यहूना 1 - सोरियाली नय्या नियम

वचन देहधारी भ्योछ

¹ यो सारा संसारा का बनून है पैलि बचन छ्यो, उ बचन परमेश्वरा का दगाड़ छ्यो, और उ बचन परमेश्वर छ्यो।

² योई बचन शुरूवाद में परमेश्वरा का दगाड़ छ्यो।

³ परमेश्वर ले सब कुछ उक द्वारा बनाई ग्योछ, और जै केले बनाई ग्योछ, उक बिना केले नै बन्यो।

⁴ उ जीवन को जरिया छ्यो, और उई सब लोगून उज्यालो दीछो।

⁵ और उज्यालो अन्यारो में चमकछो; और अन्यारा ले ऊस नै बुझा सकूनो।

⁶ परमेश्वर ले यहूना नामोको एक आदिमी स भेजछ्य।

⁷ उ उज्याला का बारिमें बतून खिन आछ, ताकि सब लोग उक द्वारा उ उज्याला में विश्वास करून।

⁸ यहूना खुद तैं उ उज्यालो नी छ्यो, लेकिन उ लोगून परमेश्वरो को उ उज्याला का बारिमें गवै दिन खिन आईना को छ्यो।

⁹ उ जो सच्चो उज्यालो छै, उ हरेक आदिमी स उज्यालो दीछो, उ संसार में उनवालो छ्यो।

¹⁰ उ संसार में छ्यो, और संसार उक द्वारा बनाई ग्योछ, और संसाराक लोगून ले ऊस नै पछ्याणो।

¹¹ उ अपून लोगून में आछ, और उक अपून लोगून ले ऊस नै अपनायो।

¹² लेकिन जिनूनले ऊस अपनाछ, उले उनून परमेश्वरो को संतान हुना को हक दीछ, मतलब जो उमें विश्वास राखनान।

¹³ उ नै त ईजा-बबा का इच्छा ले, नै शरीराक इच्छा ले, और नै एक आदिमी संतान प्राप्ती का इच्छा ले, लेकिन परमेश्वर की इच्छा उत्पन्न होईना का छै।

¹⁴ और बचन एक आदिमी बनछै; और अनुग्रह ले और सच्चाई भरिभेरन हमार बीच में डेरा करछ्य, और हमूले उकी इसी महिमा देखछ्य, जसीकैं पिता परमेश्वरा का तरफ भटे आईना का एकलौता च्याला की महिमा।

¹⁵ यहूना ले उक बारिमें गवै दीछ, और धधिया भेरन क्योछ, “यो उई छै, जैका बारिमें मैंले तुमून बताछ, कि जो म्यारा बाद में उनवालो छै, उ सच्ची में मैं है महान छै क्याखिनकि उ मैं है पैलि छ्यो।”

¹⁶ क्याखिनकि उकी दया ले हम सबून भरपूरी ले अनुग्रह में अनुग्रह मिलछ्य।

¹⁷ नियम-कानून त मूसा का द्वारा दीई ग्यान; लेकिन परमेश्वर ले अनुग्रह और सच्चाई यीशु मसीह का द्वारा दीछ।

¹⁸ परमेश्वर स कभै कैले नै देख्यो, केवल उक एकलौता च्याला ले जो वास्तव में परमेश्वर में छै, और पिता का सबून है नजिक छै, उले परमेश्वर स हमून देखाछ।

यहूना बपतिस्मा दिनवाला की गवै

¹⁹ यहूना की गवै यो छै, कि जब यहूदी अगुवान ले यरूशलम शैहर भटे याजकून और लेवी लोगून उक पास यो पुछून खिन भेजछ्य, कि “तैं को छै?”

²⁰ तो उले उनून साफ-साफ के दीछ, “मैं मसीह नाहातिनू।”

²¹ तब उन लोगून ले उथैं पुछ्छै, “तैं फिर को छै? क्या तैं परमेश्वरो को संदेश दिनवाला एलिय्याह छै?” उले जबाब दीछ, “मैं नाहातिनू।” “तो क्या तैं, जो परमेश्वर ले वादा करिना को छ्यो, उ संदेश दीन वाला छै?” उले जबाब दीछ, “नै।”

²² तब उनूनले उथैं पुछ्छै, “फिर तैं को छै? ताकि हमून अपून भेजून वाला स जबाब द्यूला। कि तैं अपून बारिमें कि कुँछै?”

²³ तब उले उनूनथैं क्योछ, मैं उई छूँ जैका बारिमें परमेश्वरो को संदेश दिनवाला यशायाह ले कईना को छै, “मैं बिरान जागान में रौलो और लोगून धध्या-धध्याभेरन यो बतालो, ‘कि प्रभु परमेश्वरा का ऊँन खिन तुम तैंयार हो ज्या और उ बाँटान ठीक करा जैमें भटे उ हो भेरन ऊँनवालो छै’।”

²⁴ उन लोग फरीसी लोगून का तरफ भटे भेजिना का छ्या।

²⁵ उनूनले उथैं यो सवाल पुछ्छै, “तैं नै मसीह छै, और नै एलिय्याह, और नै उ परमेश्वरो को संदेश दिनवाला छै, तो तैं फिर बपतिस्मा क्याखिन दीछै?”

²⁶ तब यहूना ले उनून जबाब दीछ, “मैं त पानि ले बपतिस्मा दीछूँ, लेकिन तुमार बीच में एक आदिमी ठाड़ छै, जैस तुम नै जाणना।

²⁷ मतलब म्यार बाद जो ऊँनवालो छै, मैं इसो लाकारी को ले नाहातिनू कि उको सेवक बनभेरन झुकभेरन उको जूताका खोलि सकू।”

²⁸ इन बात यरदन नदी पार बैतनिय्याह गौं में भ्यान, जा यहूना लोगून बपितस्मा दीछ्यो।

परमेश्वरोको मेम्ना

²⁹ दुसारा दिना यहूना ले यीशुस अपून तरफ ऊँन देखिभेरन क्योछ, “देखा यो परमेश्वरो को मेम्ना छै, जो संसारा का पापून उठा लिजाछो।

³⁰ यो उई छै, जैका बारिमें मैंले तुमूनथैं क्योछ, कि एक आदिमी म्यारा बाद उनवालो छै, जो मैं है महान छै, क्याखिनकि उ म्यारा हैं पैलि छ्यो।

³¹ मैं ऊस नी पछ्याण छ्यू, कि उ मसीह छै, इस्राएल का लोगून यो बतून खिन कि उको छै, मैं पानि में बपतिस्मा दीनै उन मरयूँ।

³² और यहूना ले यो गवै दीछ, कि मैंले पवित्र आत्मा स कबूतर का समान आकाश भटे उतरून और उमें बैठून देखछ्य।

³³ और मैं त ऊस नी पछ्याणछूँ, लेकिन जेलै मैंस पानि बपतिस्मा दिन खिन भेजछ्य, उले मैंथै क्योछ, ‘जैमें तैं पवित्र आत्मा स उतरून और बैठून देखले; उई पवित्र आत्मा ले बपतिस्मा दिनवालो छै।’

³⁴ और मैंले ऊस देख रैछ, और मैं तुमूनथैं सच्ची-सच्ची कुछूँ कि उई परमेश्वरो को च्योलो छै।”

यीशु का पैला शिष्य

³⁵ दुसारा दिन फिर यहूना और उक शिष्यून में भटे द्वी जन वाँ ठाड़ छ्या।

³⁶ तब यहूना ले यीशु वाँ भटे जान देखिभरेन क्योछ, “देखा, यो परमेश्वरो को मेम्ना छै।”

³⁷ तब उन द्वी शिष्यून ले यहूना की बात सुणिभेरन यीशु का पछिल न्हैजानान।

³⁸ यीशु ले उनून अपून पछिल उनो देखिभरेन उनूनथैं पुछ्छै, “तुम कैका खोज मैं छा?” उनूले उथैं क्योछ, “गुरू जी तुम काँ रूछा?”

³⁹ उले उनूनथैं क्योछ, “हिटा, और देखा।” जब उनू उक दगाड़ ग्यान और देखछ्य कि उ काँ रूछो। येक कारण उन उ दिन उक दगाड़ रूकीयान, उ बखत ब्याला लगभग चार बाजीना का छ्या।

⁴⁰ उन द्वीवैन में भटे, जो यहूना की बात सुणिभेरन यीशु का पछिल ग्यान, एक शमौन पतरस को भाई अन्द्रियास छ्यो।

⁴¹ उले पैलि अपून सांगो भाई शमौन थैं मिलभेरन उथैं क्योछ, “कि हमून ख्रिस्त मतलब मसीह मिलग्योछ।”

⁴² अन्द्रियास अपून भाई शमौन स यीशु का पास लीभेरन आछ, यीशु ले ऊस देखभेरन क्योछ, “तैं यहूना को च्योलो शमौन छै। तैं कैफा, पतरस का नाम ले जाणि जाले।”

फिलिप्पुस और नतनएल को बुलाई जानो

⁴³ दुसारा दिन यीशु ले गलील प्रदेश खिन जाना को फैसला करछ्य, और फिलिप्पुसथैं मिलभेरन क्योछ, “म्यारा शिष्य बनून खिन म्यारा दगाड़ हो ले।”

⁴⁴ फिलिप्पुस त अन्द्रियास और पतरस का शैहर बैतसैदा शैहर को रूनवाला छ्या।

⁴⁵ फिलिप्पुस ले नतनएल थैं मिलभेरन उथैं क्योछ, हमून उ आदिमी मिलग्योछ, जैका बारिमें मूसा का नियम-कानून में और परमेश्वरो को संदेश दिनवालान ले लिखीना को छ्यो। उ नासरत गौं को यूसुफ को च्योलो यीशु छै।

⁴⁶ नतनएल ले उथैं क्योछ, “क्या कोई निकी चीज ले नासरत गौं भटे निकल सकछ्यी?” फिलिप्पुस ले उथैं क्योछ, “जाभेरन देखले।”

⁴⁷ यीशु ले नतनएल अपून तरफ आते देखिभेरन उक बारिमें क्योछ, “देखो यो सचमुच इस्राएल को भरोसमंद वंशज छै, जो पुर तरीका ले ईमानदार छै।”

⁴⁸ नतनएल ले उथैं क्योछ, “तैं मैंस कसीकैं जाणछ्य?” यीशु ले ऊस जबाब दीछ, “येहैं पैलि कि फिलिप्पुस ले तैंस बुलाछ, जब तैं तिमूला का रूखा तलि बैठि रैछ्य, तब मैंले तैंस देखछ्य।”

⁴⁹ तब नतनएल ले ऊस जबाब दीछ, “हे गुरू तैं परमेश्वरो को च्योलो छै; तैं इस्राएल देशो को महाराजा छै।”

⁵⁰ यीशु ले ऊस जबाब दीछ, कि “मैंले जो तैंस क्योछ, कि मैले तैंस तिमूला का रूखा ताल बैठिना को देखछ, क्या तैं येक कारण विश्वास करछै? तैं ये है ले ठूल्ला-ठूल्ला काम देखले।”

⁵¹ फिर उले क्योछ, “मैं तुमूनथैं सच्ची-सच्ची कुछूँ कि तुम स्वर्गे स खुलीना को, और परमेश्वरा का स्वर्गदूतून मलि जान और मैं आदिमी का च्याला का मलि में उतरून देखला।”