लूका 10 - सोरियाली नय्या नियम

सत्तर शिष्यून को भेजि जानो

¹ इन बातुन का बाद यीशु ले सत्तर और शिष्यून चुनियान और नियुक्त कर्यान, और जो-जो शैहर और जागान जाँ उले खुद जाना की योजना बना राखछी, वाँ उले उनून द्वी-द्वी करभेरन अपून है पैलि भेजियान।

² और उनूनथैं क्योछ, “खेती तैय्यार छै, लेकिन मजदूर कम छन, येक कारण गाड़ा का मालिक थैं बिनती करा कि उ अपून गाड़ान की फसल काटून खिन मजदूर भेजो।

³ जा और देखा मैं तुमून भेडून का नियाती भेड़ियान का पास भेजछूँ।

⁴ और अपून बाँट खिन नै त कोई थैला, नै त झ्वाला लिया, और नै जूता लिया, और नै बाटा में कैस ढोक दीया।

⁵ और जैका ले घर जाला, पैलि कया, कि ‘उ घर में परमेश्वरे की शान्ति हो।’

⁶ अगर उ घर में परमेश्वर की शान्ति पान वाला लोग होला, त उ शान्ति उ घर में ठहरली। अगर कोई नी होलो त उ तुमार पास वापस आ जालि।

⁷ और उई घर में मेहमान बनभेरन रया, और जो केले तुमून खान खिन द्याला, उई खाया और पिया, क्याखिनकि मजदूर स उकी मजूरी मिलून चैछी, और घर-घर जन जाया।

⁸ जो ले गौं या शैहर में जाला, और वाँ का लोग तुमोरो स्वागत करून, और जो कुछ उन तुमून खान खिन द्याला उई खाया।

⁹ और वाँ का बिमारून चंगा करा, और उनूनथैं कया, परमेश्वरो को राज्य तुमार नजिक आग्योछ।

¹⁰ लेकिन जो ले गौं या शैहर में जाँछा, और वाँ का लोग तुमोरो आदर नै कराला, त उनार बजारून में जाभेरन कया,

¹¹ तुमार याँ को माटो जो हमार खुटान में लागि र्योछ, हम तुमार सामुनि झाड़ी दीनू, फिरले यो जाँणलि कि परमेश्वरो को राज्य तुमार नजिक आग्योछ।

¹² मैं तुमूनथैं कुछूँ, कि उ दिना नगरा का लोगून की हालत सदोम शैहरा का लोगून की हालत भटे ज्यादा खराब होलि।

अविश्वासीन नगरून में हाय

¹³ हाय खुराजीन शैहर, और, बैतसैदा शैहरा का लोगून में! जो चमत्कारा का काम तुमून में करि ग्यान अगर उ सोर और सिदोन शैहर में करि जाना, त यो दिखून खिन वाँ का लोग भौत पैलि टाट ओढ़ी भेरन और अपून मलि में छारो छिड़क भेरन कभै अपून पापून भटे पश्चताप कर लीन।

¹⁴ लेकिन परमेश्वर न्याय का दिन जो सजा सोर और सिदोन शैहरा का लोगून द्योलो, उ सजा तुमेरि सजा भटे कम होलि।

¹⁵ और हे कफरनहूम गौं, क्या तैं स्वर्ग तक ऊचो करि जालै? तैं त अधलोक है ले तलि करि जालै।

¹⁶ जो तुमेरि सुणछो, उ मेरि सुणछो; और जो तुमून तुच्छ समझछो, उ मैंस तुच्छ समझछो; और जो मैंस तुच्छ समझछो, उ म्यारा भजून वाला को तुच्छ समझछो।”

सत्तर शिष्यून को वापस उनो

¹⁷ जब उन सत्तर शिष्य जिनून द्वी-द्वी करभेरन यीशु ले भेजिना का छ्यो, उन भौत खुश हो भेरन वापस आयान और यीशु थैं कुन लाग्यान, “हे प्रभु, भूतून ले हमरि बात मानछै जब हमून ले उनून त्यारा नाम ले हुकुम दीछ।”

¹⁸ यीशु ले उनूनथैं क्योछ, “ जब दुष्टआत्मान ले तुमोरो हुकुम नै मान्यो, त मैंले शैतान स अचानक आकाश भटे बिजली नियाती स्वर्ग भटे खितीन ग्योछ।

¹⁹ देखा मैंले तुमून स्याँपून और बिच्छून कूचलना को और शैतान जो तुमोरो शत्रु छै, उकी सारी सामर्थ में अधिकार दी राखछै; और कोई ले चीज ले तुमून केले नुकशान नी हो।

²⁰ तब ले तुम यो बात ले खुश जन हो कि भूत तुमार बश में छै, लेकिन यो बात ले खुश हो कि तुमार नाम स्वर्ग में लिखीनाका छन।”

यीशु को खुश हुनो

²¹ तब उई बखत यीशु पवित्र आत्मा में हो भेरन खुशी ले भरीग्यो, और कूछो, हे पिता, स्वर्ग और धरतीका प्रभु, मैं तेरो धन्यवाद करछूँ कि तैले इन बातुन बुद्धिमानून और समझदारून भटे दूर राखछ्य और नान्तिना में प्रगट करछ्य। होई, हे बाब तैंस योई निको लागछ्य।

²² म्यारा बबा ले मैंस सब कुछ दी हलछ्य; और कोई यो नै जाणनो कि च्योलो को छै, केवल बाब जाणनान, और बबा स ले कोई नै जाणनो, केवल च्योलो का अलावा जैमें च्योलो प्रगट करून चौ।

²³ तब यीशु ले अपून शिष्यून का तरफ देखिभेरन एकान्त में क्योछ, धन्य छन उ आँखा, जो बातुन तुम देखन मरैछा उन ले देखनान।

²⁴ क्याखिनकि मैं तुमूनथैं कुछूँ कि परमेश्वरो को संदेश दिनवाला भौत लोग और राजान ले लै चाँछ कि जो बात तुम देखून मरछा उन ले देखन चाँछ्या, लेकिन नै देखी पाया, और जो बात तुम सुणछा, उन सुणन चाँछ्या लेकिन नै सुण पाया।

दयालु सामरी को उदारण

²⁵ एक दिन जब यीशु लोगून शिक्षा दीन मरेछ्या, तब मूसा का नियम सिखून वाला में भटे एक आदिमी ले यीशुस परीक्षा लीन खिन पुछ्छै, गुरू जी मैं कि काम करूँ, जेले मैंस परमेश्वर अनन्त जीवन द्योलो?

²⁶ यीशु ले उथैं क्योछ, “मूसा का नियम में कि लिखीना को छै? तैं कसीकैं समझ छै?”

²⁷ उले जबाब दीछ, मूसा का नियम में इसो लिखीना को छै कि, तैं अपून प्रभु परमेश्वर थैं अपून पुर मन ले और पुर प्राण ले और पुरी ताकतले और पुर बुद्धि ले प्रेम राख, और अपून पड़ोसी का दगाड़ अपूनो जसो प्रेम राख।

²⁸ तब यीशु ले उथैं क्योछ, तैं ठीक कूंछै इसो तैले कर ले त अनन्त जीवन पालै।

²⁹ लेकिन उ अपनास धर्मी समझभेरन यीशु थैं पूछ्छय, त म्येरो पड़ोसी को छै?

³⁰ यीशु ले यो बात सुणभेरन कहानी सुणाछ, सुण “एक आदिमी यरूशलम शैहर भटे यरीहो शैहर खिन जान मरछ्यो, तब डाकून ले ऊस पकड़ भेरन उक कपाड़ा और जो कुछ उक पास छ्यो लुट लीछ, और मार-पीट करभेरन ऊस अधमरो करभेरन छोड़ी ग्यान।

³¹ और फिर इसो हुछो कि उई बाटा भटे एक यहूदी याजक जानमरेछ्यो, लेकिन उ देखिभेरन उकी मद्दत नै करूनो और वाँ भटे न्हैग्यो।

³² इसीकैं एक लेवी आदिमी ले उ जाग में आछ, जो मन्दिर में काम करछ्यो, और उले ऊस देखिभेरन उकी मद्दत नै करूनो और वाँ भटे न्हैग्यो।

³³ फिर बाद में सामरी प्रदेश को एक आदिमी उ बाटा भटे हो भेरन जानमरेछ्यो, और ऊस जख्मी देखिभेरन तरस उछो।

³⁴ और उक पास आभेरन उक घौन में तेल और दवै लगाभेरन पट्टी बाँद छो, और ऊस अपून गधा में बैठाभेरन अपून दगाड़ लियूछो और एक किराया में कमरा लीभेरन रात भर उकी देखभाल करछो।

³⁵ दुसारा दिन उले कमरा का मालिकस द्वी दीनार दीयान, जो द्वी दिनाकी मजूरी का बराबर छै, और उथैं क्योछ, ‘येको इलाज ठीक ढ़गले करे, और येका अलावा तुमोरो जेले खर्च लागोलो में वापस आभेरन तैंस दीयूलो।

³⁶ तब यीशु ले उथैं पूछ्छय, अब त्यारा समझ में जेंमे डाकून ले हमला करछ्य, इन तीनून में भटे को उको पड़ोसी भ्यो?

³⁷ उले क्योछ, उई जेले उमें दया करछ्य। यीशु ले उथैं क्योछ, जा तैले इसो कर।

मार्था और मरियम का घर यीशु

³⁸ जब यीशु और उनार शिष्य बाट में हिटनै, तब एक गौं में पुजनान, त उ गौं में मार्था नामेंकी स्यैनि छी, जेले यीशु स अपून घर बुलाभेरन स्वागत करछ्य।

³⁹ और मार्था की एक बैनि छी जेको नाम मरियम छ्यो। उ यीशुका पास बैठभेरन उकी बातुन सुणूनमरेछी।

⁴⁰ लेकिन मार्था अपून घराका कामून कि भौत चिन्ता करूनमरेछी, और यीशुका पास आभेरन कुन लागछी, हे प्रभु क्या तैंस मेरि चिन्ता नाहतिनी कि मेरि बैनि ले मैंस घरो को सब करून खिन येकली छोड़ दीछ? येक कारण उथैं क, कि मेरि मद्दत करो।

⁴¹ प्रभु यीशु ले ऊस जबाब दीछ, हे मार्था, हे मार्था तैं भौत बातुन की चिन्ता करछी और भौत डर छी।

⁴² लेकिन एक बात जरूरी छै, कि मरियमले अपून खिन बड़िया जाग चुन है छ जो उथैं कोई नै छीन सकनो।