इब्रानियों 4 - सोरियाली नय्या नियम

परमेश्वरा का लोगून आराम

¹ परमेश्वरेले हमूनथैं वादा करिना को छै कि हम आराम का जाग में जूला, येक कारण आरामा का जाग में पुजना को वादा आजि ले छै। त हमून भौत सतर्क रूनो चैछो; और तुमून में भटे कैसे ले उ आरामा का जाग में जाना को मौका नै छोड़ून चैछो।

² जसीकैं हमून यीशु मसीह का बारिमें सुसमाचार सुणछ्य, उसीकैं इस्राएल का लोगून ले आरामा जाग में पुजना को सुसमाचार सुणछ्य। लेकिन उनूनले उमें विश्वास नै कर्यो। किलैकी, उ सुसमाचार उनून खिन बेकार छ्यो।

³ येक कारण हम लोग जो उ बात में विश्वास करनू जो परमेश्वरेले कईना की छै, आरामा का जाग में पूजला; और जसो दुसरान का बारिमें परमेश्वरेले क्योछ, “मैंले अपून गुस्सा में कसम खाछ, कि उन म्यारा आरामा का जाग में नी जा पाला।” परमेश्वरे ले यो येक कारण नै कयो किलैकी आरामा की जाग एल तैयार नी छी। यो संसार स बनून बखत भटे ही तैयार हो चुक गैछी।

⁴ किलैकी सातवाँ दिन का बारिमें परमेश्वरे ले पवित्रशास्त्र में इसीकैं कईना को छै, “परमेश्वरे ले सातवाँ दिन अपून सब कामून पुरो करभेरन आराम करछ्य।”

⁵ हमूनले पवित्रशास्त्र में यो ले पढ़ीना को छै, “उन म्यारा आरामा का जाग में नी जा सकाला।”

⁶ इस्राएलाक उन लोग, जिनारा बीच पैलि बार सुसमाचार सुणाई ग्योछ, उन वाँ जान में असफल हो ग्यान किलैकी उनूनले परमेश्वरा का हुकमून नै मान्यो। लेकिन उनून खिन उ आरामा का जाग में जाना को आजि ले मौका छै।

⁷ येक कारण परमेश्वरे ले अपून आरामा का जाग में जान खिन एक बखत तय कर रैछ, और उ बखत आज छै। और कई साल बाद, उले दाऊदाका द्वारा इन बातुन कुंछो, जो पैलि भटे कयी गैछ्या। “अगर आज तुम परमेश्वरे की आवाज सुणछा, त अपून मन स कठोर जन करा।”

⁸ और इस्राएला का लोगून का बारिमें, अगर यहोशू ले उनेरि अगुवाई करभेरन उनून उ आरामा का पुजाछ जो परमेश्वरे ले तैयार करिना को छ्यो, त फिर यो जरूरी नाहातिन कि परमेश्वर फिर हमून एक बार उ बखत का बारिमें बतूनो जब लोगून उमें भेजि जाला।

⁹ येक कारण परमेश्वरा का लोगून खिन आजि ले एक जाग तैयार छै, जाँ उन पुर तरीका ले आराम कर सकनान। उन उई तरीका ले आराम कराला जसीकैं परमेश्वरे ले सातवाँ दिन आराम करछ्य।

¹⁰ परमेश्वरेले अपूनो काम स खतम करना का बाद आराम करछ्य। और यो उन सबून का नियाती छै जो परमेश्वरा का पास आराम करून जानान। उन अपूनो काम खतम करना का बाद आराम कराला।

¹¹ येक कारण हम उ आरामा का जाग में पुजना की कोशिश करा, किलैकी कोई ले आदिमी स उन लोगून की नकल नै करूनी चैनी जिनूनले परमेश्वरा हुकमून मानून है मना कर दीछ। तब हम उ आरामा का जाग में पूजला।

¹² किलैकी परमेश्‍वर का बचन जीवित और असरदार छै, और उ द्वी धारी तलवार है ले ज्यादा तेज छै, जो हमार भितर आभेरन हमेरि आत्मा, प्राण, जोड़ून और गुदा-गुदा स भेद दीछो, और यो हमार मनै की इच्छान और बिचारून परखछो।

¹³ परमेश्वरा का नजरून में यो संसारो को कोई ले आदिमी लुकीना को नाहातिन, हमून सब कामून को हिसाब दीन पड़ोलो उक सामुनि सब चीज खुलीना का और प्रगट छन।

हमोरो महान महायाजक

¹⁴ यीशु जो स्वर्ग खिन ग्योछ, उ परमेश्वरो को च्योलो छै। उ हम सबून को महायाजक छै। येक कारण आ हम उ विश्वास स छोड़े बिना मजबूती ले बनिना का रौ, जैस हमूले सबून का सामुनि स्वीकार करिना को छ्यो।

¹⁵ किलैकी यो महायाजक, जो यीशु मसीह छै, हमेरि हरेक कमजोरी स समझछो। शैतान ले हमार नियाती हर बात में यीशु मसीह की परीक्षा लीछ; लेकिन उले कोई ले पाप नै कर्यो।

¹⁶ येक कारण आ हम बिना केका डरले परमेश्वरा सामुनि आ, तब परमेश्वर हमून में दया और अनुग्रह दिखालो, और जब हमून जरूरत होलि तब उ हमरि मद्दत करोलो।