इफिसियून 1 - सोरियाली नय्या नियम

¹ मैं पौलुस, परमेश्वरे की इच्छाक अनुसार यीशु मसीहक प्रेरित छूँ। मैं यो चिठ्ठी इफिसुस शैहर में यीशु में विश्वास करूनवाला परमेश्वरा का लोगून खिन लिखूनमर्यू।

² मैं तुमून खिन प्रार्थना करछूँ कि, हमार पिता परमेश्वर और प्रभु यीशु मसीहक तरफ भटे तुमून अनुग्रह और शान्ति मिलनै रौ।

मसीह में आत्मिक आशीष

³ हमार परमेश्वर और प्रभु यीशु मसीहक पिता की महिमा हो, किलैंकी जब हम मसीह दगाड़ एकता में छा, त परमेश्वर ले हमून स्वर्ग भटे हरेक प्रकारे की आत्मिक आशीष दीयान।

⁴ खाशकर मसीहाक दगाड़ हमरि एकता का कारण परमेश्वर ले हमून यो संसारे स बनून है पैलिक चुन लीछ। ताकि हम उक सामुनि पवित्र और निर्दोष हो।

⁵ किलैंकी परमेश्वरे ले हमून थैं प्रेम करछ्य, और उले भौत पैलि फैसला लीईना को छ्यो कि उन यीशु मसीहाक द्वारा हमून अपूनी सन्तान हुन खिन गोद ल्याला, परमेश्वर ले इसो अपूनी इच्छा और खुशी का अनुसार कर रैछ।

⁶ येक कारण हम उक अद्धभुत अनुग्रह खिन उकी महिमा करा, जो उले हमून मुफ्त में दी दीछ। किलैंकी हम उक प्रिय च्यालाका दगाड़ जुड़िनाका छै।

⁷ यीशु ले अपूनो खून बगा भेरन बलिदान दीछ, ताकि हम छुटकार पा सकां, जैको मतलब यो छै, की अब हमार पाप माफ हो ग्यान। परमेश्वरा का अनुग्रह भौते महान छै जो उले हमून में दिखाछ।

⁸ जो दया स परमेश्वरे ले पुरो ज्ञान और समझा का दगाड़ हमून में दिखाछ।

⁹ परमेश्वरे ले उई करछ्य, जो उले गुप्त राखिना को छ्यो, और हमून उ गुप्त योजना का बारिमें बातछ जैस उले पैलि मसीहक द्वारा पुरो करना को फैसला लीछ।

¹⁰ जब यो योजना स पुर करना को बखत आलो, त परमेश्वर स्वर्ग और धरतीका सबै चीज मसीहाक अधीन कर द्योलो, ताकि मसीहा उनूनमें राजा करोलो।

¹¹ येक अलावा, किलैंकी हम मसीहाक दगाड़ एकता में छा, हमून परमेश्वर भटे बिरासत मिल रैछ, किलैंकी उले हमून पैलिक भटे चुनिनाको छ्यो, और उकी योजना का अनुसार सब चीज काम करनान।

¹² हम, यहूदी पैलि का लोग छा जिनूनले मसीहा में आश राखछै, और हमून येक कारण चुनी ग्योछ ताकि हम परमेश्वरे की महिमा और तारीफ करा।

¹³ तुमूनले, सच्चो सुसमाचार सुणछ, जो यो बारिमें बतूछो कि परमेश्वर ले कसीकैं तुमोरो उद्धार करछ्य जब तुमूले मसीह में विश्वास करछ्य, त परमेश्वर ले अपूनो करिना को वादा अनुसार तुमून पवित्र आत्मा दीछ, यो दिखून खिन कि तुम परमेश्वरा का छा।

¹⁴ पवित्र आत्मा एक बयाना का नियाती छै जो हमून पुरो भरोसा दिलूछो, कि परमेश्वर हमून उ बिरासत द्योलो जैको उले वादा कर रैछ और यो ले कि उले हमून अपून लोग हुन खिन खरीद ली हैछ ताकि हम उकी महिमा और तारीफ करा।

पौलुस की प्रार्थना

¹⁵ येक कारण, जब भटे मैंले प्रभु यीशु में तुमार विश्वास और परमेश्वरा का लोगून खिन तुमार प्रेम बारिमें सुणभेरन,

¹⁶ मैं हमेशा तुमून खिन परमेश्वरो को धन्यवाद करछूँ और अपूनी प्रार्थनान में तुमून याद करछूँ।

¹⁷ मैं प्रार्थना करछूँ कि परमेश्वर हमार प्रभु यीशु मसीह का जो महिमामय पिता, तुमून पवित्र आत्मा दे, जो तुमून बुद्धिमान बना द्योलो और परमेश्वरे स तुमून में प्रगट करोलो, ताकि तुम ऊस निकीकैं जाण सका।

¹⁸ मैं यो ले प्रार्थना करछूँ कि उ सच्चाई समझून में तुमेरि मद्दत करोलो, और उ आशा जो तुमून दी गैछ, जब परमेश्वर ले तुमून चुन छ्ये। ताकि तुम जाण सका कि उ आशीष कतुक महान और महिमामय छन जिनोरो वादा परमेश्वर ले अपूनो लोगून थैं करिना को छै।

^19-20 मैं चाछूँ कि तुम उ महान सामर्थ का बारिमें जाणा जो परमेश्वरा का पास हमून खिन छै, जो मसीह में विश्वास करनान, यो उई महान सामर्थ छै जैका इस्तमाल परमेश्वर ले तब करछ्य जब उले मसीह स दुबारा ज्यून करछ्य, और जब उले मसीह स स्वर्ग में अपून दैंन तरफ सम्मान का जाग में बैठाछ।

²¹ वाँ परमेश्वर ले ऊस पुरी हकुमत, अधिकार, और प्रभुता और हरेक का मलिमें राजा करूना को अधिकार दी रैछ, और उकी पदवी हरेक अधिकारी की पदवी है मलि छै जो नै केवल यो लोक में, बल्कि उनवाला लोक में ले रौली,

²² और परमेश्वर ले सब चीजून मसीह का अधिकार में कर दीयान; और ऊस विश्वास करून वालान की भलाई खिन हरेक चीजून में मुखिया ठैहरा दीछ।

²³ त येक कारण मसीह ख्वारा का नियाती छै और विश्वासीन की मण्डली उको शरीर की नियाती छै। विश्वासीन की मण्डली मसीह का द्वारा भरिना छै, जो सब जगा हरेक चीजून अपूनी मजूदगी ले भर दीछो।