मत्ती 3 - सोरियाली नय्या नियम

यहूना बपतिस्मा दिनवालो

¹ उन दिनून में बपतिस्मा दिनवालो यहूना, जो पानि की एक रसम करछ्यो, जैस बपतिस्मा कुंनान। जो यहूदिया प्रदेशा का बिरान जागा में आभेरन यो प्रचार करून लागछो,

² “अपून पापून खिन पश्चताप करा क्याखिनकि स्वर्ग को राज्य नजिक आग्योछ।”

³ योई छै जैका बारिमें परमेश्वरो को संदेश दिनवाला यशायाह ले कईना छ्यो, “उ बिरान जागान में रौलो और लोगून धध्या-धध्याभेरन यो बतालो, कि प्रभु परमेश्वरा का ऊँन खिन तुम तैयार हो ज्या और उन बाँटान ठीक करून जैमें भटे हो भेरन उ ऊँनवालो छै।”

⁴ यहूना ऊँट का बालून का बनाईना का साधारण कपाड़ा पैन छ्यो और उ अपून कमर में चमड़ाक पट्टा बादछ्यो, और मौ और पिटींग खाँछ्यो।

⁵ तब यरूशलम शैहरा का और सारा यहूदिया प्रदेश, और यरदन नदी का आश-पासा का रूनवाला लोग निकल भेरन यहूना का पास उनान।

⁶ और लोगून ले यो मानभेरन कि हम पापी छा, त यहूना का हात ले यरदन नदी में बपतिस्मा लीछ।

⁷ लेकिन जब उले भौत फरीसीन और सदूकी लोगून अपून पास बपतिस्मा लीन खिन उन देखछ्य, तो उले उनूनथैं क्योछ, “हे स्याँपा का जैसा जहरीला लोगो, तुमून कैले बता दीछ, कि परमेश्वरा का उनवाला कोप है भागा?

⁸ येक कारण भल काम करभेरन सबूत दी, कि तुमून ले सच्ची में पापून है पश्चताप कर ली है।

⁹ और अपून-अपून मन में यो जन सोचा कि ‘हम अब्रहाम का वंश का छा; कि हम बच ज्यूला।’ क्याखिनकि मैं तुमूनथैं कुंछू कि परमेश्वर इन ढ़ुगान भटे अब्राहम खिन सन्तान पैद कर सकछो।

¹⁰ अब इसी बात छै कि परमेश्वर हरेक स जो अपून पापून है पश्चताप नै करून चानो, ऊस सजा दीन खिन बिलकुल तैयार छै। ठीक उसीकैं जसीकैं बनकाटो रूखून का जाड़ा में राखिना को छै, येका कारण जो-जो रूख निको फल नै ल्यून, उ काटि जालो और आग में डाली जालो।

¹¹ मैंले त तुमून पानि ले पापून को पश्चताप करून खिन बपतिस्मा दी छूँ, लेकिन जो म्यारा बाद उनवालो छै, उ मैं है महान छै। और मैं इसो लाकारी को ले नाहातिनू कि उको सेवक बनभेरन उको जूताका खोलि सकू लेकिन मैंले त तुमून पानि को बपतिस्मा दीछ, लेकिन उ तुमून पवित्र आत्मा और आगा ले बपतिस्मा द्यालो।

¹² उले अपून हातून में सूप्पो ल्हीछ, और उ अपूनी खेती की फसल स निकीकैं साफ करोलो, और ग्यूँका दानान अपून भखार में जाम करोलो, और भूसा स उ आग में जालो, जो कभे नै बुझनी।”

यहूना द्वारा यीशु को बपतिस्मा

¹³ तब उ बखत यीशु गलील प्रदेश भटे यरदन नदी का किनार यहूना पास उथैं बपतिस्मा लीन खिन आछ।

¹⁴ लेकिन यहूना यो कैभेरन मना करछ्य, “कि मैंस त तेरा हात भटे बपतिस्मा लीना की जरूरत छै, और तैं म्यारा पास आ रैछै?”

¹⁵ तब यीशु ले ऊस जबाब दीभेरन क्योछ, “अब इसो हुन दे क्याखिनकि हमून इसीकैं परमेश्वर की मरजी स पुरो करून ठीक छै।” तब यहूना ले यीशु की बात मान लीछ।

¹⁶ और यीशु बपतिस्मा लीभेरन पानि भटे भ्यार आछ, और देखा उ खिन स्वर्ग खुलि ग्यो, और यहूना ले उक मलि में परमेश्वरे का आत्मा स कबूतर का रूप में उतरून देखछ्य।

¹⁷ और स्वर्ग भटे परमेश्वर ले यो क्योछ, “यो म्येरो लाड़िल च्योलो छै, जैस मैं प्रेम करछूँ और मैं यो भटे भौत खुश छूँ।”