प्रेरितून का काम 11 - सोरियाली नय्या नियम

पतरसका द्वारा अपूना कामून बतून

¹ फिर प्रेरितून और विश्वासीन ले जो यहूदिया प्रदेश में छ्या, उनूनले सुणछ कि गैर-यहूदी ले परमेश्वरको वचन मानून लाग्यान।

² और जब पतरस उनार पास यरूशलम शैहर में आछ, खतना करिना का यहूदी विश्वासी लोग उक दगाड़ बाद-बिवाद करून लाग्यान,

³ “तैले गैर-यहूदीन का घर में जाभेरन खान किलैं खाछ?”

⁴ तब पतरसले जो बात कुरनेलियुस का घर में जान है पैलि भ्यान उनून शुरू भटे लीभेरन आखरी तक एक-एक करभेरन बतायान।

⁵ “जब मैं याफा नगर में प्रार्थना करमरेछ्यूँ, उ बखत मैं बेसुध होग्यू और मैंले दर्शन देखछ्य कि एक ठूली चधरका जसी कोई चीज चारों किनारान में लटकिना की आकाश भटे तलि उछी। और उ ठीक म्यार सामुनि आछ।”

⁶ और जब मैंले ऊस ध्यान देखछ्य, उमें धरतिक सब किसमा का घरेलू जानवर, और सब रिगनिया जीव-जन्तु और चिड़ियान देख्यान।

⁷ और फिर मैंले एक आवाज सुणछ्य, “पतरस, उठ, इनूस मारभेरन खा।”

⁸ लेकिन मैंले क्योछ, “प्रभु, मैंले कभै ले कोई अपवित्र और अशुद्ध चीज नै खा रै।”

⁹ तब दुसारा बार स्वर्ग भटे यो आवाज आछ, “परमेश्वरले जैस पवित्र बना रैछ, तैं ऊस अपवित्र और अशुद्ध जन कौ।”

¹⁰ तीन बार इसो हुछो, येक बाद सब स्वर्ग खिन खिच लिई ग्यो।

¹¹ उई बखत कैसरिया नगर भटे जो कुरनेलियुस नामोको आदिमी ले जिन तीन आदिमी म्यारा पास भेजिना का छ्या, उन उ घर में पुजी ग्या जाँ हम रूकिनाका छ्या।

¹² तब पवित्र आत्मा ले मैथैं क्योछ, “बेहिचक इनारा दगाड़ जा।” फिर इन छ: विश्वासी भाई लै म्यार दगाड़ आयान, और हम उ आदिमी का घर भितर ग्या।

¹³ तब उले हमून बताछ, कि उले स्वर्गदूत स अपून घर में देखछ्य, जेलै उथैं क्योछ, “तैं कैसे याफा नगर भेजिभेरन शमौन जैस पतरसले कुंनान याँ बुला।

¹⁴ उ तैंस इस बात बतालो, जेलै परमेश्वर तैंस और त्यारा घराना का सबै लोगून बचालो।”

¹⁵ जब मैं उनुस यीशुक बारिमें बतून मरेछ्यू, तब पवित्र आत्मा उनूनमें आछ, जसीकैं पैलि हमून में आछ।

¹⁶ तब मैंस उ बचन याद आछ जो यीशु ले हमूनथैं कईनाको छ्यो, कि यहूना ले तैं पानिको बपतिस्मा दीछ, पर तुम पवित्र आत्मा ले बपतिस्मा पाला।

¹⁷ येक कारण परमेश्वरले उनून यो बरदान दीछ, जो प्रभु यीशु मसीह में विश्वास करना ले मिलछो; त मैं को छूँ जो परमेश्वरा का खिलाफ जाछूँ? जब परमेश्वरले उनार दगाड़ कोई भेदभाव नै कर्यो, तब मैं किलैं करूँ?

¹⁸ यो सुणिभेरन, उन यहूदी विश्वासी चुप र्यान, और परमेश्वरै की तारीफ करून लाग्यान, “तब त परमेश्वरेले गैर-यहूदी लोगून ले अनन्त जीन्दगी खिन अपून पापून भटे पश्चाताप करून और यीशु मसीह में विश्वास करना को दान दी रैछ।”

अन्ताकिया शैहर में शाऊल और बरनबास

¹⁹ स्तिफनुस की हत्या बाद, कई विश्वासीन ले यरूशलम शैहर स छोड़ दीछ, और उन घुमनै-घुमनै फीनीके प्रदेश, साइप्रस द्वीप और सीरिया देशाक अन्ताकिया शैहर में पुजियान; लेकिन यहूदी लोगून छोड़ और कैसे परमेश्वरो को वचन नी सुणूछ्या।

²⁰ लेकिन उनूनमें भटे थ्वाड़ा विश्वासी साइप्रस का रूनवाला और कुरेनी का रूनवाला छ्या, जो अन्ताकिया शैहर में आभेरन गैर-यहूदी यूनानीन प्रभु यीशुक बारिमें सुसमाचार बतून लाग्यान।

²¹ और प्रभु की सामर्थ उनूनमें छी, और भौते गैर-यहूदी लोगून ले उनेरि बातुन में विश्वास करछ्य और प्रभु यीशु स ग्रहण करछ्य।

²² जब उनार बारिमें यरूशलम शैहरा का विश्वासीन ले सुणछ्य, तब उनूनले बरनबास स अन्ताकिया शैहर भेजछ्य।

²³ बरनबास वाँ पुजभेरन यो वाँक लोगूनमें परमेश्वरै का अनुग्रह देखिभेरन खुश भ्योछ, और उन सबून उपदेश दीछो कि उन अपून पुर मनले परमेश्वर में भरोस करून खिन अटल रया।

²⁴ उ एक निको आदिमी छयो; उ विश्वासी और पवित्र आत्मा ले भरिना को छ्यो, ऊस देखभेरन भौत लोग ले प्रभु में विश्वास करभेरन उनूनमें मिलग्या।

²⁵ तब बरनबास अन्ताकिया शैहर छोड़भेरन शाऊल स खोजून खिन तरसुस शैहर खिन न्हैग्यो।

²⁶ और जब उ मिलछ्य त ऊस अन्ताकिया शैहर ल्याछ। इसो भ्योछ की शाऊल और बरनबास एक साल तक विश्वासीन की मण्डली का दगाड़ मिलीयान और भौत लोगून प्रभु यीशुक बारिमें बतूनै र्यान। शिष्य सबून है पैलि अन्ताकिया शैहर मेंई मसीही कहलायान।

²⁷ उ बखत थ्वाड़ा विश्वासी जो परमेश्वरो को संदेश दिनवाला छ्या यरूशलम शैहर भटे अन्ताकिया शैहर आयान।

²⁸ उनूनमें भटे एक परमेश्वरोको संदेश दिनवालो जैको नाम अगबुस छ्यो, उ ठाड़ भ्योछ और पवित्र आत्मा की सामर्थ ले उनून बताछ कि सार धरती में भौत ज्यादा अकाल पड़ून वालो छै यो अकाल सम्राट क्लौदियुस राज्यकाल का बखत में पड़छ्य।

²⁹ तब विश्वासीन ले फैसला करछ्य, कि उन यहूदा प्रदेश में रूनवाला विश्वासी भाई-बैनिन की मद्दत करून खिन अपूनी-अपूनी कमाई का अनुसार हम डबल जाम करभेरन भेजुंला।

³⁰ उनूनले इसोई करछ्य; और बरनबास और शाऊल क हात विश्वासीन क बुज़ुर्गून का हात दान भेजछ्य।