इफिसियून 3 - सोरियाली नय्या नियम

अन्यजातिन में पौलुस की सेवा

¹ येक कारण, मैं पौलुस तुमून खिन प्रार्थना करछूँ। मैं जेल में छूँ क्याखिनकि मैं तुम गैर-यहूदी लोगून सुसमाचार सुणभेरन यीशु मसीह खिन सेवा करछूँ।

² तुम लोगून ले जरूर सुण होलो, कि परमेश्वर ले अपून अनुग्रह का द्वारा तुमून सुसमाचार सुणूना की मैंस जिमेदारी दी रैछ।

³ जैस मैंले यो बारिमें पैलि भटे कुछ शब्द लिखीना का छ्या, कि परमेश्वर ले खुद ऊस गुप्त योजना स मैंस दिखाछ।

⁴ जसो तुम उ चिठ्ठी स पढ़ला, त तुमून यो ले पत्तो चलोलो कि मैं सच्ची में मसीह का गुप्त भेदून का बारिमें कतुक निकी कै समझछूँ।

⁵ यह गुप्त भेद पैलि पीढ़ीन का लोगून नै बताई ग्योछ, अब पवित्र आत्मा ले अपून पवित्र प्रेरितून और परमेश्वरा का संदेश दिनवाला लोगून में प्रगट करछ्य।

⁶ यो परमेश्वर की योजना छै कि यीशु मसीह का दगाड़ हमार रिश्ताका द्वारा यहूदीन का नियाती गैर-यहूदी लोग उई आशीषून पाला, और उन एक्कै शरीरो को हिस्सा छन, और उ वादा का हिस्सेदार छन, जो परमेश्वर ले यहूदी लोगून का दगाड़ करिना को छ्यो।

⁷ परमेश्वरेले मैंस अपून अनुग्रह और सामर्था ले यो सौभाग्य दीछ, कि मैं सुसमाचार सुणून खिन उको सेवक बनाछ।

⁸ मैं परमेश्वरा का सब लोगून में सबून है नानो छूँ। लेकिन परमेश्वरो को अनुग्रह मैंमें भ्योछ, और मैं गैर-यहूदी लोगून सुसमाचार सुणू, कि मसीह भटे हमून जो आशीष मिलछी, उ हमार समझ है भ्यार छै।

⁹ क्याखिनकि परमेश्वर ले यो सब चीजून संसारा बनून है गुप्त राखिना का छ्या, ताकि उनून अब मैं तुम सबून में प्रगट कर सकूँ।

¹⁰ इसीकैं, परमेश्वरो को मक्शद छ्यो कि अब विश्वासी की मण्डली का द्वारा, परमेश्वरो को ज्ञान उन प्रधानून में और अधिकारीन में जो आकाश में छन, उनूनमें प्रगट करि जौ।

¹¹ परमेश्वर ले अपून योजना का अनुसार इसो करछ्य, जैले उले हमार प्रभु यीशु मसीह यीशु का द्वारा पुरो करछ्य।

¹² मसीह का दगाड़ हमोरो रिश्ताका कारण और उमें हमोरो विश्वास का कारण ले, अब हम परमेश्वरे की हजूरी में निडर हो भेरन और हिम्मतले आ सकनू।

¹³ येक कारण मैं विनती करछूँ कि जो दुख तुमून खिन मैंस होर्यान, उक कारण निराश नै हुन चैछो, क्याखिनकि यो सब तुमार फैदा खिन छै।

मसीह प्रेम

¹⁴ येक कारण मैं पौलुस घुणा टेकभेरन तुमून खिन पिता परमेश्वर थैं प्रार्थना करछूँ।

¹⁵ वह एक छै जो विश्वासीन का पुर परिवार को पिता छै जो स्वर्ग में छै और धरती में छै।

¹⁶ मैं प्रार्थना करछूँ कि, उ अपूनी महिमा का उन खजाना भटे तुमून यो दान दे जैकी कोई सीमा नाहातिन। उकी आत्मा तुमून शक्ति दे, ताकि तुम भितर भटे मजबूत होज्या।

¹⁷ येक कारण विश्वास का द्वारा मसीह तुमार भितर रौ। मैं प्रार्थना करछूँ कि परमेश्वर और एक दुसरा खिन तुमोरो प्रेम तुमून मजबूत बनालो और तुमून खितीन भटे बचालो।

¹⁸ और परमेश्वरा का सब लोगून का दगाड़, तुम यो जाण पाला कि मसीह हमून कतुक प्रेम करछो। उ हमून भौत प्रेम करछो, जैकी कोई सीमा नाहातिनी।

¹⁹ मैं प्रार्थना करछूँ कि, तुम मसीह का उ प्रेम स जाण सका, जो आदिमी की समझ है भ्यार छै, जेले तुमेरि आदत परमेश्वरे की आदत की नियाती बन जौ।

²⁰ जतुक हम परमेश्वर थैं माँगनू और सोचनू, ये है ले ज्यादा कर सकछो, क्याखिनकि उकी सामर्थ हमून में काम करछी।

²¹ उकी महिमा विश्वासीन की मण्डली में और यीशु मसीह में पीढ़ी भटे पीढ़ी तक हमेशा-हमेशा हुनै रौ। आमीन।