याकूब 3 - सोरियाली नय्या नियम

जिबड़ा स बश में करून

¹ हे म्यारा प्यारा दगड़ियो, तुमूनमें भटे भौत विश्वासीन की मण्डली में गुरू नै बनून चैछो, क्याखिनकि तुम जाणछा कि परमेश्वरा का बचनून सिखून वालान को न्याय भौत सख्ती ले करि जालो।

² हम भौत बार गलती कर जानू। लेकिन जो अपून बोलून में गलती नै करूनो, उई त सिद्ध आदिमी छै; और उ अपूनास पुर तरीका ले काबू कर सकछो।

³ जब हम अपून बश में करून खिन घोड़ाक मुँख में लगाम लगूनू, त हम उक पुरो शरीर स ले घुमा सकनू।

⁴ देखा, समुद्री जहाज ले, हालाकि उन भौत ठूला हुनान, और तेज हवा ले चलाई जानान, तब ले एक नानि पतवारक जरियाले नाव चलूनवाला का इच्छाक अनुसार घुमाई जानान।

⁵ उसीकैं जिबोड़ो ले शरीरो को एक नानू हिस्सा छै और ठूली-ठूली डीग मारछो। देखा कसीकैं, एक नानि आगा की चिनगारी भौत ठूला जंगल स जला दीछी।

⁶ जिबोड़ो ले एक आगा का नियाती छै; जिबोड़ो हमोरो शरीरो को हिस्सा छै जो एक आदिमीक शरीर में कलंक लगूछी, और हमरि पुरी जीन्दगी स नाश करून वाली आग में बदल जाछी, और खुद नरक की आग में जलनै रूछी।

⁷ हरेक जातिक वन पशु-पक्षी, रेगुन वाला जन्तु, और पानि में रून वाला जन्तु आदिमीक बश में हो सकनान और हो ले ग्यान।

⁸ लेकिन जिबाड़ा स आदिमीन में भटे कोई ले बश में नै राँख सकनो; उ एक इसी बला छै; उ एक जहरीला स्यापा का जहरा का नियाती प्राण लीन वालो हुछो।

⁹ योई जिबाड़ा ले हम प्रभु पिता परमेश्वर की महिमा करनू, और येले जो परमेश्वरा का समानता में बनाई ग्यान उनून श्राप दीनू।

¹⁰ एक्कै मुँख ले स्तुति और श्राप द्वीवै निकलनान। हे म्यारा प्यारा दगड़ियो, इसो नै हुन चैनो।

¹¹ क्याखिनकि एक्कै कुआँ भटे मिठो और नमकीन पानि द्वीवै एक दगाड़ कभै नै निकल सकनो?

¹² हे म्यारा प्यारा दगड़ियो, क्या तिमूला का रूख में जैतून लागनानी, या अंगूरा का ब्याला में तिमूलो लाग सकनानी? उसीकैं नमकीन कुआँ भटे मिठो पानि नै निकल सकनो।

स्वर्गीय ज्ञान

¹³ तुम लोगून में जो बुद्धिमान और समझदार हुना को दावा करछो, उ अपून भल कामून और निको चाल-चलनाक जरिया, और उ नम्रताक दगाड़ जो तुमार ज्ञान भटे उछी, भल काम करभेरन साबित करून चैछो।

¹⁴ अगर तुम अपून-अपून मन में भौत नफरत और स्वार्थ राखछा, त अपून ज्ञान में घमण्ड करभेरन सच्चाईक खिलाफ पाप जन करा।

¹⁵ यो ज्ञान उ नाहातिन, जो परमेश्वर भटे मिलीना को छै बल्कि संसारिक, और आदिमीन को, और शैतानी छै।

¹⁶ येक कारण कि जाँ नफरत और स्वार्थ हुछो, वाँ झगाड़ा और हरेक प्रकाराक बुर काम हुनान।

¹⁷ लेकिन जो ज्ञान परमेश्वर भटे मिलछो, उ पैलि त पवित्र हुछो, फिर मिलनसार, कोमल, निको बिचार वालो, दयालु और निका कामून ले भरिना को और बिना पक्षपात और बिना कपट ले हुछो।

¹⁸ और जो लोग मेल-मिलाप करूनवाला छन, उन शान्तिको बी बोला और धार्मिकता की फसल काटाला।