यहूना 12 - सोरियाली नय्या नियम

यीशु का खुटान में इत्र डालूनो

¹ फिर यीशु फसह त्यार है छ: दिन पैलि बैतनियाह गौं में आयान, जा उले लाजर स मरिन में भटे ज्यून करिना को छ्यो।

² लोगून ले वाँ यीशु का आदर करून खिन दावत को खानो तैंयार करछ्य, और मार्था खानो बाड़ून मरेछी, और लाजर उनूनमें भटे एक छ्यो जो उक दगाड़ खानो खान खिन बैठिनाको छ्यो।

³ तब मरियम ले जटामांसी को आधा लीटर भौत मेहंगा इत्र लीभेरन यीशु का खुटान में मलछी और अपून बालून ले उक खुटान पोछ्यान, और इत्र की खुशबूले पुरो घर में खुशबू फैल जाछी।

⁴ लेकिन उक बारा शिष्यून में भटे यहूदा इस्करियोती नामोको एक शिष्य जो ऊस पकड़ून वालो छ्यो, उ कुन लागछ्य।

⁵ “यो इत्र तीन सौ दिन की मजूरी का बराबर छी, येस बेच भेरन गरीबून की मद्दत करि जा सकछी?”

⁶ उले यो बात येक कारण क्योछ, ऊस गरीबून की फिकर नी छी, लेकिन येक कारण कि उ चोर छ्यो और उक पास पैसान को थैलो रूछ्यो, और उ जै केले डालछ्या, उ निकाली ली छ्यो।

⁷ यीशु ले क्योछ, “येस परेशान जन करा, जो यो करून मरेछ येस करून दी, क्याखिनकि यो म्यार अन्तिम संस्कार की तैंयारी खिन छै।

⁸ लेकिन गरीब त तुमार दगाड़ हमेशा रूनान, और मैं तुमार दगाड़ हमेशा नै रूँ।”

लाजर स मार डालना की साजिश

⁹ जब यहूदीन लोगून ले सुणछ कि यीशु वाँ छै, तब लोगून की भौत ठूली भीड़ वाँ आछ। उन सिर्फ यीशु नै बल्कि लाजर स ले देखून चाँछ्या, जैस उले मरिन में भटे ज्यून करछ्यो।

¹⁰ तब प्रधान याजकून ले लाजर स ले मार डालना की साजिश करछ्य।

¹¹ क्याखिनकि लाजर का कारण भौत लोग यहूदी अगुवान अस्वीकार करून लाग्यान, और उनूनले यीशु में विश्वास करछ्या।

यीशु को यरूशलम में विजय प्रवेश

¹² दुसारा दिन भौतसा लोगून जो फसह को त्यार में आईना छ्या, यो सुणिभेरन कि यीशु यरूशलम शैहर में आ रियोछ।

¹³ तब लोगून ले खजूरा का हांगा लियान, और उक स्वागत करून खिन और ऊस मिलून खिन निकल्यान और जोर चिल्ला-चिल्ला भेरन कुन लाग्यान, “होशाना; धन्य छै, इस्राएल देशो को राजा उ जो परमेश्वरा का नाम ले उछो।”

¹⁴ जब यीशु स एक गधाको बच्चा मिलछ्य, उमें बैठभेरन उ यरूशलम शैहर आछ, जसो पवित्रशास्त्र में लिखीना को छै ऊसोई भ्योछ।

¹⁵ “हे यरूशलम शैहरा का लोगो, जन डरा! देखा, तुमोरो राजा, गधा का बच्चा में बैठभेरन, तुमार पास आलो।”

¹⁶ यीशु का शिष्य पैलि इन बातुन नी समझ छ्या; लेकिन जब यीशु की महिमा प्रगट भैछ, तब उनून याद आछ, कि जो कुछ ले यीशु ले दगाड़ भ्योछ उ ठीक ऊसोई छ्यो, जसो पवित्रशास्त्र में कईना को छ्यो।

¹⁷ तब भीड़ का लोग जो उ बखत यीशु का दगाड़ छ्या, जब उले लाजर स कबर में भटे बुलाभेरन, मरिन में भटे ज्यून करछ्य, उन दुसारा लोगून को गवै दीन लाग्यान।

¹⁸ येक कारण भौत लोग यीशु का दगाड़ मिलून खिन आ रै छ्या, क्याखिनकि उनूनले यो चमत्कारा बारिमें सुण राँखछ्यो।

¹⁹ तब फरीसी लोगून ले आपस में क्योछ, “देखा, हम के नै कर पान मरिया; देखा, संसार में हर कोई उक पछिल हो जाछो।”

यूनानीन को यीशुस खोजून

²⁰ जो लोग फसह का त्यार में अराधना करून खिन आ रै छ्या, उनूनमें थ्वाड़ा यूनानी लोग छ्या।

²¹ उन गलील प्रदेशा का बैतसैदा शैहरा का रून वालो फिलिप्पुसा का पास आभेरन उथैं बिनती करून लागनान, “श्रीमान हम यीशुका दगाड़ मिलून चानू।”

²² फिलिप्पुस ले आभेरन अन्द्रियास थैं क्योछ, तब अन्द्रियास और फिलिप्पुस ले जाभेरन यीशुस बताछ।

²³ यो बात में यीशु ले उनूनथैं क्योछ, “मैं आदिमी का च्याला की महिमा करना को बखत आग्योछ।

²⁴ मैं तुमूनथैं सच्ची-सच्ची कुछूँ, कि जब तक ग्यूँको दानो भूमि में पड़भेरन मर नै जानो, उ एकलो रूँछो लेकिन जब उ दानो मरि जाछो त भौत फल ल्यूछ, ऊसोई म्यारा दगाड़ ले होलो।

²⁵ जो अपून प्राणस प्रिय जाणछो, उ ऊस खो दीछ, लेकिन जो संसार में अपून प्राणस अप्रिय जाणछो; उ उकी अनन्त जीवन तलक उकी रक्षा करोलो।

²⁶ अगर कोई मेरि सेवा करौ, तो उ म्येरो शिष्य बनौ; तब जा मैं हुलो वाँ म्येरो सेवक ले होलो; अगर कोई मेरि सेवा करोलो, त पिता परमेश्वर उको आदर करोलो।

अपूनी मौता का बारिमें यीशु की भविष्यवाणी

²⁷ अब मैं भौत बैचेन छूँ। येक कारण अब मैं कि कू? ‘हे पिता परमेश्वर, मैंस यो दुख का बखत भटे बचौ?’ लेकिन मैं संसार में येक कारण आईना को छूँ ताकि दुख उठू, और अपून प्राण द्यूँ।

²⁸ हे पिता परमेश्वर, अपूनी नाम की महिमा कर।” तब परमेश्वर ले स्वर्ग भटे क्योछ, “मैंले उकी महिमा करछै, और फिर दुबारा करूँलो।”

²⁹ तब जो लोग ठाड़ हो भेरन सुणून मरेछ्या, उनूनले क्योछ; कि बादल गरजून मर्योछ, और थ्वाड़ा लोगून ले क्योछ, “कोई स्वर्गदूत उक दगाड़ बात करून मरियोछ।”

³⁰ यो बात में यीशु ले क्योछ, “यो आवाज मैं खिन नाहातिन लेकिन तुमार भल खिन छ्यो।

³¹ अब उ बखत आग्योछ, जब परमेश्वर संसार में लोगून को न्याय करोलो, और यीशु यो संसारा का अधिकारी शैतान की ताकत स खतम कर द्योलो।

³² और जब मैं धरती में भटे ऊच्चा में चढ़ाई जूलो, त सबून अपून पास ल्यूलो।

³³ इसो कैभेरन उले यो प्रगट कर दीछ, कि उ कसीकैं मरून वालो छै।”

³⁴ यो बात में लोगून ले उथैं क्योछ, “हमून ले पवित्रशास्त्र कि यो बात सुणि रैछ, कि मसीह हमेशा ज्यून रौल, फिर तैं किलैं कुछै, कि मैं आदिमी का च्याला स ऊँच्चा में चढ़ाई जानो जरूरी छै? यो आदिमी को च्योलो छै?”

³⁵ यीशु ले उनूनथैं क्योछ, “उज्यालो अब थ्वाड़ा देर तक तुमार बीच में छै, जब तक उज्यालो तुमार दगाड़ छै तब तक हिटनै रौ; इसो नै हो कि अन्यारो तुमून नाश कर द्यो; जो अन्यारा में हिटछो उन नै जाणना कि काँ जानमर्योछ।

³⁶ जब तक उज्यालो तुमार दगाड़ छै, उज्याला में विश्वास कर कि तुम उज्याला का सन्तान बना।” यो बात कैभेरन यीशु न्हैग्यो और उनून भटे लुकीना को रियोछ।

यहूदीन को अविश्वास में बनिना को रूनो

³⁷ और यीशु ले उनार सामुनि इदुक चमत्कार दिखाया, तब ले उनूनले उमें विश्वास नै कर्यो;

³⁸ यो येक कारण भ्योछ ताकि परमेश्वरो को संदेश दिनवाला यशायाह ले कईना को छ्यो, उ पुरो है जौ। उले क्योछ, “हे प्रभु, हमार सुसमाचार में कैले विश्वास करछै? और परमेश्वर की महान सामर्थ केमें प्रगट भैछ?”

³⁹ येक कारण उन विश्वास नै कर सक्या, लेकिन यशायाह ले फिरले क्योछ,

⁴⁰ “उले उनार आँखान अन्धो कर दीछ, और उनोरो दिमाग स बन्द कर दीछ, काँई इसो नै हो कि उ आँखा ले देखून, और दिमागले समझून, और अपून पापून भटे पश्चताप करून, और मैं उनून चंगो करूँ।”

⁴¹ यशायाह ले यो बात येक कारण क्योछ, कि उले बखत है पैलि उकी महिमा देखछ्य; और उले उक बारिमें बात करछ्य।

⁴² फिरले अगुवान में भटे ले भौतून ले उमें विश्वास करछ्य, लेकिन फरीसी लोगून का कारण यीशु स मानना ले डर छ्या, कि उनून यहूदी सभाघर भटे निकाल दी जालो।

⁴³ क्याखिनकि लोगून की तारीफ उनून परमेश्वर की तारीफ है ज्यादा निकी लागछी।

यीशु का बचन न्याय आधार

⁴⁴ यीशु ले भीड़ का लोगून ध्दयाभेरन क्योछ, जो मैंमें विश्वास करछो, उ केवल मैंमें नै, लेकिन उ म्यार भेजून वाला परमेश्वर में विश्वास करछो।

⁴⁵ और जो मैंस देखछो, उ म्यारा भेजून वाला स देखछो।

⁴⁶ मैं संसार में उज्यालो हो भेरन आरयूँ ताकि जो कोई मैंमें विश्वास करोलो, उ अन्यारो में नै रौ।

⁴⁷ अगर कोई मेरि बात सुणिभेरन नै माननो, त मैं ऊस दोषी नै ठैरूनू, क्याखिनकि मैं संसार में दोषी ठैरून खिन नै लेकिन संसारा का लोगून की मुक्ति करून खिन आरयूँ।

⁴⁸ जो मैंस तुच्छ जाणछो और मेरि बात नै माननो उको न्याय करून वालो एक छै, मतलब जो मैंले जो क्योछ, उ अन्तिम दिनून में उको न्याय करोलो।

⁴⁹ क्याखिनकि मैं अपून तरफ भटे कोई ले बात नै करनू, लेकिन पिता परमेश्वर जेलै मैंस भेज रैछ उले मैंस आज्ञा दी रैछ, कि-कि कुँ? और कि-कि बोलू?

⁵⁰ मैं जाणछूँ कि उकी आज्ञा मानून अनन्त जीवन छै, येक कारण मैं तुमूनथैं उई बोलछूँ जो पिता परमेश्वर ले मैंथै कै रैछ।