यहूना 13 - सोरियाली नय्या नियम

यीशु ले शिष्यून का खुटा धोयान

¹ फसह त्यार भटे पैलि जब यीशु ले जाणि लीछ, कि म्येरो संसार स छोड़भेरन पिता परमेश्वरा का पास वापस जाना को बखत आग्योछ। उ उनूथैं हमेशा प्रेम राखछो, जो संसार में उक लोग छ्या, उ उनून पुर तरीका ले प्रेम राखछ्यो।

² यीशु और उक शिष्य रात को खानो खान मरैछ्या। शैतान ले पैलि भटे यीशु स ध्वाका दीन खिन शमौन को च्योलो यहूदा इस्करियोती का मन में ऊस गिरफ्तार करून वाली बात डाल चुकिनाको छ्यो।

³ यीशु यो जाणि छ्यो कि पिता परमेश्वर ले ऊस हर चीज में अधिकार दी रैछ और मैं परमेश्वरा का पास है आरयूँ, और परमेश्वरा का पास वापस जानमरियूँ।

⁴ खान छोड़भेरन यीशु ले अपून भ्यारा वाला कपाड़ा खोलि दीयान, और अपूनी कमर में तौलिया बाँदि लीछ।

⁵ तब उले भांण में पानि भर भेरन शिष्यून का खुटा धोयान, और जो तौलिया अपूनी कमर बाँदिना की छी उले उनार खुट पौछुन लगछ्य।

⁶ जब उ शमौन पतरसा का पास आछ, तब पतरस ले यीशु थैं क्योछ, “हे प्रभु, क्या तैं म्यारा खुट धोलेई?”

⁷ यीशु ले ऊस जबाब दीछ, “जो मैं करछूँ, तैं उको मतलब ऐल नै समझनै, लेकिन येक बाद समझ ले।”

⁸ पतरसले उथैं क्योछ, “तैं म्यारा खुट कभे नै धुन पालै!” यो सणु भेरन यीशु ले उथैं क्योछ, “अगर मैं तैंस नै धुलो! त तेरो म्यारा दगाड़ केले लीन-दीनो नाहातिन।”

⁹ शमौन पतरस ले उथैं क्योछ, “हे प्रभु, तैं म्यारा खुट नै, बल्कि म्यारा हात और खोरो ले धो दे।”

¹⁰ यीशु ले उथैं क्योछ, “जो आदिमी ले नाहा चुक ग्योछ, ऊस सिर्फ अपून खुटाका अलावा और के धुना कि जरूरत नाहातिन; क्याखिनकि उ बिलकुल शुद्व छै, और तुम शुद्ध छा, केवल एक स छोड़भेरन।”

¹¹ उ त अपून पकड़ून वाला स जाण छ्यो येक कारण उले क्योछ, “तुम सब शुद्ध छा, सिर्फ एक स छोड़भेरन।”

¹² जब यीशु उनार खुट धो चुकग्यो और अपून भ्यार वाला कपाड़ा पैन भेरन फिर बैठग्यो तब उनूनथैं कुन लागछो, “क्या तुम समझ छ्या कि मैंले तुमार दगाड़ कि करछ्य?

¹³ तुम मैंस गुरू और प्रभु कुँछा, और ठीक कुँछा, क्याखिनकि मैं तुमोरो प्रभु और गुरू छूँ।

¹⁴ अगर मैंले प्रभु और गुरू हो भेरन तुमार खुट धोयान, त तुमूले ले अपून आपस दीन करभेरन एक-दुसरा का खुट धुन चैंनान।

¹⁵ क्याखिनकि मैंले तुमून नमूना दिखाछ, कि जसो मैंले तुमार दगाड़ करछै, ऊसोई तुमूले करा।

¹⁶ मैं तुमूनथैं सच्ची-सच्ची कुछूँ, दास अपून मालिक भटे ठूलो नै हुनो, और नै भेजिना को अपून भेजून वाला भटे ठूलो हुछो।

¹⁷ अब जब कि तुम त इन बातुन जाणछा, त उनून करा ताकि तुम धन्य हो ज्या।

¹⁸ मैं तुम सबून का बारिमें नै कुनू, जिनून मैंले चुन रैछ, उनून मैं जाणछूँ; लेकिन यो येक कारण हुन मरियोछ ताकि पवित्रशास्त्र को यो लेख पुर हो, कि जो म्येरो रोटो खाँछो, उले म्यारा दगाड़ ध्वाका करछै।

¹⁹ अब मैं उ बात हुनै पैलि मैं तुमून जता दी छूँ कि जब यो बात पुरी हो जालि त तुम विश्वास कर्या कि मैं उई छूँ।

²⁰ मैं तुमूनथैं सच्ची-सच्ची कुछूँ, कि जो म्यारा भजून वाला अपनूछो और स्वागत करछो। उ मैंस अपनूछो और म्यारा स्वागत करछो, और जो मैंस अपनूछो और म्यारा स्वागत करछो, उ म्यारा भजून वाला अपनूछो और स्वागत करछो।”

विश्वासघात का तरफ इशारा

²¹ यो बात कुनाका बाद यीशु भौत परेशान और बैचेन भ्योछ, और यो गवै दीछ, कि मैं तुमूनथैं सच्ची-सच्ची कुछूँ कि तुमून में भटे एक मैंस पकड़वालो।

²² शिष्य एक-दुसरा स शक करभेरन देखून लाग्यान, कि गुरू यो कैका बारिमें कुन मरियोछ।

²³ उक शिष्यून में भटे एक जैस यीशु प्रेम करछ्यो, उ यीशु का बगल में बैठिना को छ्यो।

²⁴ तब शमौन पतरसले उक तरफ हात ले इशारा करभेरन पुछ्छै, “बता, त उ कैका बारिमें कुन मरियोछ?”

²⁵ तब उले यीशु का पास जाभेरन पुछ्छै, “हे प्रभु, उको छै?”

²⁶ यीशु ले जबाब दीछ, “जैस में यो रोटा को टुकूड़ो सुरवा में डूबाभेरन द्यूलो उई छै, और उले टुकूड़ो सुरवा में डूबभरेन शमौनका च्योलो यहूदा इस्करियोती स दीछ।”

²⁷ यहूदा ले रोटो को टुकूड़ो लीना का बाद, यीशु ले उथैं क्योछ, “तैं जो करून खिन जानमरेछै, ऊस जल्दी कर।” उ बखत यहूदा स शैतान अपून बश में कर लीछ।

²⁸ खाना का मेज में लेकिन बैठिन्या वालान में भटे कोई ले नै जाणि छ्यो कि यीशु ले उथैं यो बात क्याखिन क्योछ।

²⁹ यहूदा का पास पैसान को थैलो रूछ्यो, येक कारण कैले-कैले समझछ, कि यीशु उथैं कुंछो, कि जो कुछ हमून त्यार खिन चैछो उ मोल लीले, या यो कि गरीबून ले थ्वाड़ा दे।

³⁰ रोटा को टुकूड़ो खाना का बाद यहूदा तुरन्त भ्यार न्हैग्यो, और यो रातो को बखत छ्यो।

नय्या हुकुम

³¹ जब उ भ्यार न्हैग्यो त यीशु ले क्योछ, “अब मैं आदिमी का च्याला की महिमा भैछ, और परमेश्वर की महिमा मैंमें भैछ।

³² और परमेश्वर ले अपून च्याला की महिमा करोलो, और तुरन्त कराला।

³³ म्यारा प्रियो, मैं थ्वाड़ा देर तुमार पास छूँ, फिर तुम मैंस खोजला, और जसो मैंले यहूदीयून थैं क्योछ, ‘जाँ मैं जान मरयूँ, वाँ तुम नै आ सकना,’ ऊसोई अब तुमूनथैं ले कुछूँ।

³⁴ मैं तुमून एक नय्या आज्ञा दी छूँ, कि तुम एक-दुसरा स प्रेम करा। जसकैं मैंले तुमार दगाड़ प्रेम करछ्य, ऊसोई तुमूले एक-दुसरा स प्रेम करा।

³⁵ अगर तुम आपस में प्रेम राखला त हर कोई जाण ल्याला कि तुम म्यारा शिष्य छा।”

यीशु का द्वारा पतरस को इन्कार करना की भविष्वाणी

³⁶ शमौन पतरस ले उथैं क्योछ, “हे प्रभु, तैं काँ जाँछै?” यीशु ले जबाब दीछ, “जाँ मैं जाछूँ, वाँ तैं ऐल म्यारा पछिल नै आ सकने; लेकिन येक बाद म्यारा पछिल आलै।”

³⁷ पतरसले उथैं क्योछ, “हे प्रभु, ऐल मैं त्यारा पछिल क्याखिन नै आ सकनू? मैं त तैखिन अपून प्राण दीन खिन ले तैंयार छूँ।”

³⁸ यीशु ले जबाब दीछ, “क्या तैं मैं खिन अपूनो प्राण दीन खिन तैंयार छैई? मैं तैथैं सच्ची-सच्ची कुछूँ कि मुर्गा बाँक दीन है पैलि तैं तीन बार मैंस पछयाणून है मुकर जाले।”