इब्रानियों 2 - सोरियाली नय्या नियम

उद्धारा का बारिमें चेतवानी

¹ येक कारण हमून जो सुसमाचार मिलीना को छै, उमें निकीकैं ध्यान दिन चैछो। काँई इसो नै हो कि हम सच्चाई भटे भटक ज्या।

² किलैकी यहूदी लोगून ले उन नियम कानून में विश्वास करछ्य, जो परमेश्वर ले मूसास स्वर्गदूतून का द्वारा दीईनाक छ्या। जब यो साबित भ्योछ, त हरेक अपराध और हुकुम नै मानना का कारण परमेश्वर ले उनून सजा दीछ।

³ त हम लोग कसीकैं बच सकला, अगर हम यो महान उद्धारो को तिरस्कार करला? यो महान उद्धारा का बारिमें हम प्रभु यीशु मसीह का द्वारा जाण पाया। और जिन शिष्यून ले उथैं सुणिना को छ्यो, उनूले हमून बातछ की यो सच्ची छै।

⁴ और दगाड़-दगड़े परमेश्वर ले अपूनी इच्छा का अनुसार चमत्कार, और अद्धभुत कामून, और कई प्रकाराक सामर्था का कामून, और पवित्र आत्मा का बरदानू बाड़ना का द्वारा येस सच्ची में साबित करनै र्योछ।

हमोरो उद्धारकर्ता

⁵ परमेश्वरले उ उनवाला संसार स, जैक बारिमें हम कुंन मर्या, स्वर्गदूतून का अधीन नै, बल्कि यीशु मसीहक अधीन करिना को छै।

⁶ लेकिन पवित्रशास्त्र में केले यो कईना को छै; आदिमी छै कि तुम ऊस याद करा या आदिमी कि छै, कि तै परमेश्वर, उनेरि चिन्ता करो? उ आदिमी है ज्यादा के नाहातिन।

⁷ पिता परमेश्वर तैले आदिमी स सिर्फ थ्वाड़ा बखत खिन स्वर्गदूतून है थ्वाड़ा कम शक्ति का दगाड़ बनाछ, तैले ऊस एक राजा नियाती महिमा और सम्मान दीछ, और ऊस अपून हातुन का कामून में अधिकार दीछ।

⁸ “तैले सब कुछ उक अधीन में कर हैछ।” येक कारण याँ इसो लागछो कि परमेश्वर ले सब कुछ आदिमी का अधीन कर दी हैछ। इसो केले नाहातिनो, जो उक अधीन नै हो। लेकिन हम देख सकनू कि आज तक ले सब कुछ आदिमी में नाहातिन।

⁹ लेकिन हम यीशु स देखनू! ऊस थ्वाड़ा बखत खिन स्वर्गदूतून है थ्वाड़ा कम कर दी ग्योछ, ताकि परमेश्वरा का अनुग्रह ले उ सबून खिन मर ज्यो। और येक कारण उले दुख उठाछ और मरग्यो, संसारा का सब लोगून खिन मरग्यो। परमेश्वर ले ऊस महिमा और आदर दीछ।

¹⁰ किलैकी परमेश्वरेले सब कुछ बनाछ और सब कुछ उको छै, ऊस यो निको लागछ्य, ताकि उ भौत सारा लोगून अपूनी महिमा में भागीदार करो, परमेश्वरेले को फैसला लीछ कि यो सही होलो कि प्रभु यीशु दुख उठाभेरन इसो आदिमी बन ज्यो जो चरित्र में पूर्ण छै। क्याखिनकि यीशुई छै जो उनून उद्धारा का तरफ ली जा सकछो।

¹¹ क्याखिनकि जो लोगून उनार पापून भटे शुद्ध करछो, और जो लोग पापून भटे शुद्ध करि जानान, उन सबून को एक्कै पिता छै; योई कारण उ उनून भाई-बैनि कुन में नै शरमानू।

¹² येका बारिमें मसीह परमेश्वर थैं इसीकैं कुंछो: “जो भल काम तैले मैंखिन करिना का छन, उ मैं अपून लोगून बतुलो, जब उन तेरि अराधना करून खिन जामा होला, तब मैं उनार बीच तेरि महिमा करूँलो।”

¹³ उ फिर कुंछो: “मैं परमेश्वर में भरोस राखूँलो।” और फिर यो ले कुंछो: “या मैं उन लोगून का दगाड़ छूँ जो परमेश्वर ले मैंस दी रैछ।”

¹⁴ किलैकी जिनून परमेश्वरेले नान्तिना कैभेरन बुलाछ, मतलब कि जो मास और खूनाक बनिना का छन, यीशु हर तरीका ले हमार नियाती बन गयो और संसार में आछ ताकि उक मरना का द्वारा, मौत में अधिकार राखून वाला शैतान स नाश कर सकौ।

¹⁵ यो कारण प्रभु यीशु ले उन लोगून को उद्धार करछ्य जो अपूनो पुर जीन्दगी मौताक डर में होभेरन गुलामून की नियाती जीन मरेछ्या।

¹⁶ किलैकी प्रभु यीशु त स्वर्गदूतून नै बल्कि अब्राहम का वंश की मद्दत करछो।

¹⁷ यो कारण ले ऊस हर तरीका ले अपून भाईन की नियाती बनूनो पड़छो। इसीकैं उ परमेश्वरो को महायाजक बनछ्य जो कि दयालु और विश्वासयोग्य छै। और येक कारण उ अपूनास एक बलिदान का रूप में चढ़ा सको जो लोगून का पापून दूर कर द्योलो।

¹⁸ किलैकी जब उले परीक्षान का बखत दुख सहन करछ्य त अब उ उन लोगून की मद्दत कर सकछो जो परीक्षान ले दुखून को सामना करून मर्यान।