इब्रानियों 8 - सोरियाली नय्या नियम

यीशु हमोरो महायाजक

¹ अब जो बात हम कुंन मर्या, उनूनमें भटे सबून है ठूली सच्चाई यो छै, कि हमार पास इसो महायाजक छै, जो ऐल ले स्वर्ग में परमप्रधान परमेश्वरा का सिंहासनाक दैंना तरफ जाभेरन बैठिना को छै।

² हमोरो महायाजक स्वर्ग में भौत पवित्र जाग और उ सच्चो तम्बू को सेवक छै, जैस कोई आदिमी ले नै, लेकिन प्रभु ले ठाड़ करिना को छ्यो।

³ किलैकी हरेक महायाजका का पापून की माफी खिन और बलिदान चढ़ून खिन चुनी जाछो, यो कारण जरूरी छै, कि हमार महायाजक यीशु का पास ले के चढ़ून खिन हो।

⁴ और अगर मसीह धरती में हुनो त कभै याजक नी हुनो, येक कारण धरती में मूसा का नियम-कानून का अनुसार, पैलि भटे याजक भेंट चढ़ूनान।

⁵ जो यो याजक करनान, उन सिर्फ उनेरि एक नकल और एक परछाई छै जो स्वर्ग में छै, लेकिन यो ऊसो नाहातिन जसो स्वर्ग में छै। किलैकी जब मूसा मिलाप वाला तम्बू स बनून खिन तैयार हो रैछ्यो, तब परमेश्वरेले ऊस यो चेतावनी दी, “देख जो नमूना तैंस पहाड़ में दिखाई ग्योछ, उक अनुसार सब कुछ बनाये।”

⁶ लेकिन जो याजक को काम यीशु मसीह मिलछ्य, ऊस उन याजकून है ज्यादा सेवा को काम मिलीना को छै। किलैकी उ उई छै जो महान वादा का अनुसार, परमेश्वरा का सामुनि हमून खिन एक भौत महान वादा का मध्यस्थता करछो।

नय्या वादा

⁷ किलैकी अगर उ पैलि वाचा निर्दोष हुनी, त दुसारा वादा की जरूरत नै हुनी।

⁸ लेकिन परमेश्वरा का लोगून में दोष लगाभेरन कुंछो, “प्रभु कुंछो, देखा उ दिन उनान, कि मैं इस्राएला का लोगून का दगाड़, और यहूदा का लोगून का दगाड़, एक नय्या वादा करूँलो।

⁹ यो वाचा ऊसी नी होलि जसी मैंले उनार पूर्वजून का दगाड़ उ बखत करिना की छी, जब मैंले उनार हात मिस्र देश भटे निकालून खिन पकड़ छ्ये। किलैकी प्रभु कुंछो, उन म्यारा वाचा का विश्वासी नै र्या। मैंले उनेरि चिन्ता करून छोड़ दीछ,

¹⁰ फिर प्रभु कुंछो कि, जो नय्या वाचा उन दिनून में इस्राएलाक लोगून का दगाड़ करूँलो, उ यो छै कि, मैं उनून म्यारा नियम-कानून का बारिमें सोचून द्यूलो, और उन ऊस अपूनो मनून में राखाला, मैं उनोरो परमेश्वर बनूँलो, जैकी उन अराधना कराला।

¹¹ और हरेक अपून देशवासीन का और अपून रिश्तेदारून यो शिक्षा दीना की के जरूरत नी पड़ली कि, ‘तै प्रभु स पछ्याण।’ किलैकी नान भटे ठूला लोगून तक, उन सब स्वीकार कर लीयाला कि मैं उनोरो परमेश्वर छूँ।

¹² किलैकी मैं उनार पापून माफ कर द्यूलो, और उनार पापून फिर याद नी करूँलो।”

¹³ परमेश्वरेले येस एक नय्या वाचा क्योछ, येक कारण उ पैलि वाचा स पुराना कर दीछो। और जो कुछ ले पुरानो छै और घिसी-पिटीना को छै उ नाश हुन खिन तैयार छै।