गलातियों 3 - सोरियाली नय्या नियम

नियम-कानून या विश्वास

¹ हे गलातिया शैहरा का विश्वासी लोगों, क्या तुम ना समझछाई, केले तुमून भरमा दीछ? मैंले तुमून बड़िया तरीका ले समझाछ कि जब यीशु मसीह स सूली में चढ़ाई ग्यो, त उले की पुरो करछ्य।

² मैं तुमूनथैं केवल यो जाणून चाछूँ, कि तुमून पवित्र आत्मा कसीकैं मिलछै? क्या मूसा का नियम-कानून स मानना का द्वारा तुमून पवित्र आत्मा मिलछी? नै, तुमून पवित्र आत्मा येक कारण नै मिल रियो क्याखिनकि तुमूले यीशु मसीह का बारिमें सुसमाचार स सुणछ और उमें विश्वास करछ्य।

³ क्या तुम इतुक ना समझछा, कि तुमूले पवित्र आत्मा का काम का द्वारा अपून मसीह जीवन की शुरूवाद करछ्य, क्या तुम अब येस अपून संसारिक कामून का द्वारा खतम करून चाछाई?

⁴ विश्वासी बनना का बाद तुमूले भौत दुख उठाछ। मैं सच्ची में यो उमीद करछूँ कि यो दुख बेकार में नी छ्यो।

⁵ परमेश्वर जो तुमून पवित्र आत्मा बहुताईले दीछो, और तुमून में चमत्कारा काम करछो, क्या उ यो कारण छनी कि तुमूले मूसा का नियम-कानून को पालन करछ्य? यो येक कारण छी कि तुमूले मसीह का बारिमें सुसमाचारै स सुणछ्य और उमें विश्वास करछ्य?

⁶ “अब्राहम का बारिमें सोचा, जैले परमेश्वर में विश्वास करछ्य, और उक विश्वास का कारण परमेश्वर ले ऊस एक धर्मी आदिमी का रूप में अपनाछ।”

⁷ येक कारण, तुमून यो जाणून जरूरी छै कि जो लोग अब्राहम का नियाती परमेश्वर में विश्वास करनान, उनी अब्राहम का सच्चा वंशज छन।

⁸ पवित्रशास्त्र में भौत बखत पैलि यो लिखी कि ग्योछ, परमेश्वर गैर-यहूदी लोगून विश्वास का द्वारा धर्मी ठैहरालो, योई कारण छै कि पवित्रशास्त्र में, जब परमेश्वरे ले पैलि अब्राहम स सुसमाचार बताछ त उले उथैं क्योछ, कि “त्यारा द्वारा, मैं यो संसारा का सब लोगून आशीष द्यूलो।”

⁹ परमेश्वर ले अब्राहम स उक विश्वास का कारण आशीष दीछ, उसीकैं जो कोई ले यीशु मसीह में विश्वास करछो उ पक्का अब्राहम का दगाड़ परमेश्वर भटे आशीष पालो।

¹⁰ येक कारण जतुक लोग मूसा का नियम-कानून का कामून में भरोसा राखनान, उन परमेश्वरा का श्राप का अधीन छन, क्याखिनकि पवित्रशास्त्र में लिखीना को छै, “जो मूसा का नियम-कानून की किताब में लिखीना की छै सब बातुन को पालन नै करनो, उ परमेश्वरा श्राप का अधीन छन।”

¹¹ लेकिन यो बात सच्ची छै, कि मूसा का नियम-कानून का द्वारा परमेश्वरा का सामुनि कोई धर्मी नै ठैहरनो; क्याखिनकि पवित्रशास्त्र में लिखीना को छै, कि उ जो धर्मी छै, उ विश्वास का द्वारा ज्यूनो रौलो।

¹² लेकिन मूसा का नियम-कानून को पालन करभेरन जीया और परमेश्वर में भरोस करभेरन ज्यून एक समान नाहातिन। जसिकै कि पवित्रशास्त्र में लिख रैछ, “जो इन सब बातुन को पालन करोलो, ऊस इनारा द्वारा जीन्दगी मिलेलि।”

¹³ मसीह जो सूली में मरना का कारण हमून खिन श्रापित बनछ्य, और उले हमून मोल लीभेरन मूसा का नियम-कानून का श्राप भटे बचाछ, क्याखिनकि पवित्रशास्त्र में लिखीना को छै, “जो कोई सूली पर चढ़ाई भेरन मारी जाछो उ श्रापित छै।”

¹⁴ मसीह ले इसो येक कारण करछय, कि अब्राहम की आशीष जैस दीना को वादा परमेश्वरे ले करिना को छ्यो, यीशु मसीह में गैर-यहूदी लोगून तक पुजौ, और हम यीशु मसीह में विश्वास करना का द्वारा उ पवित्र आत्मा स पाभेरन, ऊस हमून दीना को वादा परमेश्वरले करिना को छै।

नियम-कानून और वादा

¹⁵ हे म्यारा विश्वासी भाईयों, मैं तुम लोगून साधारण जीवन को उदारण दीभेरन कुंछूँ। जब द्वी लोग आपस में समझौता करनान, नै त कोई ऊस टाल सकछो और नै त उमें कै जोड़ सकछो।

¹⁶ उसीकैं परमेश्वरे ले अपून वादा अब्राहम स और उक वंश स दीछ। पवित्रशास्त्र यो नै कुंनो कि, “त्यारा वंश को,” जैस भौत का बारिमें क्योछ, लेकिन यो एक आदिमी का के बारिमें बात करछो कि, “त्यारा वंश को,” और उ आदिमी मसीह छै।

¹⁷ लेकिन मैं जो तुमून समझून चाछूँ उ यो छै, कि जो वादा परमेश्वर ले अब्राहमा का दगाड़ पैलि भटे पक्को करिना को छ्यो, ऊस मूसा का नियम-कानून का चार सौ तीस साल बाद ले आभेरन रद्द नै कर सकूँना कि उको वादा बेकार छै।

¹⁸ परमेश्वर ले हमून आशीष येक कारण नै दी रै कि हमूले मूसा का नियम-कानून को पालन करिना को छ्यो, लेकिन उ येक कारण दीछो, क्याखिनकि उले दीना को वादा करिना को छ्यो, उसीकैं, परमेश्वर ले यैस अब्राहम स दीछ क्याखिनकि उले उथैं येको वादा करिनाको छ्यो।

मूसा का नियम-कानून को मक्शद

¹⁹ त फिर परमेश्वर ले को मक्शद ले इस्राएल लोगून मूसा का नियम-कानून दीयान? परमेश्वर ले नियम-कानून येक कारण दीयान, ताकि लोग जाण सकूँन कि पाप की छै? मूसा का नियम-कानून अब्राहम का उ वंश तक बनिना को रून चैछ्यो, जैका बारिमें परमेश्वर ले वादा करछ्य। परमेश्वर ले नियम-कानून मूसास स्वर्गदूतून का द्वारा दीयान, जो परमेश्वर और लोगून का बीच मध्यस्थ छयो।

²⁰ जब द्वी लोगून का बीच समझौता हुछो, तब मध्यस्थ की जरूत हुछी। लेकिन परमेश्वर एक्कै छै, और जब उले अब्राहम थैं वादा करछ्य त उनार बीच कोई मध्यस्थ नी छ्यो।

²¹ त क्या येक मतलब यो छै कि मूसा का नियम-कानून परमेश्वरा का वादान का खिलाफ छनी? नै! बिल्कुल नै। क्याखिनकि अगर मूसा का नियम-कानून हमून अनन्त जीवन दी सकनान, त हम येको पालन करभेरन परमेश्वरा का दगाड़ सही ठैहराई जा सकछ्या।

²² लेकिन पवित्रशास्त्र हमून यो देखूछो, कि हम सब पापी छा, ताकि परमेश्वर ले जो वादा करिना को छै, उ उन लोगून दी सकों जो यीशु मसीह में विश्वास करनान।

²³ लेकिन मसीह का उना और उमें विश्वास करूना है पैलि हम यहूदी लोग जेल में बन्द छ्या, और मूसा का नियम-कानून हमरि रखवाली करछ्या, और मूसा का नियम-कानून ले हमून कैदीन की नियाती राखिना को छ्यो जब तक परमेश्वर ले हमून में मसीह स प्रकट नै कर्यो।

²⁴ येक कारण मूसा का नियम-कानून मसीह का ऊँन तक हमून बाटो दिखून खिन और हमरि रखवाली करून खिन दी ग्यान, ताकि हम यीशु मसीह में विश्वास करूना का द्वारा परमेश्वरा का सामुनि धर्मी बन सकनूँ।

²⁵ लेकिन अब जब हमूले मसीह में विश्वास करनू, त हमरि मद्दत करून खिन और हमून बाटो दिखून खिन मूसा का नियम-कानून की जरूत नाहातिन।

^26-27 जब तुमून मसीह का नाम ले बपतिस्मा दीई ग्योछ, त तुमूले मसीह का नय्या जीवन स पैन हालछ्य जसीकैं एक आदिमी नय्या कपड़ान पैन लीछो। येक कारण, तुम सब परमेश्वर की संतान बन गैछा जब तुमूनले यीशु मसीह में विश्वास करछ्य।

²⁸ मसीह में, अब नै तो कोई यहूदी छै और नै गैर-यहूदी, नै त कोई दास छै और नै स्‍वतन्‍त्र, नै तो कोई आदिमी छै और नै स्‍यैनि छै, क्याखिनकि तुम सब यीशु मसीह में एक छा।

²⁹ क्याखिनकि अगर तुम मसीह में एक छा, त अब तुम अब्राहम का परिवार का हिस्सा छा, और तुमून उ सब कुछ मिलोलो, जैको परमेश्वर ले अब्राहम थैं वादा करिना को छ्यो।