मत्ती 19 - सोरियाली नय्या नियम

तलाका का बारिमें यीशु की शिक्षा

¹ जब यीशु इन बातुन कै चुकियान त गलील प्रदेश भटे विदा हो भेरन यरदन नदी का पार यहूदिया प्रदेश में आयान।

² तब एक भौत ज्यादा भीड़ उनार पछिल उछी और उनूनले वाँ उनून चंगो करछै।

³ तब फरीसी लोग यीशुस परखून खिन उक पास आभेरन कुन लाग्यान, “क्या हरेक कारण ले अपूनी स्यैनि स त्यागून ठीक छी?”

⁴ यीशु ऊस जबाब दीछ, “क्या तुमूनले नै पढ़ियो कि जेले उनून बनाछ, उले शुरू भटे नर और नारी बनाभेरन क्योछ,

⁵ ‘येक कारण आदिमी अपून ईजा-बबा भटे अलग हो भेरन अपूनी स्यैनि का दगाड़ रौलो और द्वीवै एक तन होलो?’

⁶ क्याखिनकि अब उनून द्वी मिलभेरन एक हो जानान, अब उ द्वी नै पर एक छन। येक कारण परमेश्वर ले जैस एक दगाड़ जोड़ रैछ, उनून कोई आदिमी अलग जन करा।”

⁷ उनूनले उथैं क्योछ, “मूसा ले यो किलैं ठैरा रैछ कि तलाक-पत्र दीभेरन छोड़ दे?”

⁸ यीशु ले उनूनथैं क्योछ, “मूसा ले तुमार मन का कठोर हुना का कारण ले तुमून अपूनी स्यैनि स छोड़ दिनाकी आज्ञा दीछ, लेकिन शुरू भटे इसो नै छ्यो।

⁹ और मैं तुमूनथैं कुछूँ, कि जो कोई ब्यभिचार छोड़ और कोई कारण ले अपूनी स्यैनि स तलाक दीछो, और दुसरी का दगाड़ ब्या करौ त उ ब्यभिचार करछ्यो और जो उ छोड़िना की स्यैनि दगाड़ ब्या करोलो, उले ब्यभिचार करछो।”

¹⁰ शिष्यून ले उथैं क्योछ, “अगर आदिमी को स्यैनि का दगाड़ इसो सम्बन्ध छै, तब त यो निको होलो कि ब्या करि नै जौ।”

¹¹ उनूनले उनूनथैं क्योछ, “सब यो वचन ग्रहण नै कर सकना, केवल उनी जिनून परमेश्वरा का तरफ यो दान दी ग्योछ।

¹² किलैकी कुछ नपुंसक इसा छन, जो जन्म भटे है इसा हुनान; और कुछ नपुंसक इसा छन, जिनून लोगून ले नपुंसक बनाछ; और कुछ नपुंसक इसा छन, जिनून स्वर्गा का राज्य खिन अपून आपस नपुंसक बना रैछ। जो येस समझ सक्छो, उ समझ ले।”

नान्तिनान आशीर्वाद

¹³ तब लोग नानतिनान उक पास ल्यान कि उनूनमें हात राँख भेरन प्रार्थना करौ, लेकिन शिष्यून ले उनून डाटछ्य।

¹⁴ यीशु ले उनूनथैं क्योछ, “नानतिनान म्यारा पास उन दी, और उनून मना जन करा, क्याखिनकि उई लोग जो इन नानतिनान की नियाती भरोसामंद छन, उई परमेश्वरा का राज्य रौला।”

¹⁵ और यीशु ले उनार खाँरा में हात राखभेरन वाँ भटे न्हैग्या।

धनवान च्योलो और अनन्त जीवन

¹⁶ और एक आदिमी यीशुका पास आछ और उनूनथैं क्योछ, “हे गुरू, मैं कि निको काम करूँ जेले मैंस परमेश्वर अनन्त जीवन द्योलो?”

¹⁷ यीशु ले उथैं क्योछ, “तुम मैंथैं भलो किलैं कुँछा, सिर्फ परमेश्वर स छोड़िभेरन और कोई लै भलो नाहातिन, लेकिन अगर तैं अनन्त जीवन में प्रवेश करून चाँछै, त आज्ञान मानून कर।”

¹⁸ उले उनूनथैं पुछ्छै, “को वाली आज्ञा?” यीशु ले क्योछ, “यो कि खून जन करिये, ब्यभिचार जन करिये, चोरी जन करिये, झूठ्ठी गवै जन दीये,

¹⁹ अपून बबा और अपूनी ईजा को इज्जत करिये, और अपून पड़ोसीस अपून समान प्रेम राखिये।”

²⁰ उ जौवान ले यीशु थैं क्योछ, “इन सबून त मैले मानछूँ; अब मैंमें कि बाते की कमी छै?”

²¹ यीशु ले उथैं क्योछ, “अगर तैं सिद्ध हुन चाँछै, त जा, अपूनी सब कुछ जो तेरो छै ऊस बेच भेरन गरीब लोगून में बाड़ दे, अगर तैं इसो करछै तो तैंस स्वर्ग में धन मिलोलो, और म्यारा दगाड़ अ और म्येरो शिष्य बन जा।”

²² लेकिन जब उले यो सुणछ्य त उदास हो भेरन न्हैग्यो, क्याखिनकि उक पास भौत धन-सम्पति छी।

²³ तब यीशु ले अपून शिष्यून थैं क्योछ, “मैं तुमूनथैं सच्ची कुछूँ कि धनवान लोगून को स्वर्ग राज्य में प्रवेश करून भौत मुश्किल छै।

²⁴ मैं तुमूनथैं फिर कुंछूँ, कि परमेश्वरा का राज्य में धनवान लोगून को पुजून ऊँट का शियूण का छेद में भटे पार हुनो आसान छै।”

²⁵ यो सुणभेरन शिष्यून ले एक दुसारा थैं क्योछ, “तो केको ले परमेश्वरा का राज्य में बचाई जानो कसीकैं सम्भव छै।”

²⁶ यीशु ले उनार तरफ देखभेरन क्योछ, “यो लोगून खिन भौत असम्भव छै, लेकिन परमेश्वर भटे हो सकछो।”

²⁷ तब पतरस ले क्योछ, “हमार बारिमें क्या? हमूले तेरो शिष्य बनून खिन अपूनो सब कुछ छोड़ दीछ?”

²⁸ फिर यीशु ले उनूनथैं क्योछ, “मैं तुमूनथैं सच्ची कुछूँ कि तुम जो म्यारा बातुन मानछा, उ बखत जब सब कुछ नय्या हो जालो और मैं आदिमी को च्योलो अपून महिमामय सिंहासन में बैठोलो त तुम ले बार सिंहासनून में बैठभेरन इस्राएल देशा का बार गोत्रून को न्याय करला।

²⁹ यीशु उनूनथैं क्योछ, मैं तुमूनथैं कुछूँ, कि इसो कोई नाहातिन जेले सुसमाचार खिन अपूनो घर-बार, ईजा-बबा, भाई-बैनि, बाल-बच्चान या गाड़ा-भीड़ सुसमाचार खिन छोड़िना को हो तो सौ गुना ज्यादा पाल, और उ अनन्त जीवन ले पाल।

³⁰ लेकिन भौत सारा लोग जो महान और अघिल छन, उ बखत पछिल होला; और जो पछिल छन, उन उ बखत अघिल होला।”