प्रेरितून का काम 13 - सोरियाली नय्या नियम

बरनबास और शाऊलो को भेजि जानो

¹ अन्ताकिया शैहरा का विश्वासीन में कुछ परमेश्वरा का संदेश दिनवाला और शिक्षक छ्या, जसीकैं बरनबास और शमौन जैथैं नीगर ले कुंनान, और लूकियुस जो कुरेनी शैहर भटे छ्यो, और मनाहेम, जैको पालन-पोषण राज्य का चौथाई हिस्सा क राजा हेरोदेस क दगाड़ होईना को छ्यो और शाऊल।

² जब उन उपवास में रैभेरन अराधना करन मरेछ्या, त पवित्र आत्मा ले क्योछ, “मैंखिन बरनबास और शाऊल स उ सेवा खिन अलग कर जैखिन मैंले उनुस बुला रैछ।”

³ तब उनूनले उपवास और प्रार्थना करभेरन शाऊल और बरनबास क ख्वारा में हात राखभेरन उनून परमेश्वर की सेवा खिन भेजछ्य।

पौलुसै की पैलि परचार-यात्रा

⁴ येक कारण शाऊल और बरनबास पवित्र आत्माक द्वारा अन्ताकिया शैहर भटे सिलूकिया टापू खिन भेजि ग्यान; और वाँ भटे समुन्द्री जहाज में बैठभेरन साइप्रस टापू भटे सलमीस टापू खिन न्हैग्या;

⁵ और सलमीस शैहर में पुजभेरन यहूदी लोगून का सभाघर में जाभेरन परमेश्वरको बचन लोगून सुणून; लाग्यान। और यहूना मरकुस उनेरि मद्दत करून खिन उनार दगाड़ छ्यो।

⁶ उन सब टापू भटे होभेरन पाफुस टापू तक पुज्यान। वाँ उनेरि भेंट बार-यीशु नामोको एक जादूगरक दगाड़ भैछ, जो यहूदी और झूठ्ठो संदेश दिनवालो छ्यो।

⁷ बार-यीशु सिरगियुस पौलुसो को दगड़िया छ्यो, जो उ टापू को राज्यपाल छ्यो और बुद्धिमान आदिमी छ्यो। उ बरनबास और शाऊल स बुलाभेरन परमेश्वरोको बचन सुणून चाँछ।

⁸ लेकिन जादूगर बार-यीशु ले, जैस यूनानी भाष में इलीमास कुंनान, उनार खिलाफ छ्यो, और उ राज्यपाल सिरगियुस स परमेश्वर में विश्वास करून भटे रोकून चांछ्यो।

⁹ तब शाऊल ले जैको नाम पौलुसले छै, पवित्र आत्मा ले भरिभेरन एलीमास जादूगर कि तरफ गौरले देखभेरन क्योछ,

¹⁰ “हे छल और कपट ले भरिना का शैतान की सन्तान, और हरेक निको बातुनको दुश्मन लै छै! क्या तैं प्रभुक सच्चा बाटान झूठ्ठो बाटान में बदलून है नी छोड़लै?

¹¹ अब प्रभु तैंस सजा द्याला। तैं कुछ बखत खिन अन्धो है जालै और थ्वाड़ा बखत तलक तैं सूरजो को उज्यालो नी देख सकलै!” और उई बखत उक आँखान का सामुनि अन्यारो है ग्यो और उ फिर लाचार है भेरन इथकैं-उथकैं टटोलुन लागछ्य कि कोई उक हात पकड़ भेरन ऊस ली जा दीयो।

¹² तब राज्यपाल ले जो कुछ भ्योछ, ऊस देखभेरन और प्रभु की शिक्षान ले चकित होभेरन प्रभु यीशु में विश्वास करछ्य।

पिसिदिया प्रदेशाक अन्ताकिया शैहर में

¹³ पौलुस और उक दगड़ियान ले पाफुस टापू भटे समुन्द्री जहाज में सफर शुरू करछ्य, और पंफूलिया प्रदेशा का पिरगा शैहर में आयान; और यहूना मरकुस उनून छोड़भेरन यरूशलम शैहर खिन वापस आग्यो।

¹⁴ और पिरगा शैहर भटे अघिल बढ़भेरन गलातिया प्रदेशा का पिसिदिया जिला का नजिक अन्ताकिया शैहर में पुज्यान। और सबताक दिन यहूदीनका सभाघर में जाभेरन बैठग्या।

¹⁵ मूसा का नियम कानून और परमेश्वरा का संदेश दिनवालान की किताब भटे पढ़ना क बाद यहूदी सभाघरा का अधिकारी ले उनार पास संदेश भेजछ्य, “हे भाईयो, अगर तुमून में भटे केका पास लोगून उत्साहित करून खिन कोई वचन छै त कृपा करभेरन ऊस याँ बता।”

¹⁶ तब पौलुसले ठाड़ होभेरन हात ले इशारा करभेरन उनून शान्त करभेरन क्योछ, “हे इस्राएली लोगो, और परमेश्वर भटे डरन वाला गैर-यहूदी, सुणा।”

¹⁷ इन इस्राएली लोगून का परमेश्वरले हमार पुरखान चुन लीछ, और जब इन सब मिस्र देश में परदेशी होभेरन रूछ्या, और उनेरि बढ़ोतरी करछ्य, और प्रभु अपूनी सामर्थ ले उनून उ देश भटे निकाल ल्याछ।

¹⁸ और उ चालीस सालून तक बिरान जागा में उनोरो ब्यवहार सहन-करनै र्योछ, हालांकि उनूनले बार-बार उनोरो हुकमून नै मान्यो।

¹⁹ और परमेश्वर ले कनान देश में सात जातिन को नाश करभेरन उनोरो देश इस्राएली लोगून बिरासत में दी दीछ।

²⁰ हमार पुरखानले उनार पुरखान का मिस्र देश में पुजाई जान है लगभग चार सौ पचास सालून का बाद कनान में अधिकार करून शुरू करछय। परमेश्वरले संदेश दिनवालो शमूएल स इस्राएली लोगून में राज करन खिन अगुवा ठैराछ।

²¹ जब शमूएल उनोरो अगुवा छ्यो, तब लोगूनले अपून खिन एक राजा की माँग करछ्य। और परमेश्वरले बिन्यामीना का कुल में भटे एक आदिमी, मतलब कीशो को च्योलो शाऊल स उनोरो राजा नियुक्त करछ्य और उले इस्राएली लोगून में चालीस साल राज करछय।

²² फिर परमेश्वर ले शाऊल स राजा का पद भटे हटाभेरन दाऊद स उनोरो राजा बनाछ। जैक बारिमें उले गवाही दीछ, “मैंस एक आदिमी यिशै को च्योलो दाऊद मेरि मनसा अनुसार मिल ग्यो, उई मेरि सारी मनसा पुरी करोलो।”

²³ उक वंश में भटे परमेश्वरले अपून वादा का अनुसार इस्राएल देशा का पास एक मुक्तिदाता यीशु भेजछ्य।

²⁴ जैक उन है पैलि यहूना ले प्रचार करछ्य कि सब इस्राएली लोगून अपून पापून को पश्चाताप करून और परमेश्वरा का तरफ मन फिराव और बपतिस्मा लीना की जरूरत छै।

²⁵ और जब यहूना अपूनी सेवा पुरी करून में छ्यो, त उले क्योछ, “तुम मैंस कि समझछा? मैं मसीह नाहातिनू। लेकिन सुणा! म्यारा बाद उनवाला छै, उ मैं है भौत महान छै और मैं त उक जूत्ताको तानो ले खोलना को लायक नाहातिनू।”

²⁶ “हे भाईयो, तुम जो अब्राहम की संतान छा; और परमेश्वर भटे डरून वाला गैर-यहूदी सुणा, परमेश्वर ले हमून संदेश दी रैछ कि यीशु लोगून हमार पापून भटे बचुन खिन आईना को छै।

²⁷ यरूशलम शैहरा का लोगूनले और उनार अगुवा ले यीशु स नै पछ्याण और उनूनले परमेश्वरा का संदेश दिनवाला लोगून का बचनून नै समझयो जिनून उन हरेक सबता का दिन पढ़ छ्या। येक कारण उनूनले क्योछ यीशु मारी जान लायक छै और इसीकैं परमेश्वरा का संदेश दिनवाला लोगून को बचनून पुरो करछ्य।

²⁸ उनूनले मार डालना को कोई ले दोष उमे नै पायो, फिरले राज्यपाल पिलातुस थैं विनती करछय, की उ मार डाली जौ।

²⁹ और जब उनूनले उ सब करछय जो पवित्र-शास्त्र उक बारिमें कुंछो, त ऊस सूली भटे उतार भेरन कबर में राखछै।

³⁰ लेकिन परमेश्वरले तिसार दिन उनुस मरिन में भटे फिर ज्यून करछ्य,

³¹ और उन जो उनार दगाड़ गलील प्रदेश भटे यरूशलम शैहर में आईनाक छ्या। उ उनून भौत दिनून तक दिखाई दीनै र्योछ; जिनूनले ऊस देखछै अब उन हम यहूदीन खिन गवाह छन।

³² और हम तुमून उ वादाक बारिमें जो परमेश्वरे ले हमार पुरखानथैं करीन को छ्यो, यो सुसमाचार सुणूनू,

³³ परमेश्वर ले यीशु स मरिनान में भटे ज्यून करछ्य। इसकैं उले अपून पुरखानथैं करिनाको वादा पुरो करछ्य। परमेश्वर ले हमारा पुरखान खिन इसो करछ्य। जसो दुसरो भजन में परमेश्वरे ले अपून च्यालाक बारिमें कईनाको छै; ‘तैं म्योरो च्योलो छै; आज मैं तेरो बाब बन गयूँ।’

³⁴ परमेश्वर ले पवित्रशास्त्र में ऊस मुर्दान में भटे ज्यून हुना का और कभै नी सड़ बारिमें क्योछ। और परमेश्वर ले क्योछ, ‘मैं तैंस पवित्र और हमेशा की आशीष द्यूलो, जैको वादा मैंले राजा दाऊद थैं करिनाको छ्यो।’

³⁵ येक कारण राजा दाऊद ले एक और भजन में ले क्योछ, ‘तैं अपून पवित्र जन स सड़ून नी देले।’

³⁶ दाऊद त परमेश्वरेकि इच्छाक अनुसार अपून बखत में सेवा करभेरन मर ग्यो, और अपून पुरखान में मिल ग्यो, और उ सड़ ले ग्यो। येले हम जाणनू की दाऊद यो भजन में अपून बारिमें बात नै करूनमर्योछ।

³⁷ लेकिन उ यीशु का बारिमें कुनमर्योछ जैस परमेश्वरले मरिन में भटे ज्यून करछ्य, और उ सड़ून नै पायो।

³⁸ येक कारण, हे भाईयों, मैं चाछूँ कि तुम जाणली कि पापून की माफी को समाचार तुमून यीशुक द्वारा दीई ग्योछ।

³⁹ और जिन बातुन ले तुम मूसा का नियम-कानून मानना का द्वारा निर्दोष नै ठैर सकना, उनूनमें सब में हरेक विश्वास करनवाला यीशुक द्वारा निर्दोष ठैरछो।

⁴⁰ येक कारण तुम चौकुना रौ, काँई इस नै हो, कि जो परमेश्वरो को संदेश दिनवालान ले कै रैछ, उ तुमारा दगाड़ ले होलो।

⁴¹ उनूनले‍ क्योछ, ‘हे निन्दा करनवालो देखा और चकित हो और मर जा, क्याखिनकि मैं तुमार दिनून में एक काम करछूँ; इसो काम अगर कोई उक बारिमें बतालो ले तुम कभै विश्वास नी करला।’”

⁴² जब पौलुस और बरनबास सभाघर भटे भ्यार उनान, तब लोगूनले उनूनथैं बिनती करछ्य कि तुम इन बातुन अघिल सबता का दिन उनून फिर सुणाई जौ।

⁴³ और जब यहूदी सभा उठ गै त यहूदिया और यहूदी मत में आईना का गैर-यहूदी भक्तून में भटे भौत पौलुस और बरनबासा का पछिल हो ग्या; और उनूनले उनूनथैं बात करभेरन समझाछ की परमेश्वरा का अनुग्रह में बनिनाक रौ।

पौलुसा का द्वारा गैर यहूदीन में परचार की शुरूवाद

⁴⁴ अघिल सबत क दिन शैहरा का सारा लोग परमेश्वरो को बचन सुणून खिन जाम है ग्या।

⁴⁵ लेकिन यहूदी अगुवा भीड़ देखभेरन जलन ले भरग्या, और पौलुसै कि बातुन को बिरोध और निन्दा करून लाग्यान।

⁴⁶ तब पौलुस और बरनबासले निडर है भेरन उनूनथै क्योछ, “जरूरी यो छै कि पैलि परमेश्वरो को बचन तुमून सुणाई जानो, लेकिन जब तुम ऊस नकार दीछा, और अपूनास अनन्त जीन्दगी का लायक नै ठैरूना, त अब हम गैर-यहूदी लोगून का पास जूला।”

⁴⁷ क्याखिनकि प्रभु ले हमून यो हुकुम दी रैछ, “मैंले तुमून गैर-यहूदी जातिक लोगून खिन उज्यालो बना रैछ, जेलै दुनिया का हरेक जाग में लोगून मुक्तिदाता का बारिमें बतून चैंछो।”

⁴⁸ यो सुणभेरन गैर-यहूदी का लोग भौत खुश भ्यान, और परमेश्वरेकि बचन की तारीफ करन लाग्यान। और जतुक अनन्त जीन्दगी खिन ठैराईनाक छ्या, उनूनले विश्वास करछय।

⁴⁹ तब प्रभु को बचन उ पुर प्रदेश में फैल ग्यो।

⁵⁰ लेकिन यहूदीन का अगुवा ले भक्त और ठुल जाति का स्यैनिन और शैहरा का खास आदिमीन भड़काछ। उनूनले पौलुस और बरनबासा का खिलाफ उपद्रव कराभेरन उनून अपून इलाक भटे भ्यार निकाल दीछ

⁵¹ तब पौलुस और बरनबासले उनार सामुनि खूटाकि धुल झाड़ी दीछ, उनून यो देखून खिन की परमेश्वर ले उनून नकार दीछ और उनून सजा द्याला। फिर उन इकुनियुम शैहर खिन न्हैग्या।

⁵² और उन अन्ताकिया शैहर में शिष्य खुशी ले और पवित्र आत्मा ले भरिनै ग्यान।