कुलुस्सियून 2 - सोरियाली नय्या नियम

¹ मै चाछूँ कि तुम जाणि ली कि तुमार और उनून खिन जो लौदीकिया नगर में छन, और उन सबून खिन जिनूनले मैंस नै देख रै, मैं कतुक मेहनत करछूँ,

² मैं इसो येक कारण करछूँ, ताकि तुमोरो विश्वास मजबूत हो जौ, और मैं चाछूँ कि उनून पुरो भरोसा हो क्याखिनकि उनून परमेश्वरो को गुप्त रहस्य की पुरी समझ छै, जो खुद मसीह छै।

³ योई उई छै जो बुद्धि और ज्ञान को पछयाण करूछो जो कि उ खजाना कि नियाती छै जो लुकीना को छ्यो।

⁴ यो मैं येक कारण कुछूँ, कि कोई आदिमी तुमून झूठ्ठी बातुन में विश्वास करून खिन राजी करभेरन ध्वाका जन दी

⁵ अगर मैं तुमून हैं दूर छूँ, तो ले मैं तुमार बारिमें सोच छूँ, और खुश हुछूँ, कि तुम उसीकैं जीन मरेछा जसो तुमून जीनो चैछो, और तुमोरो विश्वास मसीह में मजबूत छै।

मसीह में जीवन की भरपूरी

⁶ येक कारण, जैस तुम ले मसीह यीशु स प्रभु करभेरन ग्रहण कर हालछ्य, उसीकैं उमें बनिना का रौ।

⁷ जसकैं एक रूख जमीन में जड़ पकड़छो और एक घर नींव में मजबूत रूछो उसीकैं तुम अपून विश्वास में मजबूत हुनै जा, और लगातार उमें बढ़नै जा, जसो तुमून सिखा रैछ और ज्याद है ज्यादा धन्यवाद करनै रौ।

⁸ ध्यान राँखा कि कोई तुम लोगून उन बेकार शिक्षान ले मूर्ख नै बनौ। यो बेकार शिक्षा सुणून में त ज्ञान की लागनान, क्याखिनकि यो शिक्षा संसारा लोगून का तरफ भटे छै, पर मसीह का तरफ भटे नाहातिन।

⁹ येक कारण इन लोगून भटे ध्वाका जन खा, क्याखिनकि जब मसीह आदिमी बनछ्य तब ले उ पूर्ण रूप ले परमेश्वर छ्यो।

¹⁰ मसीह हरेक शक्ति और अधिकार में हकुमत राँखछो। येक कारण अगर तुम मसीह भटे जुड़ीना का छा, त तुम पुर मसीह में छा।

¹¹ जब तुमूले मसीह में विश्वास करछ्य, त तुमोरो खतना लोगून का द्वारा नै करि ग्योछ, लेकिन उ खतना होईना को छै जो मसीह का द्वारा करि ग्योछ, जो कि तुमार पापी स्वभाव स काट भेरन दूर करछो।

¹² जब तुमूले बपतिस्मा लीछ, त तुमोरो पापी स्वभाव मसीह का नियाती दफना दीई ग्योछ, और जैस मसीह मरिन में भटे ज्यून भ्योछ उसीकैं तुम ले एक नय्या स्वभाव का दगाड़ ज्यून भैछा। यो येक कारण भ्योछ क्याखिनकि तुमूले विश्वास करछ्य कि परमेश्वर ले अपून सामर्थ का द्वारा मसीह स मरिनान में भटे कर दीछ।

¹³ और उले तुमून ले, जो अपून अपराधून, और खतना का नियाती तुमार बुरा स्वभाव काटि नै ग्योछ, परमेश्वर ले हमार सब पापून माफ करभेरन मसीह का दगाड़ ज्यून करछ्य।

¹⁴ यो इसो छ्यो जसो परमेश्वर ले हमार पापून को चिट्ठा मिटा दीछ, जेमें हमार खिलाफ अपराध लिखी ग्यान। जब मसीह सूली पर चढ़ाई ग्योछ तब उले ऊस दस्तावेज स पुरी तरीका ले हटा दीछ।

¹⁵ और परमेश्वर ले मसीह का सूली में मरना का द्वारा संसार का अधिकारीन की शक्ति स हराभेरन उनोरो सबून का सामुनि तमाशा बना दीछ, और उमें जीत हासिल करभेरन भौत खुशी मनाछ।

¹⁶ ध्यान राँख्या कि कोई तुमोरो खान-पिन या पर्व या नय्या चाँद, या सबता का दिनून का बारिमें तुम कोई फैसला जन करा।

¹⁷ क्याखिनकि उन सब नियम-कानून सिर्फ एक छाया की नियाती छै। लेकिन हकीक्त में सब कुछ मसीह छै

¹⁸ कोई ले आदिमी, जो झूठ्ठी दया और स्वर्गदूतून की अराधना में लीन छन, उ तुमून तुमार ईनाम भटे दूर नी कर पाला। इसो आदिमी देखीना का बातुन में लाग रूनान और उको पापी स्वभाव ऊस बिना कोई कारण का घमंडी बना दीछो।

¹⁹ उन यीशु मसीह का दगाड़ बनभेरन नै रै सकना, जो पुर शरीरो को खोरो छै। जसीकैं शरीर सारा जोड़ और नस शरीर का दगाड़ बनभेरन रूनान, उसीकैं तुम ले मसीह का दगाड़ मिल-जुल भेरन रया, क्याखिनकि शरीरो को अंग परमेश्वरा का तरफ भटे बढ़नै जानान।

मसीह का दगाड़ा मरून और जीनो

²⁰ जब भटे तुमोरो पापी स्वभाव मसीह का दगाड़ मरग्योछ, त यो संसार का शिक्षान मानना की जरूरत नाहातिन। येक कारण तुम आजि ले इन शिक्षान पालन करछा, जेले लागछो कि तुम आजि ले यो संसारा का बश में छा?

²¹ उन इसो सिखूना कि “इसा तरीका की चीजून में हात जन लगाया, और नै इसा खाना स खाया, या तक इसी चीजून छूया ले जन।”

²² क्याखिनकि यो सब नियम-कानून बेकार और के कामा का नाहातिन, क्याखिनकि यो आदिमीन का हुकुम और शिक्षा का अनुसार छन।

²³ इसो लागछो यो नियम-कानून त सच्चाई बाट में ली जानवाला लागनान मतलब अपून आप स जबरदस्ती परमेश्वरो को भक्त बनूना का द्वारा, झूठ्ठी दया का द्वारा और अपून शरीर का दगाड़ बुरा ब्यवहार का द्वारा। लेकिन जब लोग इन नियम-कानून को पालन करनान, तब ले उ अपूनो पापी स्वभाव स नै रोक सकूँना।