इब्रानियों 6 - सोरियाली नय्या नियम

¹ येक कारण जब हमून सबून है पैलि मसीह का बारिमें सिखाई ग्योछ, उनी बुनियादी शिक्षान दोहराते नै रौ; आ हम मसीह का शिक्षा है अघिल बढ़भेरन शिक्षान का बारिमें बातचीत करा। हम अपून पापी आदतून, जो मौता का तरफ ली जानान, पश्चाताप कसकैं करूनो चैछो, और परमेश्वर में विश्वास करूना का बारिमें,

² और तुमून बपतिस्मा का बारिमें, और केका मलि में हात राखभेरन आशीष दीना का बारिमें, और मरिनान में भटे ज्यूना हुना का बारिमें, और आखरी न्याय का शिक्षा की बुनियाद फिर डालना की जरूरत नाहातिन।

³ अगर परमेश्वर चालो, त मैं तुमून सही शिक्षा द्यूलो।

⁴ जो लोग विश्वास स छोड़ दीनान, उनून फिर पश्चाताप करना खिन वापस नै लीयाई जा सकूनो। उनूनले एक बार परमेश्वर की सच्चाई स जाणभेरन, जो परमेश्वरा का तरफ भटे उछी और उनून स्वर्ग भटे बरदान मिलीना को छै और उनून दुसरान का दगाड़ मिलभेरन पवित्र आत्मा ले पाछ।

⁵ उनूनले अनुभव करिना को छ्यो कि परमेश्वरा का तरफ भटे उनवाला संदेश निको छै और उनूनले उ उनवाला परमेश्वरा का राज्य की सामर्थस ले अनुभव करिना को छै।

⁶ उनून दुबारा वापस ल्यूना का कोई बाटो नाहातिन क्याखिन उन परमेश्वर भटे दूर हो ग्यान, और उन खुद परमेश्वरा का च्याला स दुबारा सूली में चढ़ूनान और ऊस शर्मिदा करनान, जैका कारण दुसारा लोगून का सामुनि मसीह स नीचो दिखूनान।

⁷ जिन लोगून निकी शिक्षा मिलीना छै, उन उ जमीनै की नियाती छन जैमें भौत बरखा हुछी। अगर जमीन निकी छै, त उ किसान स निकी फसल दीछी और उमें परमेश्वर की आशीष हुछी।

⁸ दुसारा लोग उ जमीनै की नियाती छन जैमें काँणा और झिलझाल पैद हुनान, जिनरी के कीमत नाहातिन। परमेश्वर इसी जमीन स श्रापित करोलो, और इमें पैद हुनान वाली बेकार चीजून आग में जला द्योलो।

⁹ लेकिन हे म्यारा विश्वासी भाईयो, तुम निको काम करून में रौ। किलैकी परमेश्वरेले पैलि तुमून बचा लीछ। येक कारण यो सारी बात तुमून खिन नाहातिन।

¹⁰ जसा तुमूले निका काम करिना का छन और ऐल तुम परमेश्वरा का नाम में परमेश्वरा का लोगून खिन प्रेमा दगाड़ सेवा को काम करून मरेछा, येक कारण परमेश्वर तुमार कामून नी भुलोलो। किलैकी उ धर्मी छै।

^11-12 आलसी जन बना। लेकिन कड़ी मेहनत करून वालान की नियाती तुमून अंत तक धीरज और विश्वास में मजबूत आश राखभेरन इन प्रेम का कामून करून जारी राखून चैछो, ताकि परमेश्वरा का करिना का वादा पा सका।

परमेश्वरो को अटल वादा

¹³ परमेश्वरेले जब अब्राहम थैं वादा करछ्य, त उहै ठूलो कोई और नी छ्यो, जैकी कसम खा सकछ्या, येक कारण उले अपूनी कसम खाभेरन क्योछ,

¹⁴ “मैं सच्ची में तैंस भौत आशीष द्यूलो, और त्येरा वंश को बढ़ूनै जूलो।”

¹⁵ अब्राहम ले धीरज राखभेरन लम्बा बखत तक इंतजार करछ्य। तब ऊस उ मिलछ्य जैको वादा परमेश्वरेले करिना को छ्यो।

¹⁶ कसम खान बखत लोग हमेशा अपून है ठूला आदिमी को नाम लीनान। कसम यो साबित करछी कि जो उन कुंन मर्यान उ सच्ची छै, और यो हरेक बिवाद स खतम कर दीछो।

¹⁷ येक कारण परमेश्वरेले एक कसम खाछ। येक द्वारा उ उन लोगून जिनूनथैं वादा करिना को छ्यो यो दिखून चाछो कि उ ऊस पुर करोलो जैको वादा उले करिना को छ्यो।

¹⁸ त फिर याँ द्वी बातुन को जिकर छै, एक परमेश्वरो को वादा और दुसरी उकी कसम, जो कभै नै बदली सकूनो और जिनारा बारिमें परमेश्वर कभै झूठ नै के सकनो। येक कारण हम जो परमेश्वरा का पास सुरक्षा पान खिन आईना का छा और जो आश उले हमून दी रैछ, ऊस थामिना का छा, और हम भौत खुश छा।

¹⁹ जसीकैं एक ठूलो टुकूड़ो स जियोड़ा में बाँदीभेरन नाव स रोकछी और मजबूत राखछी, उसीकैं यो आश हमार जीवन स रोकछी और मजबूत बना राखछी। जैमें हम आश करनू उ यीशु छै; जो स्वर्ग में महापवित्र जाग में परमेश्वरा का पास ग्योछ।

²⁰ यीशु हमून है अघिल और हमून खिन स्वर्ग में ग्योछ। उ याजक मलिकिसिदक का नियाती हमेशा खिन महायाजक बन ग्योछ।