प्रेरितून का काम 10 - सोरियाली नय्या नियम

कुरनेलियुस स दर्शन

¹ कैसरिया नगर में कुरनेलियुस नामको एक आदिमी छ्यो, उ ईटालयन सेनाक रेजीमेन्ट में एक सुबदार छ्यो।

² उ और उक परिवार धार्मिक और परमेश्वरा का भक्त छ्या, येक अलावा उ यहूदी गरीब आदिमीन दान दीछ्या और हर बखत प्रार्थना में लाग रूछ्या।

³ उले एक दिन छकाल में लगभग तीन बजे दर्शन में साफ देखछया कि परमेश्वरा का स्वर्गदूत ले उक पास आभेरन क्योछ, “हे कुरनेलियुस।”

⁴ कुरनेलियुस ले ऊस ध्यान ले देखछ्य और डरभेरन क्योछ, “हे प्रभु, कि बात छै?” उले उथैं क्योछ, “परमेश्वरले तेरि प्रार्थना सुण हालछ्य, और त्यार दान दीनै ले उन खुशी छन।

⁵ येक कारण अब तैं याफा नगर में आदिमी भेजभेरन शमौन जैस पतरस ले कुंनान, ऊस बुलवा ले।

⁶ उ चमड़ाक काम करन्या शमौनक घर में रून मर्योछ, जेको घर समुद्रा का किनार में छै।”

⁷ येक बाद उ स्वर्गदूत वाँ भटे न्हैग्यो, और कुरनेलियुस ले द्वी सेवकून और जो हमेशा उक सेवा खिन ठहराईनाक छ्या उमें भटे एक भक्‍त सिपाई स बुलाछ,

⁸ और उनुस सब बात बताभेरन याफा नगर भटे पतरस स लियून खिन भेजछ्य।

पतरस स दर्शन

⁹ दुसारा दिन तीन आदिमी जिनून कुरनेलियुस ले भेजनाक छ्या, उन लगभग बार बजे वाँ पुज्यान। उ बखत पतरस घराक पाख में प्रार्थना करन खिन ग्योछ।

¹⁰ ऊस भुख लागछ्य और उ के खान चाँछ्यो, लेकिन जब उन खान पकून मरैछ्या त उ बेसुध हो ग्यो।

¹¹ तब पतरस ले एक दर्शन देखछ्य कि आकाश खुल ग्योछ; और एक ठूली चधरक जसी कोई चीज जो चारू कुंना में लटकिना की आकाश भटे उक पास धरती आछ।

¹² जैमें धरतीका उ चार खुटान वाला और रेगूनवाला जानवर और आकाशाक चिड़िया छ्या, जिनारा बारिमें मूसा का नियम-कानून में लिखीनाक छै की उ अशुद्ध और अपवित्र छै और इनून खान खिन यहूदीन मना करिना को छै।

¹³ तब उले यो आवाज सुणछ, “हे पतरस, उठ और उनुस मारभेरन खा।”

¹⁴ लेकिन पतरसले क्योछ, “प्रभु, नै, मैं इसो नै कर सकनू, क्याखिनकि मैंले कभै अपवित्र और अशुद्ध चीज नै खा रै।”

¹⁵ फिर उले दुसारा बार यो आवाज सुणछ्य, “जैस परमेश्वरले शुद्ध कर दीछ, ऊस तैं अशुद्ध जन कौ।”

¹⁶ तीन बार इसो हुना का बाद, उ चधर दुबाँर आकाश खिन उठा लीगै।

¹⁷ जब पतरस यो दर्शनक बारिमें सोचून मर्योछ कि येक मतलब कि होलो, तब कुरनेलियुस का भेजिनाक आदिमीन शमौनो को घराक पतो लगाभेरन द्वारा का सामुनि ठाड़ है भेरन पुछून लाग्यान।

¹⁸ शमौन, जैस पतरस ले कुंनान, “क्या उ याँई मेहमान छी?”

¹⁹ पतरस उ दर्शन का बारिमें सोचून मर्योछयो, कि पवित्र आत्मा ले पतरस थैं क्योछ, “देख! तीन आदिमी तैंस खोजून मर्यान।

²⁰ भले उन गैर-यहूदी छन, और उठभेरन तलि जा, और बिना सोचे उनार दगाड़ जा; मैंले उनून भेजिना को छै।”

²¹ तब पतरस ले तलि जाभेरन उनूनथैं क्योछ, “देख, जैक बारिमें तुम पूछुनमरेछा, उ मैं छूँ, तुम याँ किलैं आ रैछा?”

²² तब उनूनले क्योछ, “कुरनेलियुस सुबदार, जो धर्मी छै और परमेश्वर भटे डरछो, और जैकी पुर यहूदी जातिक लोग इज्जत करनान, ऊस एक पवित्र स्वर्गदूतले यो हुकुम दी रैछ कि उ तुमून अपून घर बुलाभेरन बचन सुणो।”

²³ यो सुणभेरन पतरसले उनुस भितर बुलाछ, और उनेरि खातिरदारी करछ्य। और दुसारा दिन पतरस उनार दगाड़ ग्योछ, और याफा का थ्वाड़ा विश्वासी ले उनार दगाड़ ग्यान।

कुरनेलियुस का घर में पतरस

²⁴ तिसार दिन उन कैसरिया नगर में पुजियान जाँ कुरनेलियुस अपून पुर परिवाराक और दोस्तून का दगाड़ उनोरो इन्तजार करून मरेछ्यो।

²⁵ जब पतरस भितर उनमरेछ्यो, त कुरनेलियुस ले उक दगाड़ भेंट करछ्य, और उक खुटान में पड़भेरन उकी भक्ति करून लागछ्य।

²⁶ लेकिन पतरसले ऊस उठाभेरन क्योछ, “मेरि भक्ति जन कर, मैंले तुमोरो जसो आदिमी छूँ।”

²⁷ पतरस कुरनेलियुस दगाड़ बात-चीत करनै-करनै भितर ग्योछ, और वाँ भौत लोगून जाम देखिभेरन कुंन लागछ्यो,

²⁸ “तुम जाणछा कि हम यहूदीन खिन कोई गैर-यहूदी का दगाड़ रिशता राँखून या उनार घर में जान मना छै, हम यहूदी लोगूनका नियमाक खिलाफ छै लेकिन परमेश्वरेले मैंस बताछ कि मैं कोई आदिमी स अशुद्ध नै कुँ।

²⁹ येक कारण जब तुमूले मैंस बुलाछ, तब मैं बेहिचक आयूँ। अब बता, तुमूले मैंस याँ किलैं बुलाछ?”

³⁰ तब कुरनेलियुस ले क्योछ, “आज भटे चार दिन पैलि योई बखत, जब मैं अपून घर में छकाल में तीन बजे प्रार्थना करन मरेछ्यू, तब एक चमकीला कपाड़ा पैनिना को आदिमी म्यार सामुनि आछ।”

³¹ और उले मैंथैं क्योछ, “हे कुरनेलियुस परमेश्वरले तेरि प्रार्थना सुण हालछै और त्यार दान दिनाले परमेश्वर खुश छन।

³² येक कारण कैसे याफा नगर भेजिभेरन शमौन जैस पतरस लै कुंनान, ऊस याँ बुला लै। उ समुद्रा का किनार चमड़ाक काम करन्या वाला शमौना का घर में महेमान छै।”

³³ तब मैंले तैंस या बुला और तैंले याँ आभेरन बड़ी किरपा करछ्य। “अब हम सब या परमेश्वरा का सामुनि छा कि जो बात उनूनले तुमून बता रैछ, हम सब ले उक बारिमें जाण सका।”

पतरसो को परचार

³⁴ तब पतरसले क्योछ, अब मेरि समझ में निकीकैं आग्योछ कि परमेश्वर कैका दगाड़ भेद-भाव नै करूनो।

³⁵ लेकिन हरेक जाति को आदिमी जो परमेश्वर है डरछो और धार्मा का काम करछो, उ ऊस अपनूछो।

³⁶ तुमून उ बाताक बारिमें मालूम छ्यो, जो परमेश्वरेले हमून खिन मतलब इस्राएल देशा का लोगून दीईना की छी। उले शान्ति का बारिमें सुसमाचार सुणाछ, जो लोगून यीशु मसीह में विश्वास करना का द्वारा मिल सकछो। उ सब लोगून को प्रभु छै।

³⁷ तुमून उ बचन क बारिमें पतो छी, जो यहूना को बपतिस्माक प्रचाराक बाद गलील प्रदेश भटे शुरू होभेरन सारा यहूदी प्रदेश में फैल ग्यो।

³⁸ परमेश्वरे ले उई यीशु जो नासरत गौ छ्यो जैको पवित्र आत्मा और सामर्थ ले अभिषेक करछ्य, और उ हरेक जाग भलाई करनै र्योछ और सब जो शैताना का सताइनाक छ्या, उन सबून ठीक कर्यान क्याखिनकि परमेश्वर उक दगाड़ छ्यो।

³⁹ और हम प्रेरित, उन सब कामून का बारिमें, जो हमूले यीशु स यरूशलम शैहर में पुर यहूदी प्रदेशून में करून देखछ्य और यहूदी अगुवान ले ऊस सूली में मार दीछ।

⁴⁰ लेकिन परमेश्वरले ऊस तिसार दिन मरिन में भटे ज्यून करभेरन उन लोगून दिखाछ।

⁴¹ सब लोगून ले ऊस नै देख्यो लेकिन उन गवाहन ले जो परमेश्वर ले पैलि चुन राख छ्या, मरिनान में भटे ज्यून हुना का बाद उक दगाड़ खाछ-पीछ;

⁴² और उले हमून हुकुम दीछ, कि सब लोगून में प्रचार करा और गवाही दीया, कि यीशु उई छै जैस परमेश्वरे ले ज्यून और मरिना को न्याय करन खिन ठैरा रैछ।

⁴³ उनार बारिमें सब परमेश्वरो को संदेश दिनवालान ले गवाही दीछ कि जो लै उमें भरोस राखाला, उनुस उनार जरियाले पापून कि माफी मिलेली।

अन्यजातिन में पवित्र आत्मा उतरून

⁴⁴ जब पतरस बोलन मर्यो छ्यो, तब पवित्र आत्मा सब सुणून वालान में आछ।

⁴⁵ जो खतना करिना का यहूदी विश्वासी पतरस का दगाड़ आ रैछ्या, उन यो सब देखिभेरन दंग रैग्या कि पवित्र आत्मा को बरदान गैर-यहूदी ले मिलछ्य

⁴⁶ किलैकी यहूदी विश्वासीन ले उनून अलग-अलग भाषा में बोलनान और परमेश्वरकि अराधना करून देखछ्य, तब पतरसले क्योछ।

⁴⁷ “क्या इनून अब कोई पानि ले बपतिस्मा लीना ले रोक सकछोई, जिनून हमार समान पवित्र आत्मा परमेश्वर भटे मिलर्योछ?”

⁴⁸ येक बाद पतरसले, जो लोग कुरनेलियुस क घर में जाम छ्या। तब उले हुकुम दीछ कि उनून यीशु मसीहक नामले बपतिस्मा दीई जौ। और उनूनले पतरस थैं बिनती करछ्य कि उ थ्वाड़ा दिनून तलक उनार दगाड़ रौ।