इफिसियून 5 - सोरियाली नय्या नियम

उज्याला की संतान बना

¹ तुम परमेश्वरा का नानतिना छा जैस उ प्रेम करछो, येक कारण उक जसा बनना की कोशिश करा।

² मसीह का उदारण में हिटभेरन, तुम एक दुसरा से प्रेम करा, जसीकैं मसीह ले तुमून प्रेम करछो, और हमार पापून दूर करून खिन अपूनास बलिदान कर दीछ। और परमेश्वर येले खुश छ्यो, क्याखिनकि उ बलिदान उ खिन खुशबुदार इत्र का नियाती छ्यो।

³ तुम परमेश्वरा का लोग छा, येक कारण तुमार बीच ब्यभिचार, और कोई ले बुरा काम, या लालच की बात तक जन करा।

⁴ और नै बुरी, नै मूर्खता की, और नै मजाक की घटिया बात हुनी चैछी; क्याखिनकि इसी बातचीत तुमून खिन ठीक नाहातिन, लेकिन इसा जाग तुम परमेश्वरो को धन्यबाद दीन चैछो।

⁵ क्याखिनकि तुम यो निकीकैं जाणछा कि कोई ले व्यभिचारी, बुरा काम करून वालो, या लालची आदिमी, जो मूर्ति पूजा का बराबर छै, इसा काम करूनवाला लोग कभै ले मसीह का राज्य कि हिस्सा नी बनाला।

⁶ उन लोगून का द्वारा मूर्ख जन बना जो इन पापून खिन बहाना बनूना की कोशिश करनान। क्याखिनकि इनी कामून का कारण परमेश्वरो को क्रोध हुकुम नै मानूनवालान में भड़कछो।

⁷ येक कारण तुम इसा बुरा काम करभेरन उनार भागीदार जन बना।

⁸ क्याखिनकि तुम उन लोगून की नियाती छ्या, जो अन्धकार में रूनान, लेकिन अब प्रभु में उज्यालो छा, येक कारण उज्याला का सन्तान का नियाती जीन्दगी जीआ।

⁹ क्याखिनकि अगर कोई आदिमी उज्याला में छै, त उको चाल-चलन निको और धार्मिक हुछो और उमें भरोस करि जा सकछो।

¹⁰ यो सिखून की कोशिश करा, कि प्रभु स खुश करछो।

¹¹ जो लोग गन्दा काम अन्यारा में करनान, उनार दगाड़ भागीदार जन बना, लेकिन लोगून सिखा, कि यो काम गलत छै।

¹² किलैंकी उन अविश्वासी लोगून का गुप्त कामून की चर्चा करून ले शर्म की बात छै।

¹³ जब कोई चीज में उज्याल चमकछो त हर कोई देख सकछो कि उ चीज कसी छै, क्याखिनकि जब उज्यालो कोई चीज स प्रकट करछो तो उ चीज खुद उज्यालो बन जाछो।

¹⁴ येक कारण एक कहावत छै, जो यो बतूछी, “हे पड़ून वालों, जाग! और मुर्दान में भटे ज्यून हो जा; त मसीह अपूनो उज्यालो तुम में चमकालो।”

¹⁵ येक कारण ध्यान ले देखा, कि तुम कसीकैं जीन्दगी जी मरछा, मूर्खून का नियाती नै पर बुद्धिमानून नियाती जीन्दगी जीया।

¹⁶ अपून हरेक मौका को इस्तमाल बुद्धि ले भलाई करून खिन करा, क्याखिनकि दिन बुरा छन।

¹⁷ येक कारण मूर्ख जन बना, लेकिन यो जाणनान की कोशिश करभेरन बुद्धिमान बना कि प्रभु तुमूनथैं कि करून चाछो।

¹⁸ मदिरा का नशा में मतवाला होभेरन अपूनास नाश जन करा, क्याखिनकि येले लोग अपून आपे भ्यार हो जानान, पवित्र आत्मा स तुमून अपूनी सामर्थ ले भरून दी।

¹⁹ और जब तुम एक जाग जामा हुछा, त भजन और स्तुति और आत्मिक गीत गाया करा, और अपून-अपून मन में प्रभु का सामुनि गानै और स्तुति करनै रौ।

²⁰ जो कुछ हमार प्रभु यीशु मसीह ले करिना को छै उक कारण हमेशा हमार परमेश्वर पिता का हरेक बात खिन धन्यबाद करा।

²¹ हम मसीह में आदर का कारण एक-दुसरा का अधीन रौ।

घरवाली और घरवालो

²² हे घरवालीयो, अपून घरवालान का इसा अधीन रौ जसीकैं तुम प्रभु का अधीन रूछा।

²³ क्याखिनकि घरवाला त घरवाली को ख्वोरो छै जसीकैं कि मसीह विश्वासीन की मण्डली को ख्वोरो छै; और मसीह विश्वासीन की मण्डली को मुक्तिदाता छै, जो उको अपूनो शरीर छै।

²⁴ जसीकैं विश्वासी लोग मसीह का अधीन छन, उसीकैं घरवालीन ले हरेक बात में अपून-अपून घरवालान का अधीन रून।

²⁵ हे घरवालो, अपूनी-अपूनी घरवालीन थैं प्रेम राखा, जसो मसीह ले विश्वासीन की मण्डली थैं प्रेम करभेरन उनून खिन अपूनास बलिदान कर दीछ।

²⁶ ताकि उक बचन स विश्वासीन की मण्डली में प्रकट करभेरन उनार पापून भटे शुद्ध कर सको, ठीक उसीकैं जसीकैं लोग कोई चीज स धोभेरन साफ करनान।

²⁷ उ अपूनी विश्वासी मण्डली खिन मर ग्यो ताकि उ अपून सब लोगून सिद्ध बना सको और हम सबून अपनी हजूरी में ल्या सको, जैमें कोई दोष या पाप या कोई और बुरी बात नै हो; बल्कि, उ पवित्र और सिद्ध हो।

²⁸ इसीकैं घरवाला अपूनी-अपूनी घरवालीन अपून शरीर का नियाती प्रेम राखून, जो अपूनी घरवाली स प्रेम करछो, उ अपून आप स प्रेम करछो।

²⁹ क्याखिनकि कैले ले कभै अपून शरीर है बैर नै राखूनो, लेकिन उकी देखभाल करछो, जस तरीका ले मसीह विश्वासीन की मण्डली की देखभाल करछो।

³⁰ येक कारण कि हम सब मसीह शरीरा का अंगून का समान छा।

³¹ जसो पवित्रशास्त्र कुंछो, “आदिमी अपून ईजा-बबा स छोड़भेरन अपूनी घरवाली का दगाड़ मिलभेरन रौलो, और उन द्वीवै एक्कै शरीर होला।”

³² यो एक भौत गैर भेद छै, लेकिन मैं यो समझू छू कि यो मसीह और उकी विश्वासीन कि मण्डली का तरफ इशारा करछो।

³³ लेकिन यो तुमूनमें ले लागू हुछो कि, तुमून में भटे हरेक अपूनी घरवाली से अपून नियाती प्रेम करा, और घरवाली ले अपून घरवाला का आदर करा।