लूका 16 - सोरियाली नय्या नियम

चालाक भण्डारी

¹ फिर यीशु ले एक कहानी अपून शिष्यून सुणाछ, कोई धनवान आदिमी को एक मुन्सी छ्यो, और लोगून ले उक सामुनि मुन्सी में यो दोष लाग्यान कि यो तेरि सब सम्पति उड़ा दीछो।

² तब उले मुन्सीस बुलाभेरन क्योछ, यो कि छै जो मैं त्यार बारिमें सुणून मरयूँ? तैं म्यारा सम्पत्ति को हिसाब-किताब दे; क्याखिनकि तैं अघिल कै मुन्सी नै रै सकनै।

³ तब मुन्सी सोचून लागछ, अब कि करूँ? क्याखिनकि म्येरो मालिक अब मुन्सी को काम मैंथै छड़ून मर्योछ माँट त म्यार कयाँ खड़ी नै जानो और भीख माँगून में मैंस शर्म उछी।

⁴ अब मैं समझ गयूँ, कि मैंले कि करून छै, ताकि जब मैं मुन्सी काम भटे निकाली जूंलो। त लोग मेरि मद्दत कराला।

⁵ तब उले अपून मालिक का हरेक कर्जदारून बुलाछ, और पैल थैं पुछ्छै तैंमें म्येरो मालिक को कतुक कर्ज छै?

⁶ उले क्योछ, सौ कन्टर जैतून को तेल, तब उले उथैं क्योछ, अपून खाता स पकड़ और बैठभेरन पचास कन्टर लिख दे।

⁷ फिर उले दुसारा थैं पुछ्छै, तैंमें कतुक कर्ज छै? उले क्योछ, सौ मन ग्यूँको, तब उले उथैं क्योछ, अपून खाता स पकड़ और अस्सी मन ग्यूँको लिख दे।

⁸ तब उक मालिक ले उ बेमान मुन्सी की तारीफ करछ्य, कि उले बड़ी चालाकी ले काम करछ्य; क्याखिनकि यो संसाराका लोग अपून बखता का लोगून का दगाड़ ब्यवहार करून में ज्योतिका लोगून भटे ज्यादा चालाक छन।

⁹ और मैं तुमूनथैं कुछूँ, कि संसारिक धन-दौलत भटे अपून खिन मित्र बना ली, ताकि जब तुमार मरना का बाद धन-दौलत खतम हो जालि, त तुमोरो हमेशा का रूनवाला घर में स्वागत करि जालो।

¹⁰ जो नानि है नानि बात में ईमानदार छै, उ ठूली बातुन में ले ईमानदार छै और जो नानि है नानि बात में बेमान छै, उ ठूली बातुन में ले बेमान छै।

¹¹ येक कारण जब तुम संसारा का धन-दौलत में ईमानदार नै ठैरिया, त स्वर्ग को धन-दौलत तुमून को द्योलो?

¹² और अगर तुम पराया धन-दौलत में ईमानदार नै ठैरिया, जो तुमोरो छै, ऊस तुमून को द्योलो?

¹³ येक कारण मैं तुमूनथैं सच्ची कुछूँ, कि “कोई दास द्वी मालिकून की सेवा नै करि सकनो, क्याखिनकि उ त एक्का दगाड़ बैर और दुसरा का दगाड़ प्रेम राखोलो; या एक्का दगाड़ मिल रौलो और दुसरा स तुच्छ जाणोलो। उसीकैं तुम परमेश्वर और धन-दौलत द्वीवैन की सेवा नै कर सकना।”

यीशुका कुछ उपदेश

¹⁴ फरीसी लोग जो लालची छ्या, यो सब बात सुणिभेरन यीशु की मजाक उड़ून लाग्यान।

¹⁵ यीशु ले उनूनथैं क्योछ, तुम त आदिमीन का सामुनि अपून-आपस धर्मी ठैरूछा लेकिन परमेश्वर तुमार मनेंस जाणनान, क्याखिनकि जो चीज आदिमीन की नजरून में भौत कीमती छै, उ परमेश्वरा का नजरून में घृणित छै।

¹⁶ यीशु ले क्योछ, मूसा का नियम और परमेश्वरो को संदेश दिनवालान को संदेश यहूना बपतिस्मा दीन वाला का बखत तक छ्यो, उ बखत भटे परमेश्वरोको राज्य को सुसमाचार सुणाई जानमर्योछ, और हरेक आदिमी उमें भौत मजबूती ले उन मर्यान।

¹⁷ परमेश्वरा का नियमून में भटे सब कुछ याँ तक कि सबून है नानि बात को प्रभाव तब तलक रौलो जब तलक उको मक्शद पुरो नी हो जालो।

¹⁸ और जो कोई अपूनी स्यैनि स छोड़भेरन दुसरा का दगाड़ ब्या करछो उ ब्यभिचार करछो, और जो कोई उ छोड़िना कि स्यैनि का दगाड़ ब्या करछो उले ब्यभिचार करछो।

धनी आदिमी और गरीब लाजर

¹⁹ फिर यीशु ले एक कहानी सुणाछ, “एक धनवान आदिमी छ्यो, जो मेहंगा कपाड़ा पैन छ्यो और हर रोज आलिशान जीन्दगी जीछो, और बड़िया दावत को खानो खाछ्यो।

²⁰ और धनवाना का घरा का दवारा में लाजर नामोको एक गरीब पड़ीनाको रूछ्यो, उक पुरो आंग में घ ले भरिना को छ्यो।

²¹ और उ चांछ्यो कि धनवान आदिमी का खाना का बाद जो जूठो बच छ्यो, उले अपूनो पेट भर सकूँ; या तक कि कुकुर ले उको घ चाँटछ्या।

²² फिर कुछ दिनून का इसो भ्योछ कि उ गरीब लाजर मरग्यो, और स्वर्गदूतून ले ऊस लीभेरन हमार पूर्खा अब्राहम का दगाड़ आदर सम्मान का जाग में पुजाछ, और उ धनवान आदिमी ले मर ग्यो, और उको दफन कफन करछ्य।

²³ और जब उले अधलोक में पीड़ा में पड़भेरन अपून नजर मलि के कर्यान, त दूर भटे उले लाजर स अब्राहमा का दगाड़ आदर-सम्मान का जाग में बैठिना को देखछ्य।

²⁴ और उले जोरले धध्याभेरन क्योछ, ‘हे हमार पिता अब्राहम मैंमें दया करभेरन लाजर स भेज दी, ताकि उ अपून आंगुलो पानि में भिगा भेरन म्यारा जिबाड़ा स ठन्डो करौ, क्याखिनकि मैं यो आगा में भौत तड़पून मरियूँ।’

²⁵ लेकिन अब्राहम ले क्योछ, च्याला याद कर तैं अपून जीवन में सब बड़िया चीजून ली चुकगै छै, और उसीकैं लाजर स धरती में बुरी चीज मिल्यान, लेकिन अब उ याँ शान्ति पान मरियोछ, और तैं आग में भौत तड़पून मरेछै।

²⁶ और इन सब बातुन छोड़िभेरन हमार और त्यारा बीच में एक भौत भूलो गड्डा बनिना को छै, कि जो याँ है उ पार तुमार पास जानो चाँछो, उ नै जा सकनो; और कोई ताँ भटे हमार पास नै आ सकनो।

²⁷ तब उ धनवान ले क्योछ, ‘हे हमार पिता मैं तुमूनथैं विनती करछूँ, कि तुम लाजर स धरती में म्यारा बबा का घर भेजि दी।

²⁸ क्याखिनकि म्यारा पाँच भाई छन, मैं चाँछू, कि उ जाभेरन उन बातुन की चेतावनी दे, इसो नै हो कि उन ले यो तखलीफ का दीन वाली जाग में आ ज्यून।

²⁹ अब्राहम ले उथैं क्योछ, उनार पास चेतावनी दीन खिन त मूसा का नियम और परमेश्वरो को संदेश दिनवालान का किताब छन, उन उनेरि सुणून चैछो और पश्चताप करून चैछो।’

³⁰ तब उ धनवान ले क्योछ, ‘हे हमार पिता अब्राहम, अगर कोई मरिन आदिमी में भटे कोई उनार पास जाभेरन उनून चेतावनी दीनो, तो उन अपून पापून खिन पश्चताप कराला।

³¹ तब अब्राहम ले उथैं क्योछ, जब उन मूसा और परमेश्वरो को संदेश दिनवालान का हुकुम नी मानून, अगर याँ भटे मरिना को आदिमी ज्यून हो भेरन उनार पास जालो त उन उकी बातुन में विश्वास नी करून’।”