इब्रानियों 7 - सोरियाली नय्या नियम

मलिकिसिदक याजक

¹ यो मलिकिसिदक शालेम शैहरो को राजा छ्यो और परमप्रधान परमेश्वरो को याजक छ्यो। जब अब्राहम राजान लड़ाई में हराभेरन वापस उन मर्योछ्यो, त मलिकिसिदक थैं मिलछ्य, और ऊस आशीष दीछ।

² अब्राहम ले मलिकिसिदक स लड़ाई में जीतभेरन ल्याईना की सारी चीजून को दसवाँ हिस्सा दीछ। मलिकिसिदक को नामोको मतलब छै, “धार्मिकता को राजा” छै, और शालेम शैहरा का मतलब छै, “शान्ति” छै, त उ “शान्ति को राजा” ले छै।

³ जैका नै त ईजा-बबा छन, नै त खानदान छै, जैको नै दिनून की शुरूवाद छै और नै जीवन को अन्त छै; लेकिन परमेश्वरा का च्याला का नियाती उ हमेशा खिन याजक छै।

⁴ अब येमें ध्यान करा कि मलिकिसिदक कतुक महान छ्यो, जैस हमोरो पूर्वज अब्राहम ले लड़ाई में जीतभेरन ल्याईना का सब चीजून को दसवाँ हिस्सा दीछ।

⁵ मूसा का नियय-कानून बतूना कि लेवी का वंशज, जो याजक बननान, उनून इस्राएला का लोगून, मतलब उन अपून लोगून का पास जो छन उमें भटे दसवाँ हिस्सा लीनो चैछो। परन्तु उन याजक और दुसारा लोग भाईन की नियाती छन किलैकी उन सब अब्राहम का वंशज छन।

⁶ लेकिन यो आदिमी मलिकिसिदक, जो लेवी का वंशो को नी छ्यो, उले अब्राहम थैं दसवाँ हिस्सा लीछ, हालाकि अब्राहम उ छ्यो जैस परमेश्वरोको वादा मिली को छ्यो, फिरले मेलिकिसिदक ले ऊस आशीष दीछ।

⁷ हम निकीकैं जाणनू कि जो आशीष दीछो उ आशीष पान वाला है ठूलो हुछो।

⁸ याजक दसवाँ हिस्सा लीनान, हालाकि उन सिर्फ आदिमी छन जो ज्यूना रूनान और फिर मर जानान। लेकिन यो याजक मलिकिसिदक जैले दसवाँ हिस्सा लीईना को छ्यो, उक बारिमें पवित्रशास्त्र में गवाही दी गैछ कि उ एल ले ज्यूनो छै।

^9-10 त हम यो ले के सकनू, जब अब्राहम ले मलिकिसिदक स दसवाँ हिस्सा दीछ, तब तक लेवी अब्राहम का परिवार में पैद नै भ्यो। लेकिन फिरले यो इसो छै कि अब्राहम का वंशज हुना का कारण लेवी ले खुद ऊस उ दसवाँ हिस्सा दीछ।

मलिकिसिदक का नियाती दुसोरो याजक

¹¹ लेकिन मूसा का नियम-कानून में यो कुंछो, कि याजक लेवी लोगून का खानदान भटे हुनो चैछो, किलैकी याजक कैसे ले सिद्ध नै बना सकनो। येक कारण एक और याजक की उनाकी जरूरत छी, एक इसो याजक जो हारून की नियाती नै बल्कि मलिकिसिदक का नियाती छ्यो।

¹² किलैकी जब याजक को पद बदल जाछो त नियम-कानून को ले बदलून जरूरी छै।

¹³ हम इन बातुन मसीहक बारिमें कुंन मर्या, जो दुसरा गोत्र भटे छ्यो। उ गोत्र में भटे कभै ले केले ले एक याजक का नियाती वेदी में सेवा करिना की नाहातिन।

¹⁴ सबै जाणनान, कि हमोरो प्रभु यीशु यहूदा को वंश को छै, मूसा ले यहूदा का वंशजून में कैसै ले याजक बनना का बारिमें के नै बतायो और नै यहूदा का वंश में भटे कभै कोई याजक बनिना को छ्यो।

¹⁵ अब हम और ले निकीकैं समझ सकनू, कि मूसा का नियम-कानून और याजक स बदल दी ग्योछ, किलैकी हमोरो महायाजक जो एल आर्योछ, उ मलिकिसिदक को जसो एक याजक छै।

¹⁶ यीशु कोई खास आदिमी मतलब लेवी का वंश भटे तालुक राखून वाला नियमून और विदी का कारण याजक नै बन्यो। लेकिन उ अपून जीवन की सामर्थ का अनुसार याजक बन ग्यो जो कभै खत्म नी होलि।

¹⁷ किलैकी परमेश्वरेले उक बारिमें पवित्रशास्त्र में कईना छै, “तै मलिकिसिदक का नियाती हमेशा खिन याजक बन गैछै।”

¹⁸ पैलि मूसा का नियम-कानून उ नै कर पाया जो इनून करून चैछ्यो; और कोई काम का नै हुना का कारण बदल दी ग्यान।

¹⁹ येक कारण मूसा का नियम-कानून कोई ले बात स सिद्ध नै करना, और उकी जाग में हमार पास एक भौत ठूली उमीद छै जो यीशु मसीह में छै, जैक द्वारा हम परमेश्वरा का नजदीक जा सकनू।

²⁰ येक दगाड़ जब परमेश्वरेले यीशु मसीह स याजक का रूप में नियुक्त करछ्य त उले एक कसम खाछ।

²¹ किलैकी लेवी का वंश त बिना कसम खाये याजक बनग्या, लेकिन यीशु मसीह कसम खा भेरन परमेश्वरा का तरफ भटे नियुक्त करि ग्योछ जेले उक बारिमें क्योछ, “मैं परमेश्वर, जो यो कसम खाछूँ, और मैं अपून फैसला ले नै पछतालो कि, ‘तै हमेशा खिन मलिकिसिदका का नियाती एक याजक बन गैछै’।”

²² येक कारण यीशु उ छै जो एक महान वाचा स पुरो हुना को कारण बनछो।

²³ याँ यीशु मसीह को याजक हुना को एक और फैदा छै, उन त भौतसा याजक बननै आयान, किलैकी उनूमें में भटे सबून की मौत हो गैछ और यो कारण उन अपूनो काम जारी नै राख सकना।

²⁴ लेकिन यीशु मसीह हमेशा खिन याजक बनिना को रूछो; येक कारण दुसोरो कोई ले ऊसो याजक नै बनोलो जसो उ छै।

²⁵ येक कारण जो यीशु मसीह का द्वारा परमेश्वरा का पास उनान, उ उनोरो पुरो-पुरो उद्धार कर सकछो, किलैकी उ उनून खिन बिनती करून खिन हमेशा ज्यूनो छै।

²⁶ इसो महायाजक हमेरि जरूरत स पुरो कर सकछो, जो पवित्र हो, जैमें के दोष नै हो, शुद्ध हो, पापिन भटे अलग रूछो, जैस स्वर्ग भटे ऊचो करि ग्योछ।

²⁷ और यीशु मसीह उन महायाजकून का नियाती नाहातिन जो हारूना का वंशज छ्या, यीशु मसीह स यो जरूरी नाहातिन कि हर रोज पैलि अपून पापून और फिर लोगून का पापून खिन बलिदान करो; किलैकी यीशु मसीह ले एक्कै बारिमें सब लोगून का पापून खिन अपूनास बलिदान कर दीछ।

²⁸ किलैकी मूसा का नियम-कानून त कमजोर आदिमी स महायाजक नियुक्त करछी; लेकिन उ कसम जो मूसा का नियम-कानून का बाद आछ उले परमेश्वरा च्याला स महायाजक का रूप में चुन छै। जो हमेशा हमून खिन सिद्ध महायाजक बन ग्योछ।