इफिसियून 2 - सोरियाली नय्या नियम

मौत भटे जीवन का तरफ

¹ पैलि जब तुमूले परमेश्वरा का तरफ भटे नय्या जीन्दगी नी पाईना को छ्यो; त तुम अपून बुरा काम और पापून का कारण तुम मरिना का लोगून का नियाती छ्या।

² उ बखत तुम यो संसारा का लोगून की नियाती जीन्दगी जी छ्या, जो परमेश्वर स नी जाण छ्या, और तुमूले उ शैतानो कि हुकमून को पालन करछ्य जो आकाश में भूतून में राजा करूनवाला प्रधान छै। जो अब उन लोगून का मनून में काम करूनमर्योछ।

³ हम ले उनेरि नियाती जीन्दगी जी छ्या, और अपून पापी आदतून की इच्छान पुरो करछ्या, और जो ले हमरि बुरी इच्छा और बिचार हमून थैं करून चाँछ्या हम उक अनुसार जीन्दगी जी छ्या और दुसारा लोगून की नियाती आदतून ले बुरा छ्या, और परमेश्वरा को क्रोधा का बश में छ्या।

⁴ लेकिन परमेश्वर भौत दयालु छै; अपून उ महान प्रेमा का कारण जैले उले हमूनथैं प्रेम करछ्य,

⁵ जब हम पापून का कारण मरिनाका लोगून का नियाती छ्या, त उले मसीह का दगाड़ हमार रिशता का कारण हमून आत्मिक जीन्दगी पान योग्य बनाछ। परमेश्वरा का अनुग्रह ले तुमोरो उद्धार भ्योछ।

⁶ क्याखिनकि उले हमून मसीह यीशु का दगाड़ हमरि एकता कारण, उले हमून मरिनान में भटे ज्यूनो करछ्य, और हमून स्वर्गीय जागान में उक दगाड़ बैठाछ।

⁷ परमेश्वर ले इसो येक कारण करछ्य ताकि उनवाला दिनून में उ संसारा का लोगून दिखा सको कि उको अनुग्रह कतुक महान छै। जो कुछ ले उले हमून खिन करछ्य हमून यो अनुग्रह दिखाई ग्योछ जो मसीह यीशु का दगाड़ एक छै।

⁸ क्याखिनकि जब तुमूनले विश्वास करछ्य त परमेश्वरले अपून अनुग्रह ले तुमोरो उद्धार करछ्य, और यो तुमेरि तरफ भटे नाहातिन, बल्कि परमेश्वरो को दान छै।

⁹ यो तुमार द्वारा करिना का कोई ले भल कामून का कारण नाहातिन। येक कारण तुमार पास घमण्ड करना को कैले कारण नाहातिन।

¹⁰ क्याखिनकि परमेश्वर ले हमून बनाछ, और यीशु मसीह में हमून भल कामून खिन बनाछ, जिनून परमेश्वर ले पैलि भटे हमार करून खिन तैयार कर रैछ।

मसीह में एक

¹¹ येक कारण याद करा कि, तुम जन्म भटे गैर-यहूदी छा, यहूदी लोगून ले तुमार यो कैभेरन मजाक उड़ाछ कि तुम खतना नै करूना लेकिन उनार यो रीति केवल उनार शरीरून में कर जाँछी।

¹² तुम लोग उ बखत मसीह स नी जाण छ्या, और तुम इस्राएल दल है भ्यार छ्या। तुम उन भलि चीजून का ले भागीदार नी छ्या जिनोरो वादा परमेश्वर ले यहूदीनथैं करिना को छ्यो, और बिना आश का और बिना परमेश्वरा का यो संसार में रूछया।

¹³ एक बखत छ्यो जब तुम परमेश्वर से भौत दूर छ्या, पर अब परमेश्वर तुमून यीशु मसीह का खून का द्वारा अपून पास लीभेरन आछ।

¹⁴ मसीह खुद हमार बीच शान्ति ल्याछ। बितीना का बखत में, यो इसो छ्यो जसीकैं एक दीवार ले यहूदी और गैर-यहूदी लोगून अलग कर दीछ। उन एक-दुसरा भटे नफरत करछ्या। लेकिन अब मसीह ले अलग करून वाली उ दीवार स उधारी है छै, और यहूदीन और गैर-यहूदीन एक कर दी हैछ।

¹⁵ मसीह ले अपूनी मौत का द्वारा मूसा नियम-कानून की सब विधिन खतम कर दीछ। ताकि उ यहूदी और गैर-यहूदी लोगून का बीच शान्ति लिया सको और इसीकैं तरह एक नय्या समूह बना सको।

¹⁶ सूली में अपूनी मौत का द्वारा मसीह ले द्वी समूह एक कर दीछ और उनोरो मेल-मिलाप परमेश्वर थैं करवा दीछ, इसीकैं यहूदी और गैर-यहूदी लोगून का बीच दुश्मनी स खतम कर दीछ।

¹⁷ और मसीह ले आभेरन तुम गैर-यहूदी लोगून, जो परमेश्वर भटे दूर छ्या, और यहूदी लोगून जो उक नजदीक छ्या, द्वीयान मेल-मिलाप को सुसमाचार सुणाछ।

¹⁸ मसीह ले हमून खिन जो कर रैछ उक कारण अब हम सब उ एक पवित्र आत्मा का द्वारा पिता परमेश्वरा का पास आ सकनू।

¹⁹ येक कारण अब तुम गैर-यहूदी लोग परदेशी और मुसाफिर नाहातिन, लेकिन परमेश्वरा का लोगून का दगाड़ रूनवाला और तुम उक परिवार का लोग छा।

²⁰ एक दगाड़, हम उको घर छा, जो कि प्रेरितों और परमेश्वरो को संदेश दिनवाला लोगून की नींव में बनिना को छै। और येको कुना को ढूंगो खुद यीशु मसीह छै।

²¹ मसीह उ छै जो पुर घर स एक दगाड़ जोड़ राखना को कारण छै। उ परमेश्वर खिन एक पवित्र मन्दिर बनून खिन अपून सब लोगून ढूंगान की नियाती एक दगाड़ जोड़ भेरन राखछो।

²² हे गैर-यहूदी विश्वासीयों, किलैंकी तुम मसीह में एक छा, येक कारण तुम ले परमेश्वरा का दुसारा लोगून का दगाड़ एक हो भेरन रौ। ताकि तुम एक इसो घर बन जा, जाँ परमेश्वरो को आत्मा रूछो।