इब्रानियों 9 - सोरियाली नय्या नियम

तम्बू में अराधना विधि

¹ उ पैलि वाचा, जो भौत बखत पैलि मूसा का द्वारा इस्राएली लोगून दीईना की छी, उमें परमेश्वरे की अराधना करना का पुर नियम-कानून छ्या और यो धरती में अराधना खिन लोगून का द्वारा बनाई को एक मिलाप वालो पवित्र तम्बू ले छ्यो।

² यो तम्बू जानवरून का खाल ले बनिना को छ्यो। उ तम्बू का बीच में, उनूनले एक परदा लटका दीछ और उक द्वी कमरा बनायान। पैला कमरा में एक धूपदान छ्यो और एक मेज छी जैमें परमेश्वरे स भेंट में चढ़ाई जानवाला रोटा राखि जाछ्या। यो कमरा स पवित्र जाग कई जाछ्यो।

³ तम्बू का दुसरा कमरा जो परदा का पीछ छ्यो, ऊस परम पवित्र जाग कुंनान।

⁴ यो दुसरा कमरा में, एक सुना की वेदी छी, और वाँ एक सन्दूक ले छ्यो जो भितर और भ्यार भटे सुना ले मढ़िना को छ्यो और उ सन्दूक स वाचा को सन्दूक कई जाँछ्यो। यो सन्दूक का भितर तीन चीज छ्या। सबून है पैलि, एक सुना की मर्तबान छ्यो जैमें एक बिशेष खानो छ्या जैस “मन्ना” कई जाछ्यो, और दुसरी उमें हारून की लठ्ठी ले छी, जैमें पात निकलीना का छ्या। और येमें ढूंगा का पाथरून का द्वी पाठी छ्या, जैमें परमेश्वरेले उ दस हुकुम लिखीना का छया, जो उले मूसास दीईना का छ्या।

⁵ येक अलावा सोना का सन्दूक का मलिमें द्वी करूँब छ्या, जिनारा पंख उ सन्दूक का मलिमें फैलीना का छ्या, जो यो बातोको इशारा करछ्यो कि परमेश्वर यो जाग में छ्यो। उक खुलीना का पंख सन्दूक का मलिवाला हिस्सा स ढकछ्या जैमें खून छिड़की जाछ्यो ताकि लोगून का पापू माफ करि जा सकून। लेकिन हम अब इन सब चीजून एक-एक करभेरन नै बता सकना।

⁶ इसीकैं उनूनले उन सारी चीजून तम्बू का द्वीवै कमरान में तैयार कर्यान। तब हर बखत जब ले याजक अपून काम करून खिन उछ्या त उन सिर्फ पैला वाला कमरा में उछ्या।

⁷ लेकिन केवल महायाजक साल में एक्कै बार जानवरून को खून लीभेरन परम पवित्र जाग में जाछ्यो, और उ येस अपून और लोगून का पापून का माफी खिन परमेश्वरे स चढ़ूछ्यो जो उनूनले अनजाना में करिना का छ्या।

⁸ इन नियमून का द्वारा पवित्र आत्मा हमून यो समझूछो कि जब तक यो धरती में मिलाप वाला तम्बू और उक नियमून को पालन करि जाछो, तब तक स्वर्ग में परमेश्वरा का परम पवित्र जाग में जाना को बाटो अब तक खुलीना को नाहातिन।

⁹ यो सब चीज सिर्फ इन बातुन को उदारण छ्यो जो कि अब मसीहक कारण पुरी हुन मरैछ। किलैकी उन सब भेंट और बलिदान जो उन लोगून का द्वारा परमेश्वरेस चढ़ाई जाछ्या जो उकी अराधना करछ्या, उन लोगून का मनून और जमीर स शुद्ध करून योग्य नी छी।

¹⁰ किलैकी उन सिर्फ लोगून का खान-पीना का बारिमें और भौतसा नान-धुना का नियमून का बारिमें बतुनान जिनारा द्वारा लोगून को शरीर तै साफ हो जाछो। यो जरूरी छ्यो कि इन नियमून तब तक पुर करि जानो जब तक कि परमेश्वर लोगून का दगाड़ एक नय्या वादा नै करनो।

मसीह का खून की सामर्थ

¹¹ लेकिन अब मसीह महायाजक होभेरन आछ जो नय्या वाचा की सारी निकी-निकी चीज दीछो। उले स्वर्ग में और ज्यादा महान, ज्यादा सिद्ध मिलाप का तम्बू में प्रवेश करछ्य, जो आदिमीन का हातून का द्वारा बनाईना को नाहातिन, म्येरो कुंना को मतलब, जो यो संसारो को हिस्सा नाहातिन।

¹² यीशु मसीह परम पवित्र स्थान में जानवरून का खून स लीभेरन नै ग्यो, लेकिन उ खुद अपूनो खून लीभेरन ग्योछ। उले यो सिर्फ एक बार करछ्य, और फिर येस कभै करना की जरूरत नी होलि। उक द्वारा हमून उद्धार मिलग्योछ।

¹³ पुराना नियम-कानून का अनुसार याजक जानवरून को खून और बलि का छारा स लोगून में छिड़की जाछो जो नियम का अनुसार अशुद्ध हुनान। इसो करभेरन उनोरो शरीर फिर शुद्ध हो जाछो, अगर येमें आदमीन का शरीरून शुद्ध करना की सामर्थ छै,

¹⁴ तो जरा सोचभेरन देखा कि मसीह को खून हमार दिलून उन कामून भटे कतुक शुद्ध करोलो जो मौत का तरफ भटे ली जाछो, ताकि हम जीवित परमेश्वरै की अराधना कर सका। किलैकी अनन्त आत्मा का सामर्थ का द्वारा, मसीह ले हमार पापून खिन अपूनास निर्दोष बलिदानाक रूप में परमेश्वरेस भेंट चढ़ा दीछ।

¹⁵ यो कारण ले मसीह लोगून का दगाड़ एक नय्या वाचा बाँधछो, ताकि उ लोग जो परमेश्वरा का द्वारा बुलाई ग्यान, उन, उन अनन्त आशीषून पा सकून जिनोरो वादा परमेश्वरेले करिना को छ्यो। इसो येक कारण हो सकछो किलैकी मसीह उनून पापून की सजा भटे आजाद करून खिन मर ग्यो जो उनूनले पैलि वाचा का अधीन रैभेरन करछ्य।

¹⁶ हम जाणनू कि अगर कोई आदिमी अपूनी मौता का बाद अपूनी संपत्ति को बँटवारा का बारिमें आखरी फैसला लिखछो, त यो जरूरी छै कि पैलि उकी मौत हो ताकि उक फैसला स पुरो करि जा सको।

¹⁷ तब वारिस उ सब प्राप्त कर सकछो जो वसीयत में ऊस दीई ग्योछ। किलैकी अगर वसीयत करूनवाला एल ज्यूनो छै, त यो जरूरी नाहातिन कि उक द्वारा दीईना को फैसला लागू करौ जौ।

¹⁸ यो कारण छै, कि परमेश्वरै द्वारा दीईना की पैलि वाचा ले पक्की हुना है पैलि एक बलि करि जानो जरूरी छ्यो।

¹⁹ सबून है पैलि, मूसा ले सब लोगून नियम-कानून को हर हुकुमा का बारिमें बताछ। येक बाद उले जानवरून को खून लीछ और ऊस पानि में मिलाछ। फिर उले ऊस नियम-कानून का किताब और सब लोगून में छिड़कून खिन लाल उन और जूफा नामोको रूखा का हांगा को इस्तमाल करछ्य।

²⁰ और मूसा ले लोगून थैं क्योछ, “यो खून उ वाचा स शुरू करछो जैस मानना को हुकुम परमेश्वरेले तुमून दीईना को छ्यो।”

²¹ और इसीकैं मूसा ले तम्बू और अराधना का पुर चीजून में खून छिड़कछ्य।

²² मूसा का नियम-कानून कुंछो कि लगभग हर चीज स खून छिड़क भेरन साफ करि जान चैछो। खून बगाये बिना, परमेश्वर लोगून उनार पापून खिन माफ नै कर सकनो।

मसीह का बलिदान का द्वारा पापून की माफी

²³ येक कारण सांसारो को तम्बू और उमें मौजूद हर चीज स जानवरून का खून ले शुद्ध करून पड़छ्यो। यो उन चीजून की नकल छै जो स्वर्ग में छै। लेकिन स्वर्ग में की चीजून शुद्ध करून खिन जानवरून का खून है बढ़भेरन महान बलिदान का द्वारा शुद्ध करना की जरूरत छी।

²⁴ उक कारण, मसीह उ पवित्र जाग में नै ग्यो जैस लोगून ले बनाछ, जो कि परम पवित्र जाग की सिर्फ एक छवि छै। लेकिन उ स्वर्ग में ग्योछ जैले उ हमार फैदा खिन परमेश्वरा का सामुनि हाजिर हो सको।

^25-26 महायाजक हर साल एक जानवरो को खून लीभेरन परम पवित्र जाग में जाछो। लेकिन मसीह अपूनास बार-बार बलिदान चढ़ून खिन नै ग्यो। अगर ऊस इसोई करून पड़ूनो त फिर ऊस संसारा का बनून बखत भटे कई बार दुख उठूनो पड़ूनो। लेकिन अब तो अंतिम युग में मसीह हमून खिन अपूनो बलिदान का द्वारा पाप की शक्ति स हमेशा खिन मिटून खिन एक बार सब खिन प्रकट भ्योछ।

²⁷ हरेक आदिमी को एक बार मरून तय छै। मौता का बाद, परमेश्वर हरेक आदिमी को न्याय करोलो।

²⁸ उसीकैं, मसीह ले सब लोगून का पापून अपून मलिमें लीभेरन एक बार बलिदान हो ग्यो। जब उ दुबारा आलो तब उ पापून खिन बलिदान हुन खिन नी आलो बल्कि उनून बचुन खिन जो उको इंतजार करून मर्यान।