कुलुस्सियून 1 - सोरियाली नय्या नियम

स्वागत

¹ मैं पौलुस, जो परमेश्वर की इच्छा का द्वारा यीशु मसीह को प्रेरित छूँ, और विश्वासी भाई तीमुथियुस का तरफ भटे,

² मसीह में उन पवित्र और विश्वासयोग्य विश्वासी भाईन का नाम चिठ्ठी लिखूनमरयूँ जो कुलुस्से नगर में रूनान। मैं प्रार्थना करछूँ कि हमार पिता परमेश्वरा का तरफ भटे तुमून अनुग्रह और शान्ति मिलनै रौ।

धन्यवादै की प्रार्थना

³ जब हम तुमून खिन रोज प्रार्थना करनू त हम अपून प्रभु यीशु मसीह और परमेश्वरो को धन्यवाद करनू।

⁴ क्याखिनकि हमून ले तुमार बारिमें सुण रैछ, कि यीशु मसीह में तुमोरो विश्वास छै, और तुम सब परमेश्वरा का लोगून का दगाड़ प्रेम राखछा।

⁵ तुम यो येक कारण करछा, क्याखिनकि विश्वास और प्रेम की बुनियाद में छै, जो तुमून खिन स्वर्ग में राखिना की छै, जैका बारिमें तुम पैलि भटे सुण चुक गैछा,

⁶ यो सुसमाचार पुरी दुनिया में फैलून मर्योछ और कई लोग विश्वासी बनून मर्यान। हर जाग जीन्दगी बदलून मरैछ, ठीक उसीकैं जसकैं कि तुमूले पैलि बार सुसमाचार सुणछ्य और अनुग्रह स समझछ्य कि परमेश्वर उन लोगून का पापून माफ करछो जो मसीह में भरोसा राँखनान।

⁷ उकी शिक्षा तुमूले हमार प्रिय दगड़िया इपफ्रास भटे सिखछै, जो हमून खिन मसीह को सच्चो सेवक छै।

⁸ उले हमून दुसारा लोगून का प्रति तुमार उ प्रेम का बारिमें जो पवित्र आत्मा ले तुमून दीछ।

⁹ येक कारण जे दिन भटे हमून ले सुण रैछ, त हम उ दिन भटे हमेशा तुमून खिन प्रार्थना और बिनती करनै रूनू, कि परमेश्वरो को आत्मा तुमून ज्ञान और समझ दे ताकि तुम परमेश्वर की इच्छा पुरी तरीका ले समझ सका।

¹⁰ हम यो प्रार्थना करनू ताकि तुम इसीकैं जीवन जीया जसो प्रभु का लोगून जीन चैछो, और तुम हर तरीका ले प्रभु स खुश करला। और हर तरीका भल काम करनै रौला, और परमेश्वरा का ज्ञान में बढ़नै जाला।

¹¹ और हम यो ले प्रार्थना करनू कि परमेश्वर अपूनी महिमा की शक्ति का द्वारा तुमून मजबूत करौ, ताकि तुम हौंसला और खुशी ले अपून दुखून सहन कर सका।

¹² और तुम लोग पिता परमेश्वरो को धन्यवाद करनै रौ, जेले हमून उ मिसरास में शामिल हुन लायक बनाछ, जैस उले स्वर्ग राज्य में परमेश्वरा का लोग खिन तैय्यार कर रैछ।

¹³ क्याखिनकि परमेश्वर के हमून शैतान की शक्ति है छुड़ाभेरन अपून प्रिय च्याला का राज्य में ल्याछ।

मसीह की महानता और उका काम

¹⁴ अपूनो च्याला का बलिदान का द्वारा परमेश्वर ले हमून शैतान की शक्ति भटे आजाद करछ्य और हमार पापून माफ करछ्य।

¹⁵ कोई ले परमेश्वर स नै देख सकूनो, लेकिन जब उको च्योलो एक मनुष्य शरीर में आछ, त उले परमेश्वर स लोगून का सामुनि प्रगट कर दीछ, यो दुनिया का बनून है पैलि उ छ्यो और परमेश्वरे ले जो कुछ ले बनाछ, उमें उको सर्वोच्च छै।

¹⁶ क्याखिनकि यो उई मसीह छै, जेले पुर संसारा का चीजून बुन खिन परमेश्वरा का दगाड़ काम करछ्य, चाहे उ स्वर्ग की हो या धरती की, देखीना का या अनदेखीना का, क्या सिंहासन, क्या प्रभुता, क्या प्रधानता, क्या अधिकार, और सब चीज उक द्वारा उ खिन बनाई ग्यान।

¹⁷ और मसीह सब चीजून का बनून है पैलि छ्यो, और सब चीज उकी इच्छा का अनुसार काम करनान।

¹⁸ मसीह विश्वासी की मण्डली खोरो छै और उ उको आंग छै। मसीह विश्वासी की अगुवाई उसीकैं करछो, जैसे एक आदिमी को खोरो उक आंग स काबू करछो। उ पैलि छै, और मरिनान में भटे ज्यूनो हुन वालो पैल उई छै, कि सब बातुन में उको अधिकार हो।

¹⁹ क्याखिनकि पिता परमेश्वर की खुशी येमें छै कि परमेश्वरो को पुर स्वभाव मसीह में हो।

²⁰ मसीह ले सूली में खून बगाछ और अपूनो प्राण दीयान, उक द्वारा परमेश्वर ले अपून और सब चीजून का बीच में मेल-मिलाप की शुरूवाद करछ्य, कि मसीह का द्वारा सब चीजून को चाहे धरती में हो या चाहे स्वर्ग में हो अपून दगाड़ मेल कर लीछ।

²¹ ये है पैलि तुम लोग परमेश्वर भटे दूर छ्या। तुम परमेश्वरा का दुश्मन छ्या क्याखिनकि तुमारा बिचार और तुमारा काम बुरा छ्या।

²² लेकिन अब पिता परमेश्वर ले अपून च्याला स आदिमी बनाभेरन और ऊस सूली में मरना का द्वारा तुमार दगाड़ मेल कर लीछ, ताकि तुमून अपून सामुनि पवित्र और निष्कलंक, और निर्दोष बनाभेरन पेश करौ।

²³ अगर तुम मसीह में विश्वास करछा, त तुमोरो विश्वास उमें मजबूत रून चैछो, ठीक उ घरा का नियाती जो मजबूत बुनियाद में बनिना को छै। और हमून उ सुसमाचार में विश्वास करभेरन जो उमीद हमून मिलछी उ जन छोड़ा। जैको प्रचार पुर संसार का लोगून में करि ग्योछ, और सुसमाचार को प्रचार करून खिन, मैं पौलुस सेवक बन्यूँ।

मण्डली को सेवक पौलुस

²⁴ अब मैं उन दुखून का कारण जो तुमार खिन सहन करूमरयूँ, आनन्द मानछूँ। मैं उनार शरीर, मतलब विश्वासीन की मण्डली खिन अपून शरीर में दुखून सहन करछूँ जसो मसीह ले सहन करछ्य।

²⁵ इन विश्वासीन की मण्डली खिन मैं तुमून खिन परमेश्वरा का द्वारा सौपी गै सेवा खिन सेवक चुनी ग्यू, कि परमेश्वरा का बचनो को पुरी तरीका ले प्रचार कर सकूँ।

²⁶ मतलब उ गुप्त बाते स जो सदियून भटे और पीढ़ीन भटे गुप्त रैछ, लेकिन अब परमेश्वरा का लोगून में प्रगट भ्योछ।

²⁷ परमेश्वर ले यो फैसला लीछ कि उक लोग कीमती और महिमा वाली गुप्त रहस्य स जाण सकूँन, जो सब लोगून खिन उक पास छै। यह गुप्त रहस्य मसीह खुद छै जो तुमून में रूछो, केवल उई महिमा खिन हमरि एकमात्र उमीद छै।

²⁸ हम मसीह को प्रचार करभेरन हरेक आदिमी स परमेश्वरा का उ ज्ञान का द्वारा चेतावनी और शिक्षा दीभेरन समझुनू, ताकि हम यो देख ल्या कि हरेक विश्वासी परमेश्वर के सामुनि ठाड़ हुन खिन मसीह में मजबूत हो ज्यून।

²⁹ येक कारण मैं उकी उ सामर्थ का अनुसार मन लगाभेरन जो मैंस मसीह का द्वारा मिलछी, और म्यारा भितर काम करछी।