गलातियों 6 - सोरियाली नय्या नियम

एक दुसरा की मद्दत करा

¹ हे म्यारा विश्वासी भाईयों, अगर कोई विश्वासी कसा ले पाप का बश में आ जाछो, त तुमून में भटे उन जिन मार्गदर्शन पवित्र आत्मा करछो, नम्रता का दगाड़ ऊस सच्चाई का बाटा में वापस ल्यूनखिन उकी मद्दत करा, और सतर्क रौ, ताकि तुम खुद ले ऊसी परीक्षा में जन पड़ा।

² जब हमून में भटे कोई मुसीबत में हो, त हमून एक-दुसरा की मद्दत करून चैंछी, और इसीकैं हम मसीह का नियम-कानून को पालन करनू।

³ अगर तुमून लागछो कि कैकी मद्दत करून खिन तुम भौत खास छा त तुम सिर्फ अपूनास ध्वाका दीन मरैछा। तुम इतुक ले खास नाहातिन।

⁴ लेकिन हरेक आदिमी अपून कामून की खुद जाँच कर ले उ निका छनी या नाहातिन। अगर उले निको काम करिना को छै, त उ अपून काम में घमण्ड कर सकछो लेकिन ऊस अपून कामून की तुलना दुसारा लोगून काम भटे नै करूनी चैंनी।

⁵ हमून में भटे हरेक स अपून कामून की खुद जिमेदारी लीन चैंछी।

⁶ जिन लोगून परमेश्वरा का वचने की शिक्षा दी जांछी, त उनोरो फर्ज बनछो, कि जो केले उनार पास छै, उनूनले लोगून का दगाड़ बाणून चैंछो जो उनून सिखीना को छै।

⁷ अगर हम इसो कुंनू कि हम परमेश्वरे स ध्वाका दी सकनू, त हम अपूनास ध्वाका दीन मर्या। क्याखिनकि आदिमी जो कुछ बूछो, उई काटोलो।

⁸ अगर कोई आदिमी अपून पापी स्वभाव की इच्छान का अनुसार जीवन जीनान त उ हमेशा की मौत की सजा मिलेलि। अगर कोई पवित्र आत्मा का इच्छा का अनुसार अपूनो जीवन जीछो त ऊस अनन्त जीवन दी जालो।

⁹ हमून भल काम करनू बखत निराश नै हुन चैनो, क्याखिनकि अगर हम मजबूत बनिना का रूला, त परमेश्वरा का बखता का अनुसार ईनाम पाला।

¹⁰ येक कारण जाँ तक मौक मिलछो त हमून सब लोगून का दगाड़ भलाई करून चैंछी; खास करभेरन विश्वासी भाई-बैनिन का दगाड़, जो मसीह में छन।

आखरी चेतावनी और नमस्कार

¹¹ मैंले तुमून खुद अपून हात ले कतुक ठूला-ठूला शब्दून में लिख रैछ।

¹² येक कारण कि यहूदी तुमून स्वीकार करून, उन तुमूनथैं खतना करून खिन कौला। उन केवल इसो करनान ताकि लोग उनून यो प्रचार करना का कारण सतून नै कि परमेश्वर लोगून केवल सूली में मसीह का मौत का द्वाराई बचूछो।

¹³ याँ तक कि खतना करिना का यहूदी विश्वासी मूसा का सबै नियम-कानून को पालन नै करना, लेकिन उन चानान कि तुम खतना करवा ताकि उन दुसारा यहूदीन में घमण्ड कर सकून, जिनारा कारण ले तुमोरो खतना भ्योछ।

¹⁴ मैं खिन, मैं सूली में हमार प्रभु यीशु मसीह की मौत का अलावा कै और चीज को घमण्ड नै करून चानू। उले जो कुछ ले करछय, उई कारण ले संसारा का चीजून को मैंमें कोई अधिकार नाहातिन, और मैंस अब संसारिक चीजून करना की कोई इच्छा नाहातिन।

¹⁵ क्याखिनकि नै खतना वाला, और नै बिना खतना वाला के मायना नै राखना, लेकिन इन सब बातुन को मतलब यो छै कि परमेश्वर ले पवित्र आत्मा का काम का द्वारा तुमून एक नय्या आदिमी बनाछ।

¹⁶ परमेश्वर उन सबून अपूनी शान्ति द्योलो और उमें दया करोलो जो यो नियम-कानून का पालन करनान और उनून आशीष द्योलो, क्याखिनकि उन परमेश्वरा का लोग छन।

¹⁷ अघिलकैं कोई मैंस दुख जन दी, क्याखिनकि म्यारा शरीर में जो दाग छन उन देखूनान कि मैं यीशु को एक प्रेरित छूँ।

¹⁸ हे म्यारा विश्वासी भाईयों, मैं प्रार्थना करछूँ कि हमार प्रभु यीशु मसीह को अनुग्रह तुम सबून का दगाड़ हो।