लूका 1 - सोरियाली नय्या नियम

परिचय

¹ लूका लिखछो, हे श्रीमान थियुफिलुस जी, भौत लोगून ले हमार बीच होईना का बातुन का बारिमें एक दस्तावेज लिखना की कोशिश करछै।

² उनूनले ठीक उई लिखछै जो उन लोगून का द्वारा हमून बताई ग्योछ, जिनूनले यीशु की सेवकाई स शुरूवाद भटे देखीना को छ्यो, और जो बाद में परमेश्वरा का वचना का दास बन ग्या।

³ मैंले ले इन बातुन की ध्यान ले जाँच करछै, और मैंस यो निको लागछ कि मैं तुमून खिन उन बितिनाक का हुना का बातुन का अनुसार एक-एक करभेरन लिखूँ।

⁴ और मैं येक कारण लिखूनमरयूँ, ताकि तुमून हरेक बात की पुरी सच्चाई पत्तो चलो, जो लोगून का द्वारा तुमून बताई गैछ।

यहूना की पैद हुना की घोषणा

⁵ यो उ बखत की छै, जब यहूदिया प्रदेश में हेरोदेस राजा को राज्य छ्यो, वाँ अबिय्याह नाम में बनिनाक याजकून का दल बनिना को छ्यो उमें जकर्याह नामोको एक याजक छ्यो, उ और उकी घरवाली द्वीवै हारूनाक वंशाक छ्या, और उकी घरवाली को नाम इलीशिबा छ्यो।

⁶ जकर्याह और उकी घरवाली परमेश्वरा का नजरून में धर्मी छ्या; और प्रभु की सब आज्ञा और नियमून मानछ्या।

⁷ लेकिन उनेरि कोई संतान नी छी, क्याखिनकि इलीशिबा बाँझ छी, और उन बुढ़ा हो गैछ्या।

⁸ जब जकर्याह अपून मण्डली का दगाड़ यरूशलमा का मन्दिर में परमेश्वरा का सामुनि याजक को काम करछ्यो, क्याखिनकि उ हफ्ता में उकी मण्डली का याजकून की सेवा करना की बारी छी।

⁹ त याजकून का रीति का अनुसार जकर्याह नाम की चट्ठी निकल छी, कि उ प्रभुक मन्दिर में धूप जलौ।

¹⁰ जकर्याह का धूप जलून बखत मण्डली का सब लोग भ्यार मन्दिराक खाला में प्रार्थना करून मरेछ्या।

¹¹ तब प्रभु को एक स्वर्गदूत वेदी का दैन तरफ प्रगट भ्योछ और जकर्याह स दिखाई दीछ।

¹² और जकर्याह ऊस देखिभेरन घबरा ग्यो और उक मलिमें भौत डर छा ग्यो।

¹³ लेकिन स्वर्गदूत ले उथैं क्योछ, “हे जकर्याह, डर जन क्याखिनकि परमेश्वर ले तेरि प्रार्थना सुण हलछ्य और तेरि घरवाली इलीशिबा भटे तैंखिन एक च्योलो पैद होलो, और तैं उको नाम यहूना राखे।”

¹⁴ और उक पैद हुना में तुम त खुश होला, लेकिन भौत लोग ले खुश होला।

¹⁵ क्याखिनकि उ प्रभुक नजरून में महान होलो, और उ अंगूर को रस और शराब कभै नी पियोलो, और अपून जन्म है पैलिकैं भटे पवित्र आत्मा भरि जालो।

¹⁶ उ इस्राएलाक कई लोगून उनार प्रभु परमेश्वरा का पास वापस ल्यालो।

¹⁷ यहूना एक इसो आदिमी होलो जो परमेश्वरो को संदेश दिनवाला एलिय्याह नियाती आत्मा में सामर्थी होलो। उ प्रभु को बाटो तैय्यार करोलो। और ईजा-बाबको उनार संतानून का दगाड़ मेल करालो, और आज्ञा नै मानून वाला लोगून परमेश्वर की आज्ञान मानून सिखालो, और परमेश्वर खिन एक निकी प्रजा तैय्यार करोलो।

¹⁸ जकर्याह ले स्वर्गदूत थैं पुछ्छै, “मैं यो बात में कसीकैं यकीन करूँ? क्याखिन मैं और मेरि घरवाली त बुढ़ा हो ग्या।”

¹⁹ स्वर्गदूत ले ऊस जबाब दीछ, “मैं जिब्राईल स्वर्गदूत छूँ, जो परमेश्वरा का सामुनि ठाड़ रूछूँ। और परमेश्वर ले मैंस तैथैं बात करून खिन और तैंस यो सुसमाचार दिन खिन भेज रैछ।

²⁰ और देख, जै दिन तक यो बात पुरी नी हो होलि, तैं उ दिन तक तैं गूँगो रौले, और बोल नी सकैं; येक कारण तैले मेरि बातुन की जो अपून बखत में पुरी होलि, उनूनमें तैंले विश्वास नै कर्यो।”

²¹ और जो लोग मन्दिर का खाला में जकर्याह को इन्तजार करून मरेछ्या, और उन लोग हैरान छ्या कि जकर्याह स मन्दिर में इदुक देर क्याखिन हो गैछ?

²² मन्दिर भटे भ्यार आभेरन जब जकर्याह उनार दगाड़ बात नै कर सक्यो, त उन लोग समझ ग्या कि उले मन्दिर कोई दर्शन देखछै। और उ हाते ले इशारा करनै र्योछ, और मुँख ले के नै बोल सक्यो।

²³ मन्दिर में जकर्याह को एक याजक को सेवा बखत पुरो हो ग्यो, उ यरूशलम भटे अपून घर खिन न्हैजाछो।

²⁴ कुछ दिनून का बाद में जकर्याह कि घरवाली इलीशिबा गर्भवती भैछ; लेकिन उले अपूनास पाँच मैंन तक लोगून है लुका भेरन राँख छै।

²⁵ और उले क्योछ, “कि समाज में म्येरो अपमान दूर करून खिन प्रभु ले म्यारा मलि में दया करभेरन मैं खिन इसो करछय।”

स्वर्गदूत को मरियमा का सामुनि प्रगट हुनो

²⁶ जब इलीशिबा छयूं मैंनो लागछै, तब परमेश्वरा का तरफ भटे जिब्राईल स्वर्गदूत गलील प्रदेशा का नासरत गौं में, एक कुँवारी चेलि का पास भेजि ग्यो।

²⁷ जैकी मँगनी यूसुफ नामाका लड़का का दगाड़ हो रैछ, और उ दाऊद राजा को वंश को छ्यो, और उ कुँवारी चेलि को नाम मरियम छ्यो।

²⁸ और स्वर्गदूत ले मरियमा का पास आभेरन क्योछ, “मरियम तैंस म्येरो नमस्कार, आनन्द और जय तेरि हो, तैमें परमेश्वर की दया भौत हो रैछ, और उ त्यारा दगाड़ छै।”

²⁹ जब मरियम ले स्वर्गदूत की बात सुणछै त उ भौत ज्यादा घबरा गै, और मन में सोचून लागछ्य यो नमस्कारो को की मतलब छै?

³⁰ तब स्वर्गदूत ले उथैं क्योछ, “हे मरियम, जन डर, क्याखिनकि परमेश्वर कि दया तैमें हो रैछ।

³¹ और देख, तैं गर्भवती होलि, और तैं एक च्याला स जन्म देली, तैं उको नाम ‘यीशु’ राखे।

³² और उ महान होलो, और उ परमप्रधान परमेश्वरो को च्योलो कहलालो, और प्रभु परमेश्वर ऊस उक पूर्खा दाऊद राजा को जसो राजा बनालो।

³³ और उ याकूबा का वंश में हमेशा राज्य करोलो, और उक राज्य को कभै अन्त नी होलो।”

³⁴ मरियम ले स्वर्गदूत थैं क्योछ, “यो कसीकैं हो सकछो? क्याखिनकि म्येरो त ब्या ले नै हो र्यो।”

³⁵ स्वर्गदूत ले मरियम स जबाब दीछ, “तैंमें पवित्र आत्मा उतरोलो और परमप्रधान परमेश्वर की सामर्थ तैमें छाया करली; और तैंमें भटे जन्म लिनवालो बालक पवित्र होलो, और परमेश्वरोको च्योलो कहलालो।

³⁶ और सुण, तेरि कुल की इलीशिबा को ले बुढ़ापा में च्योलो हुन वालो छै, उ जो बाँझ छी, उको छयूं मैंन छै।

³⁷ किलैकी परमेश्वर खिन केले काम कठिन नाहातिन।”

³⁸ तब मरियमले क्योछ, “देख मैं प्रभु की दासी छूँ, जसो तैं कुँछै, ऊसो म्यारा दगाड़ हो।” और तब स्वर्गदूत वाँ भटे न्हैजाछो।

मरियम को इलीशिबा स मिलन खिन जानो

³⁹ थ्वाड़ा दिनून का बाद मरियम तैय्यार हो भेरन वाँ भटे यहूदिया प्रदेशा का पहाड़ी इलाका का नगर में जकर्याह घर जाछी।

⁴⁰ और वाँ पुजभेरन जकर्याह की घरवाली इलीशिबा स नमस्कार करछ्य।

⁴¹ और जसीकैं इलीशिबा ले मरियम को नमस्कार सुणछ्य, उसीकैं बच्चा उक पेट में उछलछो, और इलीशिबा पवित्र आत्मा ले भरि गै।

⁴² और उ मरियम थैं बड़ी जोरले कुन लागछी, तैं सब स्यैनिन में धन्य छी, और धन्य छै उ बच्चा जैस तैं जन्म दीन वाली छी।

⁴³ म्येरो यो सौभाग्य छै, कि म्यारा प्रभु की ईजा मैंथैं मिलन खिन आ रैछ।

⁴⁴ क्याखिनकि देख, जसीकैं मैंले त्यारा नमस्कार की आवाज सुणछ्य, उसीकैं म्यारा पेट में बच्चा खुशी ले उछल पड़छ्य।

⁴⁵ तैं धन्य छी क्याखिनकि तैंले विश्वास करछ्य, कि प्रभु ले जो क्योछ, उ ऊस पुर करोलो।

मरियम को भजन

⁴⁶ तब मरियम ले क्योछ, “मैं परमेश्वर की स्तुति करछूँ।

⁴⁷ और मेरि आत्मा म्यारा उद्धार करूनवाला परमेश्वर भटे खुश भैछ।

⁴⁸ क्याखिनकि उले अपूनी दासी की दीनता स देखिभेरन दया करछ्य, येक कारण सुणा, अब भटे सब युगा का लोग तैंस धन्य कौला।

⁴⁹ क्याखिनकि उ सर्वशक्तिमान परमेश्वर मैं खिन ठुल-ठुल काम करिना का छन। और उको नाम पवित्र छै।

⁵⁰ जो लोग परमेश्वरो को डर मान्नान, उनूनमें उकी दया पीढ़ी भटे पीढ़ीन तक बनिना की रूछी।

⁵¹ और उ अपूनी महान सामर्थ को उपयोग महान काम करून खिन करछो, और जो अपून-आप में घमण्ड करनान, उनून उ तितर-बितर कर द्योलो।

⁵² परमेश्वर राजान थैं राज्य करना को अधिकार ली लीछो, और दीन लोगून को उठूछो।

⁵³ और उले भुखा लोगून बड़िया खाना ले तृप्त करछ, और धनवानून खाली हात निकाल दीछ।

⁵⁴ उले हमार पूर्वजून थैं करिना का वादा स याद करछ्य, और अपूनो इस्राएल देशाक लोगून की मद्दत करून खिन आ रियो छै।

⁵⁵ उले अब्राहम और उक वंश में हमेशा खिन दया दिखून खिन याद करछ्य।”

⁵⁶ मरियम लगभग तीन मैंना इलीशिबा दगाड़ रैभेरन अपूनो घर खिन वापस आ जाछी।

यहूना बपतिस्मा दिनवालो को जन्म

⁵⁷ तब इलीशिबा का नन्तिनो पैद हुना को बखत पुरो भ्योछ, और उले एक च्याला स जन्म दीछ।

⁵⁸ तब उक पड़ोसिन ले और रिस्तदारून ले सुणछै, कि परमेश्वर ले उमें अपूनी बड़ी दया करछ्य, तब उनूनले इलीशिबाक दगाड़ खुशी मनाछ।

⁵⁹ और अठूँ दिन उन उ नानतिनास खतना करून खिन ल्यान। उन उको नाम उक बबा का नाम पर जकर्याह राखून चाँछ्या।

⁶⁰ लेकिन नानतिना की ईजा इलीशिबा ले क्योछ, “येको नाम जकर्याह नै, बल्कि यहूना राखि जौ।”

⁶¹ तब उन लोगून ले क्योछ, “त्यारा कुल में केको ले यो नाम नाहातिन।”

⁶² तब उनूनले जकर्याह थैं ईशार भेरन पुछ्छै, कि तैं येको नाम कि राखून चाँछै?

⁶³ तब जकर्याह ले पाठ्ठी मंगाभेरन लिखछ्य, “येको नाम यहूना राखि जौ।” और सब लोग यो बात ले ताजुब में पड़ ग्या।

⁶⁴ उई बखत उकी आवाज लौट आछ, और उक जिबाड़ा का बंधन खुल ग्या और उ परमेश्वरे की महिमा करून लागछो।

⁶⁵ और जकर्याह का आश-पास रून वाला लोगून में डर छा ग्यो, और उन सब बातुन की चर्चा यहूदिया प्रदेशा का सार पहाड़ी इलाका में फैल गै।

⁶⁶ और सब सुणून वाला अपूनो-अपूनो मन में विचार करभेरन कुंनान, “यो नान्तिनो कसो होलो?” क्याखिनकि प्रभु की सामर्थ उक दगाड़ छी।

जकर्याह को भजन

⁶⁷ और उ नान्तिन को बाब जकर्याह पवित्र आत्मा ले भरि भेरन, भविष्यवाणी करून लागछो।

⁶⁸ “धन्य छन प्रभु, इस्राएलाक परमेश्वर की स्तुति करा, क्याखिनकि उ अपून लोगून में दया करून खिन आ र्योछ, और उनोरो उद्धार करछ्य।

⁶⁹ और उले अपून सेवक दाऊदाका वंश में हमून खिन एक शक्तिशाली मुक्तिदाता स भेज छै।

⁷⁰ भौत पैलि भटे, प्रभु अपून संदेश दीन वाला पवित्र लोगून का द्वारा यो कुँनै आ र्योछ,

⁷¹ दुश्मनून और उन सबून है जो हमून खिन बैर राखनान उनून भटे बचा राँखछ्य।

⁷² उ अपूनी पवित्र वाचा स याद करभेरन हमार पुरखान में दया करोलो।

⁷³ और उले कसम खाभेरन हमार पूर्वज अब्राहम थैं कईना को छ्यो,

⁷⁴ कि उ हमून हमार दुश्मनून का हात भटे बचाल,

⁷⁵ उक सामुनि पवित्र और धर्मी हो भेरन, जीवन भर निडर हो भेरन उकी सेवा करनै रू।

⁷⁶ हे बालक, तैं परमेश्वरो को संदेश दिनवाला कहलालै। क्याखिनकि तैं प्रभु को बाटो तैय्यार करून खिन उक अघिल-अघिल हिटलै, और उक उन खिन लोगून तैय्यार करोलो।

⁷⁷ और परमेश्वरा का लोगून का पापून माफ करना का द्वारा उनून मुक्ति का बारिमें ज्ञान द्योलो।

⁷⁸ हमार परमेश्वरे की हमून में इसी दया भैछ, जसीकैं सूरज हमून रोशनी दीन खिन चमकछो, उसीकैं मसीह ले हमून खिन स्वर्ग भटे आलो।

⁷⁹ पाप में जीन्दगी जीन वालान और मौत का खतरा में बैठन वालान उज्यालो द्योलो, और यो उज्यालो हमार जीन्दगी स ठीक बाटा में लिजालो।”

⁸⁰ और जकर्याह को च्योलो यहूना ठूलो हुनै ग्यो और आत्मा में ले ताकतवर हुनै ग्यो, और इस्राएली लोगून का बीच में उपदेश दीन है पैलि तक बिरान जागा में रूछो।