मत्ती 23 - सोरियाली नय्या नियम

(धर्म गुरून भटे सावधान)

¹ तब यीशु ले भीड़ का लोगून थैं और अपून शिष्यून थैं क्योछ,

² मूसा का नियम सिखून वाला और फरीसी लोगून मूसा का नियम-कानून स बतूना को और दुसरान सिखूना को अधिकार छै।

³ येक कारण उ तुम लोगून थैं जेलै कलो, उ करनै और माननै रया, लेकिन उनार जस काम जन करया; क्याखिनकि उन जसी शिक्षा दीनान, ऊस काम नै करना।

⁴ उन भौत सारा नियम-कानून बतुनान, जिनून लोगून खिन मानून भौत कठिन छै। लेकिन अपून बनाईना का नियमून-कानून मानून खिन त उ जरा ले कोशिश नै करना।

⁵ उन अपून सब काम लोगून देखून खिन करनान, और उन पवित्र-शास्त्र का वचन ताबिजून में लिखभेरन अपून गला और हातून में पैननान, और अपून कपाड़ान का किनारान लम्बो करनान।

⁶ दावतून में खास-खास जागान में और यहूदी सभाघर में खास आसून में बैठून पसन्द करनान,

⁷ और बजार में लोग उनून नमस्कार करून पसन्द करनान, और गुरू कहलून उनून निको लागछ्य।

⁸ लेकिन तुम लोगून यो मौका जन दीया कि तुमूनथैं गुरू कुन, क्याखिनकि तुमोरो एक्कै गुरू छै, और तुम सब आपस में भाई-बैनिन का समान छा।

⁹ संसार में तुम कोई ले धर्म गुरू थैं अपूनो पिता जन कया, क्याखिन तुमोरो एक पिता छै; जो स्वर्ग में छै।

¹⁰ और तुम लोगून यो मौका जन दीया कि तुमूनथैं कोई गुरू कुन, क्याखिनकि तुमोरो एक्कै गुरू छै जो मसीह छै।

¹¹ जो तुमून में जो ठूलो होलो, उ तुमोरो दास बननोलो।

¹² जो कोई अपनास ठूलो समझछो, उ नानो करि जालो, और जो कोई अपनास नानो करोलो, उ ठूलो करि जालो।

मूसा का नियम सिखून वाला और फरीसी लोगून की निन्दा

¹³ फिर यीशु ले क्योछ, “हे कपटी मूसा का नियम सिखून वालान और फरीसी लोगों तुमून में धिक्कार हो! तुम लोगून खिन स्वर्ग राज्य को बाटो बन्द करछा, और नै खुद उमें चलछा और नै लोगून उ बाट में जान दीछा।

¹⁴ हे कपटी मूसा का नियम सिखून वाला और फरीसी लोग तुमून में धिक्कार हो! तुम विध्वाऊन का घरून लुट छा, और फिर लोगून दिखून खिन कि तुम धर्मी छा देर तलक प्रार्थना करछा, लेकिन परमेश्वर तुमून कड़ी सजा द्योलो।”

¹⁵ हे कपटी मूसा का नियम सिखून वाला और फरीसी लोग तुमून में धिक्कार हो! तुम एक आदिमी स अपून दल में मिलून खिन लम्बी-लम्बी यात्रा करछा, लेकिन जब उ आदिमी तुमार दल में शामिल हो जाछो तब ऊस अपून है ज्यादा नरक की आग को भागीदार बना दीछा।

¹⁶ “हे अन्धा यहूदी अगुवा तुमून में धिक्कार हो! तुम जो यो शिक्षा दीछा, अगर कोई मन्दिर की कसम खाछो त कोई बात नै, लेकिन अगर कोई मन्दिरा का सुना कि कसम खालो त उ कसम में बाधी जाछो।

¹⁷ हे मूर्खो ठूलो को छै, सुना या मन्दिर जैमें राखिना को सुनो पवित्र हो जाछो?

¹⁸ फिर तुम यो शिक्षा दीभेरन कुँछा, अगर कोई वेदी कि कसम खाछो त कोई बात ने, लेकिन जो भेंट वेदी मैं राखिना की छै अगर कोई उकी कसम खाछो त तुम उ कसम में बाँदि जाछो।

¹⁹ हे अन्धो यहूदी अगुवो, को ठूलो छै; भेंट या वेदी जेमें भेंट चढ़ाभेरन पवित्र हुछी?

²⁰ येक कारण जो वेदी की कसम खाछो, उ वेदी और जो केले उ चढ़ा जाछो उकी ले कसम खाछो।

²¹ जो कोई मन्दिर की कसम खाछो, उ मन्दिर और उमें रून वाला परमेश्वर की कसम खाछो।

²² और जो स्वर्ग की कसम खाछो, उ परमेश्वर की सिंहासन की और उमें बैठून वाला की ले कसम खाछो।

²³ हे कपटी मूसा का नियम सिखून वाला और फरीसी लोग, तुमून में धिक्कार हो! तुम अपून खेती में भटे पोदीना और सौंप और जीरा को दसवाँ हिस्सा दीछा, लेकिन तुम लोग पवित्रशास्त्र का मुख्य बातुन छोड़ दीछा, जसकैं न्याय, दया और भरोसमंद हुनो। और दसवाँ हिस्सा दीन चैंछो, लेकिन तुमून खिन यो ठीक छ्यो कि तुम इन बातुन ले करना और उनूनले नी छोड़ना।

²⁴ हे अन्धा अगुवा, तुम नान-नान नियम-कानून त बड़ ध्यान ले मानछा, जसकैं तुम पानि पीछा उ भटे मच्छर दूर करछा। लेकिन परमेश्वर की मुख्य आज्ञान और नियमून टालि दीछा, जसकैं ऊँट स निगलून।

²⁵ हे कपटी मूसा का नियम सिखून वाला और फरीसी लोग, तुमून में धिक्कार हो! तुम थाली और ब्यालान त भ्यार भटे मांजछा, लेकिन उन भितर भटे गन्दा छन उसीकैं तुमार मन भितर भटे लालची और मतलबी छन।

²⁶ हे अन्धा फरीसी लोगों, पैलि तुमून लालची और स्वार्थी हुन बंद कर दिन चैछो। तब तुम उई कर पाला जो धर्मी छै। उ एक इसा ब्याला का नियाति होलो जो भ्यार और भितर द्वीवै तरफ साफ हो। तब तुम उई कर पाला जो पवित्र छै। एक इसी थाली की नियाति होलि जो भ्यार और भितर द्वीवै जागान साफ हो।

²⁷ हे कपटी मूसा का नियम सिखून वाला और फरीसी लोग, तुमून में धिक्कार हो! तुम त इसा दिखाई दीछा, जसीकैं कबर में चूनो लगाईनाको जो मलि भटे सुन्दर दिखाई दीछी, लेकिन भितर भटे मुरदान की हड्डी और हर प्रकार की गंदगी ले भरिना की छै।

²⁸ इसीकैं तुम ले भ्यार भटे आदिमीन धर्मी दिखाई दीछा, लेकिन भितर भटे कपट और बुरा काम भरिनाका छा।

धर्म गुरून में दण्ड कि भविष्यवाणी

²⁹ हे कपटी मूसा का नियम सिखून वाला और फरीसी लोग, तुमून में धिक्कार हो! तुमार पुरखानले जिन परमेश्वरो को संदेश दिनवालान मारिना को छ्यो, तुम उनार कबरून सँवार छा और धर्मीन कि कबरून आदर दिन खिन बनूछा,

³⁰ और कुँछा कि अगर हम अपून बाब-दादान का जागा में हुना त परमेश्वरो को संदेश दिनवालान की हत्या में शामिल नी हुना।

³¹ तुम साबित करभेरन गवाही दीन मरेछा की तुम वास्तव में परमेश्वरो को संदेश दिनवालान की हत्या करून वालान का वंशज छा।

³² तुम उ बुराई पुर करूनवाला छा जैकी शुरूवाद तुमार पुरखानले शुरू करछ्य।

³³ हे स्यापों, और स्याँपा का समान जहरीला लोगों, तुम नरक की आगा की सजा भटे नै बच सकना।

³⁴ येक कारण में तुमार पास परमेश्वरो को संदेश दिनवालान और बुद्धिमानून और मूसा का नियम सिखून वालान भेजछूँ; और तुम उनूनमें भटे कुछ लोगून मार डालला और सूली में चढ़ाला, और कुछ लोगून यहूदी सभाघरून में कोड़ा लगाभेरन एक शैहर भटे दुसारा शैहर खदेड़ला।

³⁵ जसीकैं धरती में जदुक धर्मी लोगून को खून बगाई ग्योछ, धर्मी हाबिला का खून भटे लीभेरन बिरिक्याह का च्याला जकर्याह का खून तक, जैस तुम लोगून ले पवित्र जाग और वेदी के बीच में मार डालछ्य, उ सबोको इलजाम तुमार ख्वारा में पड़ोलो।

³⁶ फिर यीशु ले क्योछ, मैं तुमूनथैं सच्ची कुछूँ, कि इन सब हत्यान की यो सजा योई बखत का लोगून में आ पड़ेलि।

यरूशलम शैहरा का लोगून खिन बिलाप

³⁷ हे यरूशलम शैहरा का लोगों, तुमूनले जो परमेश्वरो को संदेश दिनवालान मार दीछ, और जो त्यारा पास भेजि ग्यान उनून ढ़ूगांन ले मारछा। फिर यीशु ले क्योछ, कतुक बार मैंले यो चाछ कि जसकै मुर्गी अपून प्वाथान अपून पंखान का तलि जामा करछी, उसीकैं मैंले तुमून जामा करूँ लेकिन तुम लोगून ले नै चाँयो।

³⁸ देख तुमोरो मन्दिर तुमून खिन उजाड़ छोड़ दी जालो।

³⁹ मैं तुमूनथैं कुछूँ अब भटे मैंस तुम तब तक नी देखा, जब तक तुम यो नी कौला, ‘धन्य छै उ, जो प्रभु अधिकार का दगाड़ उछो’ तब तक तुम मैंस कभे नै देखला।”