इब्रानियों 5 - सोरियाली नय्या नियम

¹ परमेश्वर हरेक महायाजक स इस्राएला का लोगून में भटे चुनछो, और उ लोगून की भलाई खिन परमेश्वरो को काम करून खिन नियुक्त करि जाछो। उ येक कारण भेंट और बलि चढ़ूछो ताकि परमेश्वर लोगून का पापून माफ कर दे।

² किलैकी उ एक आदिमी हुना का नाता ले उ खुद ले दुर्बलतान का अधीन ले छै। यो कारण उ नासमझ और भटकिना का लोगून का दगाड़ प्रेम ले ब्यवहार कर सकछो।

³ और एक महायाजक हुना का नाता ले उ खिन यो जरूरी छै कि उ लोगून का पापून दूर करून खिन बलिदान चढ़ौ, और अपून पापून ले दूर करून खिन ले बलिदान चढ़ौ।

⁴ कोई ले आदिमी खुद स महायाजक हुना को सम्मान दीना को फैसला नै कर सकनो, एक आदिमी सिर्फ येक कारण महायाजक बनछो किलैकी परमेश्वरेले ऊस नियुक्त करिना को छै जसीकैं पैलो महायाजक हारून नियुक्त करि गैछ्यो।

⁵ उसीकैं, मसीह ले अपूनास महायाजक बनून खिन नियुक्त करभेरन खुद अपूनो सम्मान नै कर्यो, बल्कि परमेश्वरेले मसीह थैं यो कैभेरन ऊस नियुक्त करछ्य जो उले कोई दुसारा याजक थैं कभै नै क्यो, जो कि पवित्रशास्त्र में भजनकार ले लिखीना को छै, “तै म्येरो च्योलो छै; आज मैं यो घोषणा करछूँ कि मैं त्येरो बबा छूँ।”

⁶ इसा तरीका ले दुसरा जाग में परमेश्वरेले उथैं फिर क्योछ, उसीकैं “तै हमेशा खिन एक याजक छै, जसीकैं मलिकिसिदक एक याजक छ्यो।”

⁷ यीशु मसीह ले यो धरती में अपून जीवनकाल में उथैं, जोरले धध्याभेरन और रोभेरन, परमेश्वरथैं प्रार्थना और बिनती करछ्य जो ऊस मौत भटे बचा सकछ्यो, और अपूनास परमेश्वरे स सौपना का कारण उकी प्रार्थना और बिनती सुणि गैछ।

⁸ जब की, यीशु परमेश्वरा का च्योलो छै, उले उन दुखून का द्वारा जो उले सहन करछ्य, परमेश्वरो को हुकमून को मानूनो सिखछै।

⁹ परमेश्वरेले ऊस एक महायाजक का रूप में स्वीकार करछ्य जो कि हर तरीका ले सिद्ध छ्यो। उ उन सबै लोगून अनन्त जीवन दीन खिन एक बुनियाद का रूप में ठाड़ छै जो उको बचन को पालन करनान।

¹⁰ और ऊस परमेश्वरा का तरफ भटे महायाजक पद मिलछ्य जसीकैं मलिकिसिदक स मिलछ्य।

विश्वास भटे भटक जाना को नतीजा

¹¹ येक बारिमें बतून खिन भौत कुछ छै लेकिन उनार बारिमें बिस्तार में बतूनो मुश्किल छै। किलैकी तुम परमेश्वरा का बचन स सिखून में आलसी बन गैछा।

¹² सच्च त यो छै, कि यो बखत तक त तुमून शिक्षा दीन वाला बन जानो चैछ्यो। लेकिन तुमून त ऐल कोई इसा आदिमी की जरूरत छै जो तुमून दुबारा है परमेश्वरे की शिक्षा का बातुन शुरू भटे सिखौ। तुम इसा बन गैछा कि तुमून अनाजा का बदला ऐल तक दूध चैछो।

¹³ जो लोग दूध पिनान उन उ नान बच्चा का नियाती छन जो सच्ची में परमेश्वरा का नजरून में सही जीवन जीना का बारिमें नै जाणना।

¹⁴ ठोस अनाज सिर्फ उन लोगून खिन छै जो परिपक्व छन और परमेश्वरा का नजरून में ठीक तरीका जीवन जीनान और परमेश्वरा का शिक्षा का द्वारा सिख चुक ग्यान कि निको छै और कि बुरो छै।