प्रेरितून का काम 3 - सोरियाली नय्या नियम

लूला भिखारी को चंगो हुनो

¹ एक दिन पतरस और यहूना दिनाक तीन बजे प्रार्थना करून खिन मन्दिर में जानमरेछ्या।

² तब कुछ लोग एक आदिमी स जो जन्म भटेई लुलो छ्यो, ऊस लीभेरन उनमरेछ्या जैस उन हर रोज मन्दिर का द्वार का पास बैठा दीछ्या जैको नाम सुन्दर द्वार छ्यो, ताकि उ वाँ उन-जानवालान थैं भीख माँगौ।

³ जब उले पतरस और यहूनास परमेश्वराका भवन में जान देखछ्य, त उनूनथैं भीख माँगून लागछ्य।

⁴ पतरसले और यहूना ले ऊस ध्यान ले देखछ्य। और पतरसले उथैं क्योछ, “हमार तरफ देख।”

⁵ उ उनूनथैं के पाना की आश ले उनार तरफ देखून लागछ्य।

⁶ तब पतरसले क्योछ, “म्यारा पास सुन-चाँदी नाहतिन, पर जो म्यारा पास छै, उ मैं तैंस दीछूँ। यीशु मसीह नासरी का नामले उठ और हिटून लाग।”

⁷ तब पतरसले उक दैन हात पकड़ भेरन ऊस उठाछ। और एकदम उक खुटान में हिटना कि ताकत आगै।

⁸ और उ उछल भेरन ठाड़ हो ग्यो, और परमेश्वरेकि महिमा करनै-करनै पतरस और यहूना का दगाड़ मन्दिराक खाल में ग्योछ।

⁹ सब लोग ऊस चलून-फिरून और परमेश्वरे की महिमा करून देखिभेरन,

¹⁰ पछ्याण ग्या, कि यो मन्दिरा का भ्यार सुन्दर फाटक में बैठभेरन भीख मांगन्या वालो भिखारी छै; और यो घटनाले उन सब भौत दंग और हैरान भ्यान।

परमेश्वरा का भवन में पतरसोको उपदेश

¹¹ जब उ पतरस और यहूनास पकड़ीनाको छ्यो, सब लोग भौत ताजुब करभेरन उ बरानडा तरफ दौड़यान जैस राजा सुलैमानो को बरानडा कुंनान।

¹² यो देखिभेरन पतरसले लोगूनथैं क्योछ, “हे इस्राएल देशाक रूनवालो, तुम येस इदुक हैरानी ले किलैं चाँनमरेछ्या, और तुम हमरि तरफ इसीकैं किलैं घुरूभेरन देखून मरैछा, जसीकैं कि हमूले येस अपूनी ताकतले या भक्तिले ठीक कर रैछ।”

¹³ हमोरो परमेश्वर जो कि अब्राहम और इसहाक और याकूबो को परमेश्वर छै, हमार पुरखान का परमेश्वर ले अपून सेवक यीशु मसीह की महिमा करछ्य, लेकिन तुमून ले ऊस मरवा डालून खिन रोमी अधिकारीन का हवाला कर दीछ, और जब पिलातुस ले ऊस छोड़ना को विचार करछ्य, तब तुमूले उक सामुनि यीशु को बिरोध करछ्य।

¹⁴ तुमून ले मसीह को इनकार करछ्य, जो पवित्र और धर्मी छ्यो, और तुमूनले चाछ कि उक बदला में तुमून खिन एक हत्यारा स छोड़ दी जौ।

¹⁵ और तुमूनले जो लोगून अनन्त जीवन दीछो ऊस मरवा दीछ, जैस परमेश्वरले मरिनान में भटे ज्यून करछ्य, जैक हम सब गवाह छै।

¹⁶ यीशुक नाम में विश्वासा का कारण यो आदिमी स जैस तुम जाणछा और यो बखत देखून मरैछा, जैस ताकत दी गैछ। यो आदिमी यीशुक नाम में और उक विश्वासा का द्वारा बिल्कुल ठीक हो ग्योछ जसो कि तुम खुद देख सकछा।

¹⁷ “हे भाईयो, मैं जाणछूँ कि तुम और तुमार अगुवान ले यीशु स मार दीछ, तब तुम उक बारिमें अनजान छ्या।

¹⁸ लेकिन जिन बातुन परमेश्वरे ले अपून सब संदेश दीन वालान का द्वारा पैलि भटे बताईना को छ्यो, कि उको मसीह दुख उठालो और मारी जालो, तुमारा द्वारा परमेश्वर ले इन बातुन पुर करभेरन दिखाछ।

¹⁹ येक कारण पश्चताप करा और परमेश्वरा का तरफ लौट आ, जेलै तुमार पाप माफ करि जून, तब परमेश्वरा का तरफ भटे शान्ति को दिन आला।

²⁰ और परमेश्वर यीशुस भेजोलो, जो मसीह छै, जैस उले तुमून खिन पैलि भटे चुनिना को छै।

²¹ यीशु को स्वर्ग में उ बखत तक रूनो जरूरी छै, जब तक परमेश्वर उन सब चीजून नय्या नै बना द्यो जो उले बनाईना का छन। भौत बखत पैलि परमेश्वरेले लोगून यो बतून खिन पवित्र परमेश्वरो को संदेश दिनवालान का द्वारा इसो करना को वादा करछ्य।

²² जस कि मूसाले क्योछ, ‘प्रभु परमेश्वर तुमार भाईन में भटे म्येरो जसो एक परमेश्वरो को संदेश दिनवाला स भेजोलो, और जो कुछ ले उ तुमूनथैं कौल, तुम उकी सुणिया।

²³ पर हरेक आदिमी स जो उ परमेश्वरो को संदेश दिनवालान की नै सुणनो, उ लोगून में भटे नाश करि जालो।’

²⁴ और शमूएल भटे लीभेरन उक बाद जदुक लै परमेश्वरो को संदेश दिनवालान ले इन दिनून का बारिमें प्रचार करछ्य।

²⁵ तुम सब परमेश्वरो को संदेश दिनवालान की संतान और वाचा का भागी छा, जो वादा परमेश्वरे ले तुमार पुरखान का दगाड़ कर राखछ्यो, जब परमेश्वरले अब्राहम थैं क्योछ, कि ‘त्यारा वंशाक जरियाले संसारा का सब लोग आशीष पाला।’

²⁶ परमेश्वरे ले अपून सेवक चुन‍छ्य और सबून है पैलि तुमार पास भेजछ्य, कि हमून में भटे हरेक स पाप की जीन्दगी भटे परमेश्वरा का तरफ उन खिन मद्दत करौ।”