प्रेरितून का काम 16 - सोरियाली नय्या नियम

पौलुसो को तीमुथियुसे स अपूना दगाड़ा लीनो

¹ येक बाद उन दिरबे और लुस्त्रा शैहरून में लै ग्यान, और लुस्त्रा में तीमुथियुस नामोको एक शिष्य रूछो। उकी ईजा एक यहूदी विश्वासी छी, लेकिन उको बबा यूनान देशो को छ्यो।

² उको लुस्त्रा और इकुनियुमा शैहरा का विश्वासी भाईन में निको नाम छ्यो।

³ पौलुस चांछ्यो कि तीमुथियुस उक दगाड़ हिटो; तीमुथियुस को बबा यूनान देशो को छ्यो और यूनानी लोग खतना नी करूछ्या पौलुसले उको खतना करवाछ, ताकि वाँक यहूदी लोग ऊस अपना लीन।

⁴ पौलुस और उक दगड़िया नगर-नगर जानै उन नियमून जो गैर-यहूदी विश्वासीन पुजूँ छ्या, जो यरूशलम शैहरा का प्रेरितून और बुज़ुर्गून ले ठैराईना का छ्या।

⁵ इसीकैं वाँक विश्वासीन को भरोस मजबूत और उनेरि गिनती लै हर रोज बढ़नै गैछ।

त्रोआस शैहर में पौलुसो को दर्शन

⁶ और उन फ्रूगिया और गलातिया प्रदेशून में भटे होभेरन ग्यान, किलैकी पवित्र आत्मा ले उनून आसिया प्रदेश में परमेश्वरे की बचन को प्रचार करून खिन रोकछ्य।

⁷ जब उन मुसिया प्रदेशा का नजिक पुजनान, तब उनूनले बितूनिया प्रदेश में जानो चाँछ्या। लेकिन इसो करून खिन यीशु की आत्माले उनुस मना करछ्य।

⁸ येक कारण उन मुसिया प्रदेश भटे होभेरन त्रोआस शैहर में आयान।

⁹ वाँ पौलुसले रात में एक दर्शन देखछ्य कि एक मकिदुनिया प्रदेशा का रून वालो आदिमी ठाँड़ है भेरन उथैं बिनती करभेरन कुंछो, “समुद्र पार करभेरन मकिदुनिया प्रदेश में अ, और हमरि मद्दत कर।”

¹⁰ जसीकैं यो दर्शन मिलछो, हमूले मकिदुनिया प्रदेश जानाकि योजना बनाछ। क्याखिनकि हम समझ ग्या कि परमेश्वरेले हमून उनून सुसमाचार सुणून खिन बुला रैछ।

फिलिप्पी शैहर में लुदिया को पश्चाताप

¹¹ येक कारण त्रोआस शैहर भटे पानि का जहाज में बैठभेरन हम सिद्दो सामोथ्रेसिया क टापू और दुसरा दिन नियापुलिस शैहर में आयाँ।

¹² वाँ भटे हम फिलिप्पी शैहर में पुजियाँ, जो मकिदुनिया प्रदेशा का खास शैहर और रोमीन की बस्ती छै। हम उ शैहर में थ्वाड़ा दिन तक रयाँ।

¹³ सबताक दिन हम नगराक फाटक का भ्यार नदी का किनार यो समझभेरन ग्या की वाँ यहूदीन की प्रार्थना करना की जाग होलि। हम बैठभेरन उन स्यैनिनथैं जो जाम छ्या, बात-चीत करून लाग्यान।

¹⁴ उन स्यैनिन में भटे एकोक नाम लुदिया छ्यो, उ थुआतीरा नगरे की रूनवाली छी, और महैंगा बैगनी कपाड़ान को ब्यापार करछी। जो परमेश्वर कि अराधना करछी। उ हमरि बात सुणूनमरेछी और परमेश्वर ले ऊस पौलुसकि बात समझून खिन और अपनून खिन उक मन तैय्यार करछ्य।

¹⁵ जब उले और उक परिवारले बपतिस्मा ली लीछ। तब उले हमूनथैं बिनती करछ्य, “कि अगर तुम लोग समझछा कि मैं प्रभु यीशु सच्ची में भरोस करछूँ तब म्यार घर हिटो। इसकैं उ हमून मनाभेरन अपून घर ली गैछ।”

पौलुस और सिलास जेल खान में

¹⁶ एक दिन जब हम फिर उ प्रार्थना जॉगा जानमरेछ्या, तब बॉट में हमरि भेंट एक जवान दासी का दगाड़ भैछ। उ एक भूतका जरियाले भविष्यबाणी करछी, जेले उ अपून मालिक खिन भौत डबल कमूंछी।

¹⁷ उ पौलुस और हमार पछिल आभरेन चिल्लान लागछी, “इन लोग परमप्रधान परमेश्वरा का सेवक छन, जो तुमून मुक्ति बॉटाको संदेश सुणून खिन आर्यान!”

¹⁸ उ भौत दिनून भटे इसो करूनमरेछी, आखरी में पौलुसले तंग हो भेरन पछिल मुड़भेरन उथैं क्योछ, “मैं यीशु मसीह का नामेंले तैंस हुकुम दीछूँ तैं यो चेलि में भटे भ्यार निकल!” और भूत उ बखत उमें भेट भ्यार निकल ग्यो।

¹⁹ जब उको मालिक ले देखछ्य, कि हमोरो रूपाया कमूनाको जरिया खतम है ग्योछ, तब उन पौलुस और सिलासै स पकड़भेरन नगराक चौक में प्रधानून का सामुनि खीचभेरन ली ग्यान।

²⁰ और उनूथैं इसो क्योछ, “इन यहूदी आदिमी छन, और हमार नगर में अशान्ति फैलून मर्यान।

²¹ इन इस रीति-रिवाजून को प्रचार करून मर्यान, जैस हम रोम देशाका रूनवालान खिन अपनून और मानून ठीक नाहातिन।”

²² तब तलक वाँ एक ठूली भीड़ लै जॉम हो गै, और फिर हाकिमून ले उनार कपाड़ा फाड़भेरन इनूस चाबुक मारना को हुकुम दीछ।

²³ उनूनले पौलुस और सिलासै स भौत डन्डा लगाभेरन और उक बाद जेल में डाली दीछ, और जेलरस हुकुम दीछ की उनून कड़ी निगरानी में राखा।

²⁴ उले यो हुकुम पाभेरन उनुस जेलका भितर वाली कोठरी में राखछ्य और उनार खुटान लाकड़ाक साचान में ठोकभरेन जकड़ दीयान।

पौलुस और सिलासो को जेल खान भटे निकलून

²⁵ अधरात में जब पौलुस और सिलास प्रार्थना करून मरेछ्या और परमेश्वर खिन भजन गान मरेछ्या और उनेरि कैदी सुणून मरेछ्या,

²⁶ तब एकाएक इदुक जोरदार भूचाल आछ, याँ तक कि जेल की नींव हिल ग्यै। और सब द्वार खुलि ग्या; और उनार दगाड़ सब कैदीन की जंजीर लै खुलि ग्या।

²⁷ जेलर की नीन टुटून, और जब उले यो देखछ्य कि सब द्वार खुलि ग्यान, त उले सोचछ्य कि अब तलक सब कैदी भाजि ग्या होला, येक कारण उले अपूनी तलवार निकालभेरन अपूनास जान है मरून चान मरेछ्यो।

²⁸ लेकिन पौलुसले जोर-जोरले क्योछ, “खबरदार, तैं अपनास जन मार, क्याखिनकि हम सब याँई छा!”

²⁹ यो सुणिभेरन जेलर ले बत्ती मंगाभेरन जेलाक भितर दौड़भेरन ग्योछ, और डरनै-कामनै पौलुस और सिलासका खुटान में पड़ ग्यो।

³⁰ और उनुस भ्यार ल्याभेरन क्योछ, “हे सज्जनो, उद्धार पान खिन मैं कि करूँ?”

³¹ तब उनूनले उथैं क्योछ, “प्रभु यीशु में विश्वास कर, तब तैं और त्यार पुर परिवार स उद्धार मिलोलो।”

³² तब उनूनले ऊस और उक परिवार स प्रभु को बचन सुणाछ।

³³ रातकैं उई बखत उले उनून लिजाभेरन उनार घ धोयान, और उले और उक पुर परिवार का सब लोगून ले बपतिस्मा लीछ।

³⁴ फिर जेलर ले पौलुस और सिलासै स अपून घर लिजाभेरन खान खवाछ, और अपूनो पुर परिवाराक दगाड़ परमेश्वर में विश्वास करभेरन उन सब खुश छ्या।

³⁵ दुसारा दिन रात्तै अधिकारीन ले सिपाईन का हात खबर भेजवाछ की उन आदिमीन छोड़ी दी।

³⁶ जब जेलर ले यो खबर पौलुस स बताछ, कि “अधिकारीन ले तुमून छोड़ दिनाकी हुकुम भेज रैछ, येक कारण अब तुम शान्ति ले जा सकछा।”

³⁷ लेकिन पौलुसले उनूनथैं क्योछ, “ उनूनले हम जो रोम देशा का रूनवाला छा, मुकदमा ठैराये बिना लोगून का सामुनि मारछैं, और जेल में डालछ्य। और अब क्या हमून चुप-चाप भ्यार निकाल दिन चानान? इसो नै हो! लेकिन जब उन खुद आभेरन हमून भ्यार लिजाला।”

³⁸ सिपाईनले अधिकारीन यो बात बताछ। पौलुस और सिलास रोमी नागरिक छन त उन डरी ग्या। किलैकी रोमी नागरिक स बिना कसूर और मुकदमाक मारून सजा लायक को अपराध छ्यो।

³⁹ येक कारण उनूनले खुद आभेरन उनूनथैं माफी माँगछ्य, और जेल भटे भ्यार लिजाभेरन उनूनथैं यो बिनती करछ्य, कि तुम यो शैहर छोड़िभेरन न्हैजा।

⁴⁰ उन जेल भटे निकल भेरन लुदिया नामेंकी एक स्यैनिक पास ग्यान, और विश्वासी भाईन थैं मिलभरेन उनून शान्ति दीछ, येक बाद वाँ भटे न्हैग्या