यहूना 15 - सोरियाली नय्या नियम

यीशु सच्चो अंगूरो को बियोलो

¹ यीशु ले क्योछ, “मैं एक सच्ची अंगूर को ब्याल छूँ। और म्येरो पिता परमेश्वर किसान छै।

² हरेक हांगो जो मैंमें जुड़ीना को छै, और फलनो नै ऊस उ काटि दीछो, और जो फलछो, ऊस उ छाटछो ताकि और फलो।

³ जो संदेश मैंले तुमूनथैं क्योछ, उक कारण तुम शुद्ध हो।

⁴ तुम मैंमें बनि रौ, और मैं तुमून बनि रूलो, जसीकैं हांगो अगर अंगूर का ब्याला में बनिनाको नै रौ, त अफी नै फल सकनो उसीकैं तुमूले केले निको नै कर सकना।

⁵ मैं एक अंगूर का ब्योलो छूँ, तुम उक हांगा छा; जो मैंमें बनिना को रूछो, और मैं उमें उ भौत फलछो, क्याखिनकि मैं भटे अलग हो भेरन तुम केले नै करि सकना।

⁶ अगर कोई मैंमें बनिना को नी रौलो, त उ हांगाका नियाती कट भेरन खिती दी जाछो, और जब उ हांग सुखी जाछो, त लोग ऊस जाम करभेरन आग में डाल दी जाछो, और उ जलि जाछो।

⁷ अगर तुम मैंमें बनि रौला, और मेरि शिक्षा तुमून में बनिना की रौली त जो कुछ ले तुम चाछा माँगा, मैं ऊस तुमून खिन पुरो करोलो।

⁸ म्यारा पिता परमेश्वर की महिमा येले हुछी, कि तुम भौत फल ल्या, तब तुम म्यारा शिष्य हुना को सबूत छा।

⁹ जसो पिता ले मैंथैं प्रेम राखछ्य, ऊसोई मैंले तुमार दगाड़ राखछ्य, म्यारा प्रेम में बनिना का रौ।

¹⁰ तुम म्यारा हुकमून मानला, त म्यारा प्रेम बनिना का रौला जसीकैं मैंले अपून पिता परमेश्वरा का हुकमून मानछ्य, और उक प्रेम में बनिनाको रूछूँ

¹¹ मैंले यो बात तुमूनथैं येक कारण क्योछ, ताकि तुमूनमें ले उई खुशी हो जो मैंमें छै, और तुम पुर तरीका ले खुश रौ।

¹² मेरि आज्ञा यो छै, कि जसकैं मैंले तुमूनथैं प्रेम राखछ, उसीकैं तुम ले एक-दुसरा थैं प्रेम राखा।

¹³ कैका पास यो दिखून खिन कि उ अपून मित्र थैं प्रेम करछो, यो है ठूलो कोई तरीका नाहातिन कि उ मित्रून बचुन खिन अपूनो जान तक दी दे।

¹⁴ जो कुछ मैं तुमून आज्ञा दी छूँ, अगर ऊसोई करला, त तुम म्यारा मित्र छा।

¹⁵ ऐल भटे मैं तुमूनथैं सेवक नी कुँलो, क्याखिनकि सेवक नै जाणनो, कि उको मालिक की करछो, लेकिन मैंले तुमूनथैं मित्र कै रैछ, क्याखिनकि जो बात मैंले अपून पिता परमेश्वर थैं सुणियान, उ सब तुमून बता दीयान।

¹⁶ तुमूले मैंस नै चुनयो लेकिन मैंले तुमून चुनछ्य और तुमून नियुक्त करछ्य ताकि तुम संसार में जा और फलवन्त हो ज्या, और तुमोरो फल बनिनाको रौ, तुम म्यारा शिष्य छा येक कारण जो कुछ तुम म्यारा नाम ले पिता परमेश्वर थैं माँगला, उ तुमून द्योलो।

¹⁷ इन बातुन की आज्ञा मैं तुमून येक कारण दीछूँ, कि तुम एक-दुसरा थैं प्रेम राखा।

संसार थैं बैर

¹⁸ अगर संसारा का लोग तुमून खिन बैर राखनान, त तुम जाणछा, कि उले तुमून है पैलि मैं खिन ले बैर राखछ्य।

¹⁹ अगर तुम संसारा का लोगून की नियाती हुना, त संसारा का लोग अपून थैं प्रेम राखनान, लेकिन येक कारण कि तुम संसार में सम्बन्ध नै राखना, लेकिन मैंले तुमून संसार में भटे चुन ली है छ; येक कारण संसारा का लोग तुम खिन बैर राखाला।

²⁰ याद राखा की मैंले तुमूनथैं कि क्योछ, ‘दास अपून मालिक है ठुल नै हुनो,’ ऊस याद राख अगर उनूनले मैंस सताछ, त तुमून ले सताला; अगर उनूनले मेरि शिक्षा नै मान्यो, त तुमेरि शिक्षा स ले नी मानाला।

²¹ उन यो सब म्यारा नामाका कारण तुम क्याखिनकि जै परमेश्वर ले मैंस भेज छै, उ नै जाणना।

²² अगर मैं नी ऊँनू, और उनूनथैं बात नी करनू, तो उन पापी नै ठैरना लेकिन अब उनूनथैं उनार पापून खिन कोई बहाना नाहतिन।

²³ जो मैंथैं बैर राखछो, उ म्यारा पिता परमेश्वरा का दगाड़ बैर राखछो।

²⁴ अगर मैं उनार बीच में चमत्कार नी करनू, और जो कैले नै कर्यो त उन पापी नै ठैरून, लेकिन अब उनूनले मैंस देख लीछ, और उनूनले मैथैं और म्यारा पिता परमेश्वर और द्वीवै थैं नफरत करछ्य।”

²⁵ यो येक कारण भ्योछ कि जो उनार पवित्रशास्त्र में लिखीना छै, “उनूनले बिना वजह मैं खिन नफरत करछ्य।”

²⁶ मैं पिता परमेश्वरा का तरफ भटे तुमून खिन एक मद्दगार भेजूलो। उ पवित्र आत्मा छै जो पिता परमेश्वरा का तरफ भटे उछो और जो सत्य छै उ प्रकट करछो। जब उ आलो, त उ तुमून म्यारा बारिमें बतालो।

²⁷ और तुम संसारा का लोगून म्यारा बारिमें बताला, क्याखिनकि तुम शुरू भटे म्यारा दगाड़ रैईनाका छा।