कुलुस्सियून 4 - सोरियाली नय्या नियम

¹ हे मालिकों, स्वर्ग में तुमोरो ले एक मालिक छै, यो समझभेरन, अपून-अपून दासून का दगाड़ न्याय और एक जसो ब्यवहार करा।

मसीह लोगून खिन सलाह

² तुम सतर्क हो भेरन प्रार्थना में लगातार लाग रौ, और हमेशा परमेश्वरो को धन्यवाद करनै रौ।

³ और येक दगाड़ हमून खिन ले प्रार्थना करनै रया, कि परमेश्वर हमून खिन वचन सुणना को इसो द्वार खोलि द्यो, कि हम मसीह का उ भेद बता सकाँ जैका कारण में जेल में छूँ,

⁴ येक कारण तुम प्रार्थना करा, कि मसीह का उ भेद स साफ तरीका ले और खुला तौर में समझ सकूँ, जैस मैंस करून ठीक छै।

⁵ अपून हर मौकास जो तुमून मिलछो कीमती जाणिभेरन संसार का लोगून का दगाड़ बुद्धिमानी ले ब्यवहार करा।

⁶ तुमार बोल हमेशा निका और मीठा हुन चैछो, ताकि तुमून अपून विश्वासा का बारिमें हर आदिमी स सही तरीका ले जबाब दीन आ जौ।

आखिरी अभिवादन

⁷ प्रिय विश्वासी भाई और विश्वासयोग्य सेवक, तुखिकुस, जो प्रभु में म्यारा दगाड़ काम करून वालो छै, मेरि सब बात तुमून बता द्योलो।

⁸ ऊस मैंले येक कारण तुमार पास भेज रैछै, कि तुमून उथैं भटे जाण पाला कि हमार दगाड़ कि हुन मर्योछ, और उ तुमून विश्वास में मजबूत करौ।

⁹ और उक दगाड़ मैंले उनेसिमुस ले भेज रैछै; जो विश्वासयोग्य और प्रिय भाई तुमार याई भटे छै। यो तुमून याँ कि सारी बात बता द्याला।

¹⁰ अरिस्तर्खुस, जो म्यारा दगाड़ जेल में बन्द छै, और यहूना मरकुस जो बरनबास को भांजो मरकुस तुम लोगून नमस्कार कुंछो। (मैं जाणछूँ कि तुमून पैलि मरकुस का बारिमें बताईना को छ्यो, त उक दगाड़ बड़िया ब्यवहार कर्या।)

¹¹ यीशु, जैस लोग यूस्तुस ले कुंनान, तुमूनथैं नमस्कार कुंछो। यहूदी विश्वासी लोगून में भटे बश योई तीन लोग परमेश्वरा का राज्य खिन म्यारा दगाड़िया छन जो हिम्मत दीनान।

¹² इपफ्रास, जो तुमार या को छै, और यीशु मसीह को दास छै, तुमून नमस्कार करछो। और हमेशा तुमून खिन लगातार प्रार्थना करछो, जेले तुम लोग सब बातुन में सिद्ध होभेरन पुर विश्वास का दगाड़ परमेश्वर की इच्छा में मजबूत रौ।

¹³ मैं उको गवाह छूँ, कि उ तुमून खिन और लौदीकिया और हियरापुलिस शैहरा का लोगून खिन लगातार प्रार्थना करछूँ।

¹⁴ और प्रिय डाक्टर लूका और देमास ले तुमून नमस्कार कुंछो।

¹⁵ लौदीकिया नगरा का विश्वासी भाईन-बैनिन और नुमफास और उनार घरा का विश्वासी भाई-बैनिन नमस्कार कया।

¹⁶ और जब यो चिठ्ठी तुमार या पढ़ी जालि, त इसो कर्या कि उक बाद लौदीकिया नगरा का विश्वासीन की मण्डली में ले पढ़ी जौ, और जो चट्ठी लौदीकिया नगर भटे आलि ऊस तुम ले पढ़िया।

¹⁷ फिर अरखिप्पुस थैं कया “कि जो सेवा तैंस प्रभु का तरफ भटे मिल रैछ, ऊस ईमानदारी ले पुरी करे।”

¹⁸ मैं पौलुस अपून हात ले चिठ्ठी में तुमून नमस्कार लिखछूँ। याद राँख्या मैं जेल में छूँ, और मैं खिन प्रार्थना कर्या। मैं प्रार्थना करछूँ कि परमेश्वरो को अनुग्रह तुमून में हुनै रौ। आमीन।