी शिष्यून यो कैभेरन भेजछ्य,

² “कि सामुनि वाला गौं में जा, और उ गौं में पुजनै तुमून एक किल में गधीक बच्चा बाँदिना को मिलोल, जैमे ऐल तलक कोई नै बैठि र्यो। तुम ऊस खोलभेरन म्यारा पास ल्या।

³ अगर कोई तुमूनथैं पुछोलो, ‘कि येस खोल भेरन काँ ली जानमरेछ्या?’ तो कया, ‘हमार प्रभु स येकी जरूरत छै, और उ उई बखत याँ भेज द्यालो।’ ”

⁴ शिष्यून ले जाभेरन गधीक बच्चा स घरा का भ्यार बाँट में बाँदिना को देखछ्य, और ऊस खोलून लाग्यान।

⁵ तब वाँ ठाँड़ लोगून ले पुछ्छै, “यो कि करून मरेछा? तुम यो गधीक बच्चास किलैं ली जानमरेछ्या?”

⁶ जसो यीशु ले कईनाको छ्यो, ऊसोई शिष्यून ले उन लोगून थैं क्योछ; तब उन लोगून ले गधी का बच्चास लीजान दीछ।

⁷ उन शिष्यून ले गधीक बच्चास यीशु का पास ल्यान, और उक मलि में अपून कपाड़ा डाल्यान और यीशु उमें बैठियान।

⁸ तब भौत लोगून ले यीशु का स्वागत करून खिन बाँट में अपून-अपून शौल और पंखि बिछा दीयान, और थ्वाड़ा लोगून ले त गाड़ान में भटे खजूर का हांगान काटि-कटि भेरन बाँट में बिछा दीयान।

⁹ और लोग यीशुका दगाड़ अघिल-पछिल हिटू मेछ्या, उन जोरले चिल्ला-चिल्ला भेरन कुछ्या, “होशाना।” धन्य छै उ जो परमेश्वरा का नाम ले उछो।

¹⁰ हमोरो बाब दाऊद को राज्य जो उन मेरियोछ; उ धन्य छै। “परमेश्वर की होशाना; जो स्वर्ग में रूँछो।”

¹¹ फिर यीशु यरूशलम शैहर में पुजभेरन मन्दिर में आछ, और चारू तरफ चीजून देखछ्य, अपून बार शिष्यून का दगाड़ वापिस बैतनियाह गौं खिन न्हैजाछो, क्याखिनकि भौत ब्याल हो गैछी।

बिना फलो को तिमूलो को रूख

¹² दुसारा दिना रात्तै जब यीशु और उक शिष्य बैतनियाह गौं भटे यरूशलम शैहरा का तरफ जानमरेछ्या, तब बाँट में हिटून-हिटून यीशु स भुख लागछ्य।

¹³ तब वाँ थ्वाड़ा दूर में उ एक हरिया-भरिया तिमूला का रूख स देखिभेरन उक पास ग्यो, कि उमें भटे खान खिन के फल मिलज्यौ, लेकिन पातून का अलावा और केले नै पायो, क्याखिनकि उ फलो को बखत नै छ्यो।

¹⁴ तब यीशु ले उ रूख थैं क्योछ, “आज भटे तेरो फल कभै कोई नी खा।” और यो बात उक शिष्य सुणन मरेछ्या।

मन्दिर भटे व्यापारीन को निकाली जानो

¹⁵ येक बाद यीशु और उनार शिष्य यरूशलम शैहर में आयान, और उन मन्दिर का खाला में ग्यान; वाँ जो लोग बैठभेरन ब्यापार करून रेछ्या, यीशु उनून वाँ भटे भ्यार निकालून लागछ्य, और उनूनले रूपयान बदलून वालान का मेज और कबूतर बेचन वालान का तखता पलट दीयान।

¹⁶ और यीशु ले लोगून हुकुम दीछ, कि उन मन्दिर का खाला का आश-पास चीजून लीजान बन्द करून।

¹⁷ फिर यीशु ले लोगून थैं क्योछ, “पवित्र-शास्त्र इसो कुंछो, म्येरो मन्दिर सबै जातिन का लोगून खिन प्रार्थना को घर होलो, पर तुमून ले यो प्रार्थना घर स डाकून को अड्डा बना रैछ।”

¹⁸ जब प्रधान याजकून ले और मूसा का नियम सिखून वाला लोगून ले सुणछ्य, कि यीशु ले की करछ्य और की क्योछ, तो उन ऊस मारना का मौका खोजून लाग्यान, पर उन इसो करून खिन डर छ्या, क्याखिनकि भीड़ का सब लोग उकी शिक्षा ले हैरान छै।

¹⁹ और जब ब्याल भैछ, तो यीशु और उक शिष्य बैतनिय्याह गौं खिन न्हैजानान।

सुखीना का तिमूला का रूख भटे शिक्षा

²⁰ दुसारा दिन रातैनि यीशु और उक शिष्य फिर यरूशलम शैहर खिन, उई बाँट भटे वापस जानमरेछ्या, जै बाँट भटे उन आ रै छ्या, तब उनेरि नजर उई तिमूला का रूख में पड़छ्य, जैस यीशु ले श्राप दी रेछ्यो, उ रूख जाड़ तक सुख ग्यान।

²¹ तब पतरस स उ बात याद आछ, और उले यीशु थैं क्योछ, “हे गुरू जी, देखा, तिमूलो को रूख जैस तैंले श्राप दी रेछ्यो, उ रूख जाड़ा तक सुख ग्यान।”

²² यीशु ले ऊस जबाब दीछ, “विश्वास करा कि जो तुमूनले माँग रैछ, उ परमेश्वर तुमून खिन करोलो।

²³ मैं तुमूनथैं सच्ची कुंछूँ, जो ले विश्वास ले यो पहाड़ थैं कौलो, ‘तैं याँ भटे उखड़ भेरन समुद्र में जा पड़,’ और उ अपून मन में शक जन करो, बल्कि यो विश्वास करो कि जो उले माँ रैछ परमेश्वर ऊस पुरो करोलो, तब परमेश्वर उ खिन कर द्योलो।

²⁴ येक कारण मैं तुमूनथैं कुंछूँ, कि जो तुम प्रार्थना में मांगछा, तो विश्वास करा कि परमेश्वर ले पैलि है तुमेरि बिनती सुण है छ्य, और परमेश्वर तुमून खिन कर द्योलो।

²⁵ इसीकैं यीशु ले फिर क्योछ, कि प्रार्थना करून बखत अगर तुमार मन में के खिनै कोई शिकायत छै; तो पैलि ऊस माफ कर दी, तब तुमोरो पिता जो स्वर्ग में छै, तुमार पाप ले माफ करोलो।

²⁶ अगर तुम दुसरान का गलतिन माफ नै करला, तो तुमोरो पिता जो स्वर्ग में छै, तुमार पापून ले माफ नी कर।”

यीशु को अधिकार में सवाल

²⁷ एक बार फिर यीशु और उक शिष्य यरूशलम शैहर में वापस आयान, जब उ मन्दिर में घुमून मरेछ्यो, तब उ बखत प्रधान याजक और मूसा का नियम सिखून वाला लोग और यहूदी अगुवा यीशु का पास आभेरन पुछून लाग्यान,

²⁸ “तैं यो काम केका अधिकार ले करछै? और यो काम करना को अधिकार तैंस कैले दीछ?”

²⁹ यीशु ले उनूनथैं क्योछ, “मैंले तुमूनथैं एक सवाल पुछ्छू, और अगर तुम मैंस येक जबाब द्यला, तब मैं तुमून बतुलो कि यो काम केका अधिकार ले करछूँ।

³⁰ यहूना स लोगून बपतिस्मा दीन खिन कैले भेजछ्य? क्या यो परमेश्वर ले भेजिना को छ्यो, या आदिमी ले? तुम मैंस येक जबाब दी।”

³¹ तब उन लोग आपस में यो बात करून लाग्यान, “अगर हम कुंनू, कि यहूना परमेश्वरा का अधिकार ले बपतिस्मा दीछ्यो, तो उ हमून थैं पुछोलो, फिर तुमूले यहूना में विश्वास किलैं नै कर्यो?

³² और हम यो ले नै के सकना, कि यहूना स अधिकार लोगून का तरफ भटे छयो, उन डर छ्या कि अगर हम इसी कुंनू, तो लोग गुस्सा हो ज्याला, क्याखिनकि भौत सारा लोग यो बात स जाणनान, कि यहूना सच्ची में परमेश्वरो को संदेश दिनवाला छ्यो।”

³³ तब उनूले यीशु स जबाब दीछ, “हमून पत्तो नाहातिन।” तब यीशु ले क्योछ, “मैंले तुमून नै बतूनू कि मैं कैका अधिकार ले यो काम करछूँ।”