लूका 20 - सोरियाली नय्या नियम

यीशु को अधिकार में सवाल

¹ एक दिन इसो भ्योछ कि जब यीशु मन्दिर में उपदेश दिन मरेछ्या और सुसमाचार सुणून मरेछ्या, त उ बखत प्रधान याजक, महायाजक और मूसा का नियम सिखून वाला लोग और यहूदी अगुवान का दगाड़ पास आभेरन ठाड़ भ्यान।

² और उन यीशु थैं कुन लाग्यान, “हमून बतो, तैं इन कामून कैका अधिकार ले करछै, और उ को छै जेले तैंस यो अधिकार दी रैछ?”

³ यीशु ले क्योछ, “मैंले तुमूनथैं एक सवाल पुछ छूँ, और अगर तुम मैंस येक जबाब द्याला, तब मैं तुमून बतुलो कि यो काम केका अधिकार ले करछूँ।

⁴ अब तुम यो बता, कि यहूना स लोगून बपतिस्मा दीन खिन कैले भेजछ्य? क्या ऊस परमेश्वरे ले भेजिना को छ्यो, या आदिमी ले? तुम मैंस येक जबाब दी।”

⁵ तब उन लोग आपस में यो बात करून लाग्यान, “अगर हम कुंनू, कि यहूना ले परमेश्वरा का अधिकार ले बपतिस्मा दीछ, तो उ हमून थैं पुछोलो, फिर तुमूले यहूना में विश्वास क्याखिन नै कर्यो?

⁶ लेकिन अगर हम कुंनू लोगून का तरफ भटे त लोग हमून ढ़ूगानले लोड़ियाला, क्याखिनकि भौत सारा लोग यो बात स जाणनान, कि यहूना सच्ची में परमेश्वरो को संदेश दिनवाला छ्यो।”

⁷ तब उनूले यीशु स जबाब दीछ, “हमून पत्तो नाहातिन, कि उ केका तरफ भटे आईना को छ्यो।”

⁸ तब यीशु ले क्योछ, “मैंले तुमून नै बतूनू कि मैं कैका अधिकार ले यो काम करछूँ।”

दुष्ट किसानून को उदारण

⁹ उक बाद यीशु ले उन कुछ यहूदी अगुवान एक कहानी सुणाभेरन क्योछ, “एक आदिमी ले अंगूर का बगीच लगाछ। और किसानून उ बगीच स ठेका दीभेरन खुद दूर देश न्हैग्यो।

¹⁰ जब अंगूर पाक्नाका बखत आछ, त बगीच का मालिक ले अपून सेवक स, उन किसानून का पास फसलो को हिस्सा लीन खिन भेजछ, जिनुले बगीच को ठेका लीईना को छ्यो। लेकिन किसानून ले उ सेवक स पकड़ भेरन मारछ्य, और खाली हात वापस भेज दीछ।

¹¹ येका बाद फिर मालिक ले दुसारा सेवक स भेजछय, और उनूनले ऊस ले पीटभेरन और उको अपमान करभेरन ऊस खाली हात वापिस भेज दीछ।

¹² फिर मालिक ले एक तीसोरो सेवक भेज छै, और उनूले ऊस ले घायल करभेरन भ्यार निकाल दीछ।

¹³ तब बगीच का मालिक ले क्योछ, मैं कि करूँ? मैं अपून प्रिय च्याला स किसानून का पास भेजलो, शायद उन म्यारा च्याला को आदर करला।

¹⁴ जब किसानून ले देखछ्य, त आपस में कुन लाग्यान, योई त असली वारिस यो छै, आ, हम यैस जान हे मारी दीनू, तो फिर उकी सारी जैजाद हमरि है जालि।

¹⁵ तब उनूले ऊस पकड़ भेरन जान है मारी दीछ, और ऊस उठाभेरन बगीच का भ्यार खित दीछ। तब अंगूरो बगीच का मालिक की करोलो?

¹⁶ उ आभेरन उन किसानून को नाश करोलो, और अंगूरा का बगीच स दुसारा किसानून दी द्योलो।” यो सुणभेरन लोगून ले क्योछ, “परमेश्वर इसो नै करो।”

¹⁷ यीशु ले उनार तरफ देखिभेरन क्योछ, “फिर यो पवित्रशास्त्र में कि लेख रैछ, जो ढूंगास मिस्त्रीन ले बेकार जाणिभेरन खित दीछ, उई ढुग नींव को कुना को ढुग बनछ्य।

¹⁸ जो कोई ले यो ढ़ुगा में खितीलो उ चूर-चूर हो जाला; और जेमें यो ढूंगो खितीलो उ पीसी जालो।”

कैसर स कर दीनो

¹⁹ उई बखत मूसा का नियम सिखून वाला और प्रधान याजक यो बात स समझ ग्या, कि यीशु ले यो हमार बारिमें कहानी क्योछ, येक कारण उन यीशुस पकड़ून चाँछ्या, लेकिन लोगून का डर का कारण यीशु नै पकड़ीयो।

²⁰ और उन ऊस पकड़ना का खोज में लाग रूनान, और उनूनले उक पास कुछ लोग भेदी बनाभेरन भेजियान, कि उन धर्मी हुना को ढोग करभेरन यीशु स कोई नै कोई बात में फसाँ सका, और हम ऊस पकड़ भेरन राज्यपाल का हवाला कर सका।

²¹ येक कारण उन आभेरन यीशु थैं कुन लागनान, “गुरू जी, हम यो जाणनू कि तैं ठीक कुछै और सिखूछै, और कैको पक्षपात नै करने, बल्कि सच्चाई ले परमेश्वरा का बाटो बतूछै।

²² येक कारण हमून यो बतो, क्या कैसर महाराजा स कर दीन ठीक छी या नाहातिन?”

²³ लेकिन यीशु ले उनोरो छल कपट स भांप भेरन उनूनथैं क्योछ,

²⁴ एक सिक्का ल्या और मैंस दिखा। “तब उन एक सिक्का ल्यान, और यीशु ले उनूथैं पुछ्छै, यो सिक्का में कैको मोहर और नाम छै?” उनूले जबाब दीछ, कैसर महाराजा को।

²⁵ तब यीशु ले उनूनथैं क्योछ, “जो कैसर महाराजा को छै ऊस कैसर राजा स दीया, और जो परमेश्वरो को छै ऊस परमेश्वर स दी।”

²⁶ उन लोगून का सामुनि यीशु स बातुन में नै फसाँ सक्या, लेकिन उक जबाब ले हैरान हो भेरन चुप रैग्या।

पुनरूत्थान और ब्या

²⁷ फिर सदूकी लोग जो कुंनान कि मरिना को ज्यून हुनो छैई नै, उनूनमें भटे थ्वाड़ा लोगून ले उक पास आभेरन पुछ्छै,

²⁸ “गुरू जी, मूसा ले हमून खिन यो लिख रैछ। ‘अगर कैको भाई अपून स्यैनि का रून तलक बिना औलादो को मरि जाछो, तब उक भाई उकी घरवाली दगाड़ ब्या करभेरन अपूनी भाई खिन वंश पैद करौ।’

²⁹ एक घर में सात भाई छ्या, और सबून है ठूला भाई को ब्या करछ्य, और उ बिन औलाद का मरिग्यो।

³⁰ दुसारा भाई ले करछ्य।

³¹ और तिसरा भाई उ विध्वा का दगाड़ ब्या कर लीछ, इसीकैं सातू भाई बगैर औलाद का मरिग्या।

³² और सबून का बाद उ स्यैनि ले मरि ग्यै।

³³ तब सदूकी लोगून ले यीशु थैं पुछनान, कि गुरू जी, अब हमून बतो उ उन सातू भाईन की घरवाली भैछ, जब उ ज्यून होलि तब उ कैकी घरवाली होलि।”

³⁴ तब यीशु ले उनूनथैं क्योछ, “यो युगा का आदिमी और स्यैनि ब्या करनान और ब्या खिन दी जानान;

³⁵ लेकिन जो लोग इसा योग्य होला, उन यो युग और मरिन में भटे ज्यून होला, उन नै तैं ब्या करला और ना ब्या करून खिन दी जाला।

³⁶ फिर उन कभै नी मराला; क्याखिनकि उन स्वर्गदूत का समान होला, और मरिन में भटे ज्यून हुना ले परमेश्वर की सन्तान हो जाला।

³⁷ येक अलावा तुम यो बात नै मानना की लोग मरिभेरन फिर ज्यून हुनान, लेकिन पवित्रशास्त्र में मूसाका बारिमें लिखीना को छै कि जब मूसा का दगाड़ परमेश्वर ले आग की झाड़ी में भटे बात करछ्य, जाँ उ प्रभु स अब्राहम को इसहाक को और याकूब को परमेश्वर कुंछो।

³⁸ परमेश्वर मरिनान को नै बल्कि ज्यूनानको परमेश्वर छै, क्याखिनकि उ खिन उन सब ज्यून छन।”

³⁹ तब यो सुणिभेरन मूसा का नियम सिखून वालान में भटे थ्वाड़ा लोगून ले क्योछ, “गुरू जी, तुमूले ठीक क्योछ।

⁴⁰ और येक बाद उनूनमें भटे कैसले यीशु थैं केले सवाल पुछना की हिम्मत नै भ्ये।”

मसीह केको च्योलो छै?

⁴¹ फिर यीशु ले उनूनथैं पुछ्छै, “मसीह स दाऊद राजा को वंशज कसीकैं के सकनान?”

⁴² दाऊद भजन संहिता की किताब में कुछूँ कि “प्रभु ले म्यारा प्रभु थैं क्योछ।

⁴³ म्यारा दैन तरफ बैठ, जब तक कि मैं त्यारा बैरिन त्यारा खुटान का तलि नै कर द्यूलो।

⁴⁴ और दाऊद राज त उथैं प्रभु कुंछो, फिर उ उको वंशज कसीकैं हो सकछो?”

मूसा का नियम सिखून वालान है सावधान

⁴⁵ और जब सब लोग सुणून मरयछ्या, त यीशु ले अपून शिष्यून थैं क्योछ,

⁴⁶ “तुम यो मूसा का नियम सिखून वाला लोगून भटे सतर्क रया, जो लम्बा-लम्बा मेहंगा चोला पैन भेरन घुमन और बजार में लोग उनूथैं नमस्कार करून यो पसन्द करनान, और यहूदी सभाघर में आदर वाली जागान और दावतून मेंले खास-खास जागान में बैठून पसन्द करनान।

⁴⁷ लेकिन उन ठगभेरन विध्वाऊन की सब जैजाद खुद लुट लीनान, और फिर लोगून देखून खिन देर तलक प्रार्थना करनान, लेकिन परमेश्वर उनून भौत कड़ी सजा द्योलो।”