यहूना 19 - सोरियाली नय्या नियम

कोड़ा लगून और मजाक उड़ूनान

¹ यो बात में पिलातुस ले अपून सिपाईन हुकुम दीछ कि यीशुस ली जाभेरन कोड़ा मारून।

² और सिपाईन ले यीशुस बैंगनी रंगो को कपाड़ा पैनायान, जस एक राजा पैनछो, और काँणान को मुकुट बनाभेरन यीशुका ख्वार में लगा दीछ।

³ और उक पास आभेरन कुन लाग्यान, “हे यहूदीन का राजा जी, प्रणाम!” और ऊस थप्पड़ मारून लाग्यान।

⁴ तब पिलातुस ले फिर भ्यार निकल भेरन लोगूनथैं क्योछ, “देखा, मैं ऊस तुमार पास भ्यार लियून मरयूँ; ताकि तुम जाणली कि मैंस उमें केले दोष नै मिल्यो।”

⁵ तब यीशुस काँणाको मुकुट और बैजनी रंगोको कपाड़ा पैना भेरन भ्यार ल्यान और पिलातुस ले उनूनथैं क्योछ, “यो आदिमी स देखा।”

⁶ जब प्रधान याजकून ले और मन्दिरा का रखवालान ले ऊस देखछ्य, त उनूनले चिल्ला भेरन कुन लाग्यान, “येस सूली में चढ़ा, सूली में चढ़ा, तब पिलातुस ले उनूनथैं क्योछ, तुमी येस ली जाभेरन सूली में चढ़ा; क्याखिनकि मैं उमें कोई दोष नै पानू।”

⁷ यहूदी अगुवान ले ऊस जबाब दीछ, “हमार ले नियम-कानून छन और उ नियम-कानून का अनुसार येकी सजा मौतेकी लायक छै, क्याखिन उ अपून-आपस परमेश्वरो को च्योलो बतूछो।”

⁸ जब पिलातुस ले यो बात सुणियान त उ भौत डर ग्यो।

⁹ और फिर महला का भितर जाभेरन यीशुथै क्योछ, “तैं काँको छै?” लेकिन यीशु ले ऊस केले जबाब नै दीयो।

¹⁰ पिलातुस ले उथैं क्योछ, “तैं जबाब किलैं नै दीनै? क्या तैं नै जाणने कि तैंस छोड़ दीना को अधिकार मैंस छै, और तैंस सूली में चढ़ूनाको ले मैंस अधिकार छै।”

¹¹ यीशु ले जवाब दीछ, अगर तैंस परमेश्वरा का तरफ भटे नी दिईजानो, त तेरो मैंमें के अधिकार नै हुनो; येक कारण जेलै मैंस त्यार हवाला करछ्य, उको पाप ज्यादा छै।

¹² यो बात में पिलातुस ले ऊस छोड़ दिन चाछ, लेकिन यहूदी लोगून ले चिल्ला-चिल्लाभेरन क्योछ, “अगर तैं तैंस छोड़ देले, त तेरो भाईचारा कैसर महाराजा का तरफ भटे नाहतिनी। जो कोई अपून-आपस राजा बनूना को दावा करछ्यो उ कैसर महाराजा को दुश्मन छै।”

¹³ यो बातुन सुणिभेरन पिलातुस यीशुस भ्यार ल्याछ और वाँ न्याय का सिंहासन में बैठछो, जो कि ढूंगा का चबूतरा छ्यो, जैस इब्रानी में गब्बता कई जाछो।

¹⁴ यो फसह त्यार को हफ्ता की तैंयारी को दिन छ्यो, और लगभग छाकाला को बखत छ्यो; तब उले यहूदी लोगूनथैं क्योछ, “देखा, योई छै, तुमोरो राजा!”

¹⁵ लेकिन उन चिल्ला लाग्यान, “येस मार डाल! येस मार डाल! ऊस सूली में चढ़ा! ऊस सूली में चढ़ा!” पिलातुस ले उनूनथैं क्योछ, “क्या मैं तुमार राजा स सूली में चढ़ूई?” प्रधान याजकून ले जवाब दीछ, “महाराजा स छोड़ हमोरो और कोई राजा नाहातिन।”

¹⁶ तब पिलातुस ले यीशु स सूली में चढ़ून खिन उनार हवला कर दीछ।

यीशुस क्रूस में चढ़ून

¹⁷ तब सिपाईन ले यीशुस पकड़ लीछ, और उनूनले ऊस अपूनो सूली खुद उठाछ और यरूशलम शैहरा का भ्यार, “खोपड़ी का नामक जाग में ली ग्यान,” जैस इब्रानी में गुलगुता कुंनान।

¹⁸ वाँ उनूनले उक दगाड़ द्वी आदिमीन ले सूली में चढ़ाछ, एकेस एक तरफ और दुसरा स दुसरा तरफ और बीच में यीशुस।

¹⁹ और राज्यपाल पिलातुस ले यीशु ख्वारा एक दोषपत्र लिखभेरन सूली में टाँगी दीछ और उमें यो लिखीना को छ्यो, “नासरत गौं को यीशु यहूदीन को राजा।”

²⁰ यो दोषपत्र भौत यहूदीन लोगून ले पढ़छ्य, क्याखिनकि जाँ यीशु सूली में चढ़ाई ग्यो छ्यो, उ जाग यरूशलम शैहरा का पास छी, और उ पत्र इब्रानी और लतीनी और यूनानी में लिखीना को छ्यो।

²¹ तब यहूदीन का प्रधान याजकून ले पिलातुस थैं क्योछ, “यहूदीन को राजा जन लिख, बल्कि उले क्योछ, मैं यहूदीन को राजा छूँ।”

²² पिलातुस ले जवाब दीछ, “मैंले जो लिख दीछ, उ बदली नी जालो।”

²³ जब सिपाई ले यीशुस सूली में चढ़ा दीछ, त उक कपाड़ा लीभेरन उक चार टुकूड़ा कर्यान, और चारू सिपाईन ले एक-एक हिस्सा ली लीछ। और भ्यार वालो कुरताले ली लीछ, कुरता स सिलीना का नी छ्यो, बल्कि मलि भटे तलि एक ई कपाड़ा को बनिनाको छ्यो।

²⁴ येक कारण सिपाई ले एक-दुसारा थैं क्योछ, “हम येस नै फाड़ना, लेकिन येमें चिठ्ठी डालनू कि उ कैको होलो।” कि पवित्रशास्त्र में जो लिखी ग्योछ उ बात पुरी हो, “उनूनले म्यारा कपाड़ा आपस में बाण लियान और म्यारा कपाड़ान में चिठ्ठी डालछ्य, उ योई छै जो सिपाईन ले वाँ करछ्य।”

यीशु को अपूनी ईजा खिन इन्तजाम

²⁵ लेकिन यीशु का सूली का नजिक उकी ईजा और उकी ईजा की बैनि, क्लोपासकि स्यैनि और मरियम मगदलीनी जो मगदला गौं छी वाँ ठाड़ छी।

²⁶ यीशु ले अपूनी ईजा और उ शिष्य थैं जैथैं उ प्रेम राखछ्यो सामुनि ठाड़ देखिभेरन अपूनी ईजा थैं क्योछ “हे ईजा, देख, यो तेरो च्योलो छै।”

²⁷ तब उले उ शिष्य थैं क्योछ, “देख, यो तेरि ईजा छै।” और उई बखत भटे उ शिष्य ले, ऊस परिवार को हिस्सा बना लीछ।

यीशु की मौत

²⁸ उक बाद यीशु ले यो जाणिभेरन कि अब सब कुछ पुरो कर हालछै; येक कारण पवित्रशास्त्र की बात सच्ची साबित हो, यीशु ले क्योछ, “मैं प्यासो छूँ।”

²⁹ वाँ सिरका भरिना को एक भाणो राखिना को छ्यो, तब कैले सिरका में सम्पंज भिगा भेरन जूफा डन्डा में बाँदीभेरन ऊस चुसून खिन दीछ।

³⁰ जब यीशु ले उ सिरका चाँख छै, त क्योछ, “ अब सब कुछ पुरो हो ग्योछ,” और खोरो झुकाभेरन उले प्राण छोड़ दीयान।

भाला स पसली मारून

³¹ और उ तैंयारी को दिन छ्यो, दुसारा दिन सबत और फसह पर्व द्वीवै छ्या। यो यहूदी लोगून को खास दिन छ्यो, उन नी चाँछ्या कि यो दिन का दौरान लाश सूली मेंई रौ। येक कारण उनूनले राज्यपाल पिलातुस थैं बिनती करछ्य, “कि उन आदिमीन का टांग टोड़ी दी जौ, और ताकि उनेरि मौत जल्दी हो ज्यो, और लाशून सूली है तलि उतारी जा सकौं।”

³² येक कारण सिपाईन ले आभेरन उन आदिमीन में भटे पैलि एक्का टांग टोनियान और फिर दुसरा का ले, जो उक दगाड़ सूली में चढ़ाईना को छ्यो।

³³ लेकिन जब यीशुका पास आभेरन देखछ्य कि उ मर ग्योछ, त उक टांग नै टोड़िया।

³⁴ लेकिन सिपाईन में भटे एकले भाला ले यीशुका पसली में कर छै, और उमें भटे तुरन्त खून और पानि निकलछ्य।

³⁵ जै आदिमी ले यो सब कुछ देखछ्य, उले गवै दीछ, ताकि तुमूले यीशु में विश्वास कर सका। और उकी गवै सच्ची छै। और उ जाणछो कि उ सच्ची बोलछो।

³⁶ यो बात येक कारण भैछ, ताकि पवित्रशास्त्र में जो लिखीना छै उ पुरो हो ज्यो, “उकी कोई ले हड्डी तोड़ी नै जौ।”

³⁷ फिर एक जाग में पवित्रशास्त्र में यो ले लिखीना छै, “जैस उनूनले मार छै, उन उक तरफ देखाला।”

यीशु को दफनाई जानो

³⁸ इन बातुन का बाद अरिमतिया गौं को यूसुफ ले जो यीशु को शिष्य छ्यो, (लेकिन यहूदी अगुवान का डरले यो बात स लुका राखछ्यो), उले राज्यपाल पिलातुस थैं बिनती करछ्य, कि मैं यीशु की लाशस ली जाछूँ, और राज्यपाल पिलातुस ले उकी बिनती सुणिछ्य, और उ आभेरन यीशु की लाशस ली ग्योछ।

³⁹ नीकुदेमुस ले जो पैलि यीशुका पास रात में ग्योछ, उ लगभग तीस किलो खुशबुदार सामान लियाछ।

⁴⁰ तब उनूनले यीशु की लाश स लीछ और यहूदीन का अन्तिम संस्कार का रीति का अनुसार ऊस खुशबुदार सामान का दगाड़ सफेद कफन में लपेट दीछ।

⁴¹ उ जाग में जाँ यीशुस सूली में चढ़ाई ग्यो छ्यो, वाँ उक नजिक एक बगीच छ्यो, और उ बगीच में एक नय्या कबर छी; जैको पैलि कभै इस्तमाल नी कर राखछ्यो।

⁴² येक कारण उनूनले यीशु की लाशै स उई कबर का गुफा में राख दीछ किलैंकी उ पास में छी और उ यहूदीन का सबत को तैंयारी को दिन छ्यो।