यहूना 10 - सोरियाली नय्या नियम

ग्वाला और भेड़ू का उदारण

¹ मैं तुमूनथैं सच्ची-सच्ची कुछूँ, कि जो कोई भेड़शाला का दवारून भटे नै ऊँनो, लेकिन और कोई दुसारा बाटा भटे उछो, उ चोर और डाकू छै।

² लेकिन भेड़ून को ग्वाला दवारून भटे उछो।

³ उ खिन दवारपाल द्वार खोल दीछो, और भेड़ उकी आवाज पछयाणनान, और उ अपून भेडून को नाम लीभेरन बुलूछो और भेड़ून भ्यार लिजाछो।

⁴ और जब उ अपून सब भेड़ून भ्यार निकाल हालछो, त उनार अघिल-अघिल हिटछो, और भेड़ उक पछिल-पछिल उनान; क्याखिनकि उन उकी आवाज स पछ्याणनान।

⁵ लेकिन उन कोई पराया का पछिल नै जाला, लेकिन ऊस देखभेरन भाजाला, क्याखिनकि उन परायान की आवाज नै पछ्याणना।”

⁶ यीशु ले उनूनथैं यो उदारण क्योछ, लेकिन उन नै समझिया कि उको कुना को की मतलब छै।

यीशु बड़िया ग्वाला छै

⁷ तब यीशु ले उनूनथैं क्योछ, “मैं तुमूनथैं सच्ची-सच्ची कुछूँ, कि द्वार मैंई छूँ, जैल भेड़ भितर जानान।

⁸ जदुक म्यारा है पैलि आयान, उन सब चोर और डाकू छन लेकिन भेड़ून ले उनेरि नै सुणि।

⁹ मैंई द्वार छूँ, परमेश्वर उनोरो उद्धार करोलो जो म्यारा द्वारा उमें भितर जालो और भितर-भ्यार आ-जा सकोलो और खान खिन खानो पाल।

¹⁰ चोर सिर्फ भेड़ून चोरन, और मारून खिन और नाश करून खिन ऊँछो। मैं येक कारण आरयूँ कि उन सच्चाई में जीवन पाऊ, और पुरो तरीका ले जीवन पाऊनू।

¹¹ मैं एक बड़िया ग्वाला का नियाती छूँ, बड़िया ग्वाला अपून भेड़ून खिन अपूनो जीवन बलिदान कर दीछो।

¹² मजूरी में राखिना को नौकर जब भेड़िया स उन देखछो त उ भेड़ून छोड़भेरन भाग जाछो, क्याखिनकि उ ग्वाला नाहातिनो और भेडून को उक नाहातिन। येक कारण भेड़िया उनूनमें हमला करछो और झुण्ड स तितर-बितर कर दीछो।

¹³ उ येक कारण भाजि जाछो कि उ नौकर छै, और ऊस भेड़ून की चिन्ता नाहातिनी।

¹⁴ मैं एक बड़िया ग्वाला का नियाती छूँ; मैं अपून भेड़ून जाणछूँ, और म्यारा भेड़ मैंस जाणनान।

¹⁵ जस तरीका ले पिता परमेश्वर मैंस जाणछो और मैं पिता परमेश्वर स जाणछूँ। और मैं अपून भेड़ून खिन अपूनो प्राण दीन खिन तैंयार छूँ।

¹⁶ म्यारा और ले भेड़ छन, जो यो भेड़शाला में नाहातिन; मैंस उनूनले ल्यून जरूरी छै, उन मेरि आवाज सुणला, तब एक्कै झुण्ड होलो और एक्कै ग्वालो होलो।

¹⁷ मैं अपून जीवन को बलिदान दी छूँ और यो कारण परमेश्वर मैंस प्रेम करछो, लेकिन मैं इसो करनाका बाद फिर ज्यूनो हो जियूलो।

¹⁸ कोई म्यारा प्राण मैंथैं नै ली सकनो, मैं उ अपूनी मरजी दी छूँ, मैंस ऊस दिना को और फिर वापस लिनाको लै अधिकार छै, यो उई आज्ञा छै जो मैंस म्यारा पिता परमेश्वर भटे मिलीना की छी।”

¹⁹ इन बातुन का कारण फिर यहूदी लोगून में फुट पड़गै।

²⁰ उनूनमें भटे भौत कुन लाग्यान, “उमें भूत छै, और उ पागल छै, उकी जन सुणा।”

²¹ और कईन ले क्योछ, “यो बात इसा आदिमी की नाहातिन जैमें भूत हो, क्या भूत एक अन्धा आदिमी स चंगो नै कर सकूनो?”

यहूदीन को अविश्वास

²² यरूशलम शैहर में मन्दिर को स्थापना को त्यार छ्यो, और जो जाड़ान का मौसम में छ्यो।

²³ और यीशु मन्दिर का खाला छ्या उ, उ जाग में घुमून मर्यो छ्यो, जैस लोग राजा सुलैमान का बरामदे कुंनान।

²⁴ तब यहूदी अगुवा ले वाँ आभेरन ऊस चारू तरफ भटे घेर भेरन उथैं पुछनान, “तैं हमून कब तक दुबिधा में राखलै? अब हमून साफ-साफ बता दे। क्या तैं मसीह छै?”

²⁵ तब यीशु ले उनून जाबब दीछ, “मैंले तुमूनथैं कै हलछै, और तुम विश्वास करना नै, जो काम में अपून पिता परमेश्वरा का अधिकार ले करछूँ उई मेरि गवै छै।

²⁶ लेकिन तुम येक कारण विश्वास नै करना क्याखिनकि तुम म्यारा भेड़ून में भटे नाहातिना।

²⁷ जसीकैं म्यारा भेड़ अपून ग्वाला की आवाज सुणनान और पछयाणनान, उसीकैं म्यारा लोग ले मेरि बातुन में ध्यान दीनान। और मैं उनून जाणछूँ, और उन म्यारा शिष्य बन ग्यान।

²⁸ और मैं उनून अनन्त जीवन दी छूँ, और उन कभै ले नाश नी हुन, और कोई उनून म्यारा हात भटे नै छड़ा सकनो।

²⁹ म्यारा पिता परमेश्वर, जेलै उनून मैंस दी रैछ, उ सबून है ठूलो छै, और कोई ले उनून पिता परमेश्वरा का हात भटे नै छड़ा सकनो।

³⁰ मैं और पिता परमेश्वर एक्कै छा।”

³¹ एक बार फिर यहूदी अगुवा ले यीशु मारून खिन ढूंगा उठायान।

³² यो बात में यीशु ले उनूनथैं क्योछ, “मैंले अपून पिता परमेश्वरा का तरफ भटे भौत भल काम दिखायान, उमें भटे को काम खिन तुम मैंस ढूंगान ले लोड़ियू छा?”

³³ यहूदीन ले ऊस जबाब दीछ, “ भल कामून खिन हम तैंस नै लोणियूना, लेकिन परमेश्वर कि निन्दा का कारण, और आदिमी हो भेरन अपूनास परमेश्वर बनूना को दावा करछै।”

³⁴ यीशु ले उनून जबाब दीछ, “क्या पवित्रशास्त्र में इसो लिखीना को छी कि परमेश्वर ले अपून लोगून का अगुवान थैं क्योछ, कि ‘तैं ईश्वर छै’?

³⁵ और तुम जाणछा कि पवित्रशास्त्र में बदलाव नै करि जा सकूनो। येक कारण उनून ईश्वर क्योछ, जिनारा पास परमेश्वरो को बचन पुजछै।

³⁶ जब मैं कुछूँ, ‘मैं परमेश्वरो को च्योलो छूँ।’ त तुम मैंथैं क्याखिन कुँछा, ‘तैं निन्दा करछै।’ मैंई उई छूँ जैस पिता परमेश्वर ले अलग कर रैछ और मैंस संसार में भेज रैछ।

³⁷ अगर मैं अपून पिता परमेश्वरो को काम नै करनू त, तुम म्येरो विश्वास जन करा।

³⁸ लेकिन अगर मैं करछूँ, त चाहे तुम म्येरो विश्वास जन करा, लेकिन उन कामून में विश्वास करा, तब तुमून पत्तो चलोलो, और तुम जाणला कि पिता परमेश्वर मैंमें रूछूँ, और मैं पिता परमेश्वर मैं रूछूँ।”

³⁹ तब उनूनले फिर ऊस पकड़ना की कोशिश करछ्य, लेकिन उ उनार हात भटे बचभेरन न्हैग्यो।

⁴⁰ फिर यीशु यरदन नदी का पार उ जाग में जाछो, जा यहूना पैलि बपतिस्मा दीछ्यो, और उ वाँई रूँछ्यो।

⁴¹ और भौत सारा लोग उक पास आभेरन कुछ्या, “यहूना ले त कोई ले चमत्कार नै दिखाया, लेकिन जो कुछ ले यहूना ले येका बारिमें कईना को छ्यो उ बिलकुल सच्ची छ्यो।”

⁴² और वाँ भौत लोगून ले उमें विश्वास करछै।